Read abua Joel 3 Bible Online

Joel 3 - abua bible

Joel 3

¹Ọmoogh-we phọ ạḅem mọ, “Mem mọ ọpo mị kaḍighi ni ịdi aJuda rꞌaJeruselem kọḅile oḍum.

²Mị kaakpomoghi oomo areelhe kụ ạpam bịdi atumom Eḍiiny Ọoruen. Sịphe kụ ẹdi mị kasoph ọoruen ạngo bịdi esi oomo ịpe bịdi moḍighi bọ we ạmi. Bịdi mophorogh we Ịzirel ọwalalami ịnon areelhe kụ ọbaayami Ịzirel, de phọ ạmi.

³Bịdi udi ẹdo olegheri ọlo kạmoogh we phọ osiphi bọ. Bịdi aal lephiri rꞌạnmanyaan ọrolomi dọl ạrebene ịlo ọkpiom ạnmariir-erelhe rꞌamiim.

⁴ “Nyina rẹwa ghan oḍighi ạmi ika, Taya, Saidon rꞌoomo areelhe aFilistia? Nyina rẹwa oḅulemian esi ịyaar ḍụghum? Pọ ịduon, mị kaagborion ni iḅulemian inyina!

⁵Nyina mẹsighe silva rꞌagol ạmi kụ ẹsighiogh eboom ẹelha phọ ạmi eḍighom ruutu iigbia phọ anyina.

⁶Nyina mẹsighiogh we aJuda rꞌaJeruselem ẹḍuanam esi dị ẹkelom ẹmha ạbidi kụ eboola we aGris.

⁷Nyịidipho mị kạsighe bịdi amiteghom riisi phọ nyina aal bọ bịdi. Mị kiḍighi inyina ịpe nyina meḍighi bọ bịdi.

⁸Mị kạḅogh ni nmụny rꞌạnmanyaan anyina ạngo we aJuda dị koboola bịdi we aSeba ẹekela ekpisi phọ. Mị Ọmoogh-we phọ mạḅem.

⁹“Igbeelom ọghaaph phọ ọphon eleenye reelhe phọ: ‘Ịnya ẹgham; Ịmagh rephelegbe-ẹgham mọ anyina; Iikpomoghi oomo awe ẹgham anyina kụ erelhe ẹghi!

¹⁰Ịgurogh sinem ạrusua phọ anyina etene isiko kụ sịleke ọsam mọ etene ịsoph. Ghạlamo bụphe ịnyaam ụ́moogh bọ bịn kobe ni.

¹¹Iigborion eru, oomo anyina areelhe phọ ekoom bọ kụ eekpomoghan sịphe Eḍiiny phọ.’” Tom ạghiom, Ọmoogh-we, we ẹgham mọ ạna ozuom bịdi.

¹²“Mọmagh ni reelhe mọ oru ọteeny Eḍiiny Ọoruen phọ. Sịphe kụ ẹdi mị Ọmoogh-we phọ kạtol ude kụ asoph ọoruen oomo areelhe phọ ekoom bọ.

¹³Bịdi ọmoogh ẹkaraph eḍighinom ịyaar; iigbo bịdi elereghi ude ịdipho ịbiakpa amem ibugha; eghum bịdi ịdipho arughuuny avain ezeghe kụ emiim tụtu amiim mamite ạapheleghian.”

¹⁴Ạsimuunir rꞌạsimuunir odiighi Eḍiiny Ọoruen. Ịsiphe kụ ẹdi aḍio Ọmoogh-we phọ kẹnuun etu.

¹⁵Erumuḍio phọ rꞌụnwanyu phọ ekitonu ni ebil, kụ ạraanaan phọ ị́muanan mun.

¹⁶Ọmoogh-we phọ odi Eegum ạZayon kụ amoogha; ẹḍogh ọdi edi sịphe Jeruselem kụ ẹḅa; ade rꞌokuaḍio epiigha. Kụ ọdi kaakpereghi ni we phọ ọdi.

¹⁷“Kụ nyina, awe Ịzirel, kegbi olegheri mọ mị kụ Ọmoogh-we Ẹnaan phọ anyina. Mị atugh sịphe Zạyon, ẹeḅaraph iigbia phọ ạmi. AJeruselem keḍighi ni ẹmha iigbia; aruuruen kọ́kpar mun ópu nyọdi.

¹⁸“Mem mọ ọpo phọ, iizo ireeny avain kụ kekpereghiom rạaḅaraph phọ, kụ kọmiin sịnam ạnyu ạtorobo eegbolom kụ amuboom ạmuum kạtol oomo asikol aJuda. Aḍikol kẹḍua Otu Ọmoogh-we phọ emite kụ eeduom mụum Eḍiiny Akasia.

¹⁹“Ijipt keten ẹdala ịisaar kụ Idom esi dị mephe, ịdi eḍighi bọ bịdi uzuom de phọ aJuda kụ ọze we phọ ạbidi dị ẹlo ọpioman ị́tol.

²⁰Mị kaḅulemian esi ạbuphe ọze bọ; Mị kạliom ni bụphe ọpioman bọ. Kụ ọlo awe kotugh ghan Juda rꞌaJeruselem kꞌagee-pọ, kụ mị Ọmoogh-we phọ kạtol sịphe ẹeḅaraph ạZayon.”