Read abua Ẹmos 1 Bible Online

Ẹmos 1 - abua bible

Ẹmos 1

¹Ịphen phọ ikpo ọnhu Ẹmos, okoriom iyool-ịga ọlo ẹmha dị oghol mọ aTekoa. Ịyal ạsia kụ iten kụ ẹteeny lhạ phọ ade phọ eḅughuronu bọ, mem dị Uzaya kụ aḍighi ọdaam aJuda kụ aJeroboam ọony aJoas kụ aḍighi ọdaam Ịzirel, Ẹnaan agananami ni oomo ạraraar phọ ịphen ịlo Ịzirel.

²Ẹmos ạḅem mọ, “Ọmoogh-we phọ ramoogha ghan ẹpe Eegum ạZayon; Ẹḍogh phọ ọdi reeka ẹpe Jeruselem. Ạraraar olhe ịnam mọ mẹgharaghar kụ ạroogho phọ Eegum ạKarmel mekitonu ẹkiakia.”

³Ọmoogh-we ạḅem mọ, “Awe ạDamaskos mọpioman kụ ọḅile ọpioman, kụ loor esi ịduon phọ mị kạkar ri ạliom bịdi. Bịdi ụmiine ni we ạGiliad rꞌogbogh ọghagh ologhi.

⁴Esi ịduon phọ mị kạlogh nịan ogiga phọ ọpo ạHazael ọdaam mọ ạlogh bọ, kụ eemor ele ruutu-ịikpo phọ ạBen Hadad ọdaam mọ.

⁵Mị kạagbighi rụnhu-aḍibuo ẹmha phọ ạDamaskos kụ mị ạsighiogh we phọ orugh bọ Eḍiiny Aven ḅịle rꞌoye ịtooghi phọ ạBet Iden. We phọ ạSiria kọsighiogh ni ịdipho awe ikoli ọkimom de aKir.”

⁶Ọmoogh-we ạḅem mọ, “Awe aGaza mọpioman kụ ọḅile ọpioman, kụ loor esi ịduon phọ mị kạkar ri ạliom bịdi. Bịdi ụkar kụ ọsighe ekpom eelhe kụ ọghi aalha we Idom ịdipho ạrebene.

⁷Kụ mị kạlogh nịan iḅidi ẹmha phọ aGaza kụ eemor elhe ruutu-ịikpo phọ.

⁸Mị kạsighiogh we ịtooghi phọ ropogh bọ rạmha phọ Ạsdod rꞌAskelon. Mị kạliom ni ẹmha phọ Ẹkron, kụ oomo phọ awe aFilistia dị osugha komuughu ni.”

⁹Ọmoogh-we ạḅem mọ, “Awe aTaya mọpioman kụ ọḅile ọpioman, kụ loor esi ịduon phọ mị kạkar ri ạliom bịdi. Bịdi ụkar kụ ọsighe ekpom eelhe kụ oseere dọl iiruen ẹpe ade phọ Idom, kụ úuko iilogh ịyo phọ bịdi kụ oghiran bọ ịlo ẹphomoghian.

¹⁰Esi ịduon phọ mị kạsu nịan iḅidi ẹmha phọ aTaya kụ eemor elhe ruutu-ịikpo phọ.”

¹¹Ọmoogh-we ạḅem mọ, “Awe Idom mọpioman kụ ọḅile ọpioman, kụ loor esi ịduon phọ mị kạkar ri ạliom bịdi. Bịdi ụtaya ni we phọ Ịzirel, abumor phọ ạbidi, kụ ụ́nma bịdi ighirigiir. Ịghagh iloghi ạbidi eekuna ị́tol kụ bịdi úmeera mọ eḍim.

¹²Esi ịduon phọ mị kạlogh nịan ẹmha phọ aTeman, kụ eemor elhe ruutu-ịikpo phọ aBozra.”

¹³Ọmoogh-we ạḅem mọ, “Awe Amon mọpioman kụ ọḅile ọpioman, kụ loor esi ịduon phọ mị kạkar ri ạliom bịdi. Esi ẹgham ọmoogh egbogh eelhe, bịdi ụphanyi ni rụkuruḅaka ạnmariir dị ọrol rꞌarughunughun ẹpe Gịliad.

¹⁴Esi ịduon phọ mị kạlogh nịan iḅidi ẹmha phọ aRaba kụ eemor elhe ruutu-ịikpo phọ. Kụ ịlooghi kẹtol ḍio ẹgham mọ, kụ elephiri phọ ẹkpar ịdipho oghim.

¹⁵Ọdaam mọ ạbidi rꞌạbuo ịtooghi phọ ọdi kokeel ẹnon ẹmha dọl iiruen.”