Read abua Ẹmos 2 Bible Online

Ẹmos 2 - abua bible

Ẹmos 2

¹Ọmoogh-we phọ ạḅem mọ, “Awe ạMoab mọpioman kụ ọḅile ọpioman, kụ loor esi ịduon phọ mị kạkar ri ạliom bịdi. Bịdi ụgilaam ni ịḅarara phọ ọdaam mọ Idom loor esi dị bịdi ụlogh ịḅarara phọ nịan kụ eemor eten ọoru.

²Mị kạlogh ni nịan de phọ ạMoab kụ eemor elhe ruutu-ịikpo phọ aKeriot. Awe phọ ạMoab komugh ni mem ọyugh ẹgham, mem dị awe ẹgham rọtaphan kụ ạrukuodu rẹḅa.

³Mị kakiigh ni oḍiemiom ạMoab rꞌoomo aruwo ẹmhu ade phọ.”

⁴Ọmoogh-we phọ ạḅem mọ, “Awe aJuda mọpioman kụ ọḅile ọpioman, kụ loor esi ịduon phọ mị kạkar ri ạliom bịdi. Bịdi moofolomi ịtughemi phọ ạmi kụ úuko ikpo ọnhu phọ mị ạḅeni bọ bịdi. Iniin phọ ịkaaneen ạrumugh phọ ạburude ạburude phọ ạbidi ọdaph bọ meḍur bịdi ẹgbole.

⁵Esi ịduon phọ mị kạlogh nịan Juda kụ eemor elhe ruutu-ịikpo phọ aJeruselem.”

⁶Ọmoogh-we phọ ạḅem mọ, “Awe phọ Ịzirel mọpioman kụ ọḅile ọpioman, kụ loor esi ịduon phọ mị kạkar ri ạliom bịdi. Bịdi robool ghan koseere dọl ạrebene igey awe dị útue ụ́kpe rụumugh dị olhe, dị útue ụ́kpe ikpoki owol okoro.

⁷Bịdi rọozeghi ni bịn we dị ịnyaam ílho rꞌạbudi oye ọloghonaan ạḍighaagh úlho, ọḅile onyu rukulom mọ ọgbole. Oye rꞌọde ọdi kụ ọḅaran roliom ẹmha ọnyani-otu bịn kụ mọopu ḍien iigbia phọ ạmi.

⁸Tọrobo esi ịiḅereghi awe phọ rọminanam ghan rukpe dị bịdi ạanyi rukulom awe dị útue ụ́kpe ọmugh phọ kụ ọsighe rukpe phọ kụ ọkpiom. Sịphe obughotu Ẹnaan phọ ạbidi kụ ẹdi rọpughol ghan rimiim dị bịdi ạanyi we dị olhe ọmugh ạbidi.

⁹“Ilegheri, weye ạmi, mọ loor ẹmhu anyina kụ ẹdi mị ạtuan kụ aphiemi we phọ Ạmorait, we dị ophoph ịdipho ọsaga kụ ọkpar ịikpo ịdipho ạsiogh.

¹⁰Mị kụ ịsighe inyina ẹpe Ijipt amitiom, ạḅile iḍiemiom inyina ẹpe ẹdala ịisaar phọ inyadi ạsia, kụ mị ịngo inyina de ạbuo Ạmorait mọ eḍighi ḍịa anyina.

¹¹Mị ụsaḅar opol ạnmuny anyina mọ oḍighi riil ḅịle rꞌabuniin ugheel ạnmuny anyina mọ oghiran ịyo rꞌỌmoogh-we. Kị́dipho ḍụghum, weye Ịzirel? Mị Ọmoogh-we phọ kụ mạḅem.

¹²Kụ ọlo nyina meḍighi ịdi ạbuen oghiran ịyo rꞌỌmoogh-we phọ mọphughologh miim, ẹḅile ẹḅeni riil phọ mọ kụ́kaaph dom mọ ạmi ụ́ḅeni we.

¹³Kụ nyịidipho mị kiwiririom inyina ạkpaariom ude, kụ nyina ẹkuph ịdipho oghuugh-ude dị adool phọ mẹphughan.

¹⁴Ghạlamo awe egbogh eghiil bịn kótue okpetenaan; awe ịikpo kodugh ni, kụ awe ẹgham kótue ọpel ghuḍum ạbidi.

¹⁵Awe ạdaph ịkpina kótue ọmerenyan, awe egbogh eghiil kótue okpetenaan kụ ạbuphe rokiilom bọ ạsu kótue ọpel ghuḍum ạbidi.

¹⁶Ḍio phọ ạḍiphe phọ, ghạlamo ọkar ikpolom awe ẹgham kotebeneghi ni rạraar ẹgham mọ ạbidi kụ osumughu.” Ọmoogh-we phọ kụ mạḅem.