Read abua Joel 2 Bible Online

Joel 2 - abua bible

Joel 2

¹Ipula eeḍue ẹpe Zạyon; ekar ogele ẹeḅaraph iigbia Ẹnaan phọ. Weye aJuda, ikpereghaany! Aḍio Ọmoogh-we phọ retu. Mesi ẹda ạḍighaagh.

²Aḍio phọ keḍighi ufiri kụ ebeeph, kebil kụ ẹmoogh ọotu. Aḍigbogh aḍita igurubia phọ retu mụdi ufiri kụ eleeny rạaḅaraph phọ. Ọdo ịyaar lọ ẹrol ịduon kẹ̋rol ghan kụ kẹ́tol mun bịninin.

³Ịdipho ạnian kụ ẹdi bịdi rẹtaal ịizupha phọ. Ghisigh ạbidi, ade phọ ẹtol mụdi Oghoony Iden, kụ ọman ạbidi eḍighi ẹdala dị rꞌịyaar ílho. Ịyaar bịdi rékpetenaan ghan.

⁴Bịdi ẹkighogh igbogh ạrusu; bịdi rekiil mụdi igbogh ạrusu ẹgham.

⁵Mem dị bịdi repeleghu ạnyu ạraaḅaraph phọ, ạḍiaḅa ạbidi ẹkigh rughuugh ẹgham; Bịdi rẹkpataghaan ịdipho ạtugharaghar ạroogho dị ọlogh ologhi ạnian. Bịdi rẹkoolan ghan mụdi aḍigbogh aḍita ạbuo ẹgham dị mọnya ẹgham.

⁶Okpekian phọ ạbidi, tọrobo oye ạmoogh oghiilaan; tọrobo aghisigh akiton akpaghagha.

⁷Bịdi ozuom ịdipho arephelegbe; bịdi okpogha iikpe mụdi awe ẹgham. Oomo ạbidi onyeene orelhe ọghi kụ rꞌowol óphogh ẹnon ạga

⁸ḅịle úukulughan. Bịdi ọpeeph ọḅeeny rạraar lọ ogborori yogh kụ rꞌịyaar bịdi kékikima.

⁹Bịdi ọkimom rꞌịnyaam ẹpe ẹmha phọ; bịdi ọḅeenyogh iikpe, bịdi ọsinyighu ruutu kụ ọḍua rughuugh ookuugh kụ oḍiku ịdipho ạruḅa.

¹⁰Ade phọ epiigha mem dị bịdi rotu; okuaḍio phọ akpekper. Erumuḍio phọ rꞌụnwanyu phọ ekitonu ebil, kụ ạraanaan phọ ị́muanan mun.

¹¹Ọmoogh-we phọ amooghaam ịto ạḅeni we ẹgham ọdi. Aḍita dị ọnaghanan nyọdi ọbugh kụ ọmoogh ịikpo. Aḍio Ọmoogh-we phọ keḍighi ika aḍiigu! Ạnhian kụ kakpetenaan?

¹²Ọmoogh-we phọ ạḅem mọ, “Nyịidipho, ikiton rꞌoomo ologhi eḅula esi ạmi ẹḅaram ọkaagh ẹḍogh rꞌemoghi, rꞌọto.

¹³Iḍighi ịdi ologhi phọ anyina maḅonyonu bọ kaḍeenaan dọl ọto anyina; ọphanyi iinmenan anyina bịn ị́kasian.” Iḅula esi Ọmoogh-we Ẹnaan phọ anyina. Ọdi ạmoogh igbiririph kụ ạḅaram ọnma ighirigiir; Ọdi rạkparam ghan kụ kaḍighi ịlo aguanaan; Ọdi odi ghan ọsar ọwilenaan bịn ọ́lhiom.

¹⁴Iini Ọmoogh-we Ẹnaan phọ anyina kanme ni ologhi ọdi kụ ịsephom inyina rꞌiimuma dị ẹmanam. Kụ nyina egbi ọngo ọdi ịbiakpa rꞌamiim.

¹⁵Pula eeḍue phọ ẹpe ẹeḅaraph ạZayon; tọ ạḅeni bịdi ọkaagh ẹḍogh kụ ạmagh ookpomoghan!

¹⁶Kpookpoomoghi we phọ eniin esi; kookolobian bịdi ookpomoghan iigbia; pạm ikumoor awe phọ arumom; kookpomoghi nmụny phọ rꞌạnmuny asipugh phọ kẹn. Ghạlamo olhom rꞌạnir dị pụruku ạalan ọwile ni osoph ạbidi oru aani!

¹⁷Ạbupinyon rịkia phọ rokumu bọ Ọmoogh-we phọ ogbo enmeny phọ rꞌeḍighom Otu phọ, omoghi ni kụ ọoḅereghi: “Mọogh ọnma ighirigiir esi awe phọ ạna, Ọmoogh-we. Kámeera ịnon areelhe ụḅitonaan iyira kụ ụnmoghoghoom iyira esi ọḅem ghan mọ, ‘Ẹnaan phọ anyina edi ẹghen?’”

¹⁸Pọ kụ amem dị Ọmoogh-we phọ aḍeenaan ḍịḅeeraan de phọ ọdi; ọdi ạnma ni ighirigiir esi awe phọ ọdi.

¹⁹Ọdi ạphagharanaan bịdi: “Nyịidipho mị kịngo inyina ịbiakpa rꞌamiim rꞌạmunum-ọliv, kụ kịgbaanyan ni inyina. Ịnon areelhe kị́ḅitonaan mun inyina.

²⁰Mị kạsighe ḍita igurubia phọ ẹḍua bọ ephunom mọ kụ eru kụ aporogh iniin ịbadi ạkiom ẹdala ịisaar phọ. Ḍịkool arisigh phọ ạbidi koporogh osumeeny Ọphiiny-Ạla phọ, ḍita ọman phọ kosumeeny Ọphiiny aMeditarenian. Ịpe emuughu bọ kepur ri. Agey ni, ọdi muḍighi iboom ạraraar.

²¹“Iizo, kẹ́moogh oghiilaan, ịmoogh ghụn iboh rꞌọḅaal ologhi. Agey ni, Ọmoogh-we phọ muḍighi iboom ạraraar.

²²Ịnam, kẹ́moogh oghiilaan; Ạroogho phọ agbidiim; ireeny phọ emuum iimuma phọ ạbidi, kụ iimuma ireeny ạfig rꞌireeny avain emuza.

²³“Weye ạZayon, ịmoogh ọḅaal ologhi, ịmoogh iboh, esi ịpe Ọmoogh-we Ẹnaan phọ anyina miḍighinaan bọ inyina. Ọdi mạtuugh ọlophia arunu dị ạkasian ịngo inyina; ọdi miikuom ni inyina mụum unu dị ạmanam rꞌọlophia unu phọ ịdipho ẹnon amem.

²⁴Ariisi ọgbe ịbiakpa phọ kemuza ni, ariini ịigaany ariisi omiimogh phọ kẹepheleghian rꞌamiim rꞌạmunum-ọliv.

²⁵Mị kaḅulemi ịngo inyina ịpe epheeghu bọ sịa phọ asita igurubia ẹraal bọ ịizupha phọ anyina. Mị kụ ọdi arom bọ sita phọ iruom inyina.

²⁶Nyịidipho nyina kẹmoogh eboom ẹlo olhe, kụ ẹgbaanyan. Nyina keeseeny Ọmoogh-we Ẹnaan phọ anyina, ọpo miḍighinaan bọ inyina iikia ạraraar. We phọ ạmi kọ́ḅitonaan mun.

²⁷Pọ kụ amem dị nyina, Ịzirel, kelegheri mọ mị odianan rꞌanyina, kụ mọ mị Ọmoogh-we phọ, mị kụ Ẹnaan anyina kụ ọnon ólho. We phọ ạmi kọ́ḅitonaan mun.

²⁸“Ruukuna phọ, Uwaloor phọ ạmi kasoorom oomo awe: ạnmuny anyina rꞌạnmanyaan anyina kọkaaph ni ịpe mị agananami bọ; ikumoor awe anyina kọmalha ni rạmalha kụ ugheel ạnmuny anyina kọmiin ni uḍien.

²⁹Mem mọ ọpo phọ, Uwaloor phọ ạmi kasoorom ni ghạlamo rꞌạrebene, lephiri rꞌạnmariir.

³⁰“Mị kamitiom ni reḍeenaan ẹpe ạnyu ạke rꞌịsien ade phọ ọphurom ạruru dị aḍio phọ ạḍiphe retu: ịḅaal kezuan ni, ạnian rꞌạroko ạmughi.

³¹Erumuḍio phọ kekitonu ni eḍighi ufiri, kụ ụnwanyu phọ ạtogh ịdipho ịḅaal, kụ egbi ọteeny aḍio phọ Ọmoogh-we phọ katu bọ, ḍiboom mọ aḍio phọ ạḍiphe keḍighan bọ ni elegh.

³² Kụ ọlo oomo ạbulo ọmagh ḍien Ọmoogh-we phọ kọmoogh ni pẹleeny. Ịdipho Ọmoogh-we phọ mạḅem bọ, ‘Buniin dị odi Jeruselem kokpetenaan ni; Bụphe mị ạsaḅar bọ kosugha ni.’”