Read abua Ẹmos 3 Bible Online

Ẹmos 3 - abua bible

Ẹmos 3

¹Weye Ịzirel, ịnaghanan ikpo ọnhu phọ Ọmoogh-we phọ mạḅem bọ ịkpulughiom inyina, oomo eelhe phọ ọdi ạphel bọ atene esi ịminimiin Ijipt:

²“Sịphe ogbo oomo areelhe phọ edi bọ sịen aḅirini phọ, nyina kụ awe dị mị malhegheri kụ ạḅile raako. Ịpe kụ iḍighi kụ ịkaraph phọ anyina elegheri bọ eḍigh ruugu, kụ ịdipho kụ ẹdi mị kạtuan bọ ịkaraph phọ anyina kụ ịlhiom inyina.”

³Ịyal awe koguan ni ọghi erelhe dị úguan esi dị bịdi kọḍua kụ ọki ḍụghum?

⁴Ạnam-dịka kemoogha ni ologhi ẹekpua dị ụ́miin ẹnam ạanyi ḍụghum? Ọony ạnam-dịka kạyugh ni esi amarugh ạbidi, dị ịyaar kősiph ḍụghum?

⁵Ẹnun kemeel li ḍiphil dị ịyaar ụ́kpamiom ḍụghum? Aḍiphil kẹkpatanu ni bịn dị ịyaar ítir ḍụghum?

⁶Ọkuodu ẹgham kạḅa ni ẹmha dị awe phọ kọ́moogh oghiilaan ḍụghum? Ịiḅaghami kemite ni ẹmha dị Ọmoogh-we phọ kútom ḍụghum?

⁷Ọmoogh-we Oomo Ịikpo phọ káḍighi ịyaar dị igbiighi phọ ọdi kágananami aḍeenaan butelhedom mọ ọdi, riil phọ.

⁸Mem dị ạnam-dịka mamoogha, ạnhian kụ ẹdi kạ́moogh oghiilaan. Mem dị Ọmoogh-we Oomo Ịikpo phọ mạḅa, ạnhian kụ ẹdi kápiigha ogbeel adom mọ?

⁹Gbeel ạḅeni we phọ orughogh bọ ruutu ạbudaam mọ Ijipt rꞌẠsdod: “Iikpomoghan ẹpe ạraaḅaraph phọ ekoom bọ Sameria, kụ ẹmiin igbogh ịgbaragbara rꞌịkaraph phọ roḍighi bọ ẹpe.”

¹⁰Ọmoogh-we phọ ạḅem mọ, “Awe phọ ạbuen phọ omuzeḍi ruutu ạbidi rꞌạraraar dị ọmoogh reten ẹekpara ekpeḍien rꞌoḍighi ịkaraph. Bịdi úlegheri ọgba igey.

¹¹Esi ịphen phọ, ạmulogh-ḍien kokoonyom ni de phọ ạbidi, apiemi ephighiom ịikpo phọ ạbidi kụ aagulemi ruutu phọ ạbidi.”

¹²Ọmoogh-we phọ ạḅem mọ, “Ịdipho okoriom iyool-ịga kạapoghion bọ ni eeni ịyal aruwol mꞌoniin aḅeri oyool-ọga dị ạnam-dịka mạsighe bịn, ịduon kụ ẹdi ịyal-ikpo awe bịn kụ kosugha esi awe aSameria, bụen phọ nyịidipho ọbeḍeghian bọ esi igbogh ạsigada.

¹³Ịnaghan nyịidipho kụ ẹphur rụru, nmụny ạnmuny ạJekob,” Ọmoogh-we Egbogh Ẹnaan Oomo Ịikpo phọ kụ ạḅem.

¹⁴“Ḍio phọ mị kạliom bọ we phọ Ịzirel ịlo ịkaraph phọ ạbidi, mị kapiemi ni rạgbanaghi ạrikia phọ ạBetel. Oomo ạrughulukul ạtorobo ọgbanaghi keḅomoghian ni emeel ude.

¹⁵Mị kapiemi ni ruutu aghozogh rꞌaruutu arunu. Aruutu phọ ọmaar bọ kụ ọdamaghiom ịdu ạruuma kemeel li kụ eetughuḍian; tọrobo ogbogh otu koogulemi ni.”