Read abua Ẹmos 6 Bible Online

Ẹmos 6 - abua bible

Ẹmos 6

¹Pọ eeghe ịminimiin dị kịrolonaan inyina phọ edimom bọ dọl ẹereegh ẹpe Zạyon, ḅịle rꞌanyina phọ ẹḅem bọ mọ ịiḅaghami ílho ẹpe Sameria — nyina igbogh awe egbogh eelhe phọ ẹphen Ịzirel, nyina phọ ạbuen phọ awe phọ oḍuom bọ ologhi esi ọloghonaan ạḍighaagh!

²Ịki ẹmiin ẹmha phọ aKalne, kụ ẹḅile ẹghi egbogh ẹmha phọ ạHamat, kụ ẹḅile ẹghi ẹpe Gạt ẹpe eelhe phọ aFilistia. Bịdi ụnighe ni opu reelhe phọ aJuda rꞌỊzirel ḍụghum? Ade phọ ạbidi ịbugh ni epu ḍịa anyina ḍụghum?

³Nyina ítue ímeeraam mọ aḍio ịiḅaghami retu ni; kụ ọlo oomo ịlo nyina eḍighi rẹloghonaan ghan ḍịghaagh oosulemi aḍio phọ.

⁴Pọ eeghe ịminimiin dị kịrolonaan inyina phọ ạbuphe ọmaar bọ rọbedeghian esi igbogh ạsigada, role malhe kạa ẹnam oophoony ọony ạnam rꞌọony oyool-ọga.

⁵Ịḅeeraan ni inyina ọloghoḍi ạsuor, ịdipho aDevid ạloghoḍi ghan bọ, kụ ọmoor rꞌiitia.

⁶Nyina remuzeḍi ghan miim tọbili atum tọbili kụ kẹphughol, kẹḅile egbula igbogh arolo eeḅi eḍu, kụ ọlo nyina ị́mooghom okururu esi amuphe phọ Ịzirel.

⁷Esi ịduon phọ, nyina kụ keḍighi bụḅel ọghi ẹnon eelhe ọmiinom dọl iiruen. Ạrayaal rꞌamalhe phọ anyina kasi eekuna.

⁸Ọmoogh-we Egbogh Ẹnaan Oomo Ịikpo phọ kụ rạngo ọphur ạruru phọ ọphon mọ, “Iḅo-igbogh awe phọ Ịzirel ikia ni ịmi iboom; mị akel li igbogh aruutu phọ ạbidi. Mị kạḅogh ni ẹkpana ẹmha phọ ạbidi rꞌoomo ạraraar phọ edi bọ ologhi phọ ạngo bụo ẹpomoghian phọ.”

⁹Mụghumo ḍioph awe bịn kụ usugha eghunotu, pọ bịdi komuughu ni.

¹⁰Umor ọpo amugh bọ, nyọpo ạmoogh bọ maḍi phọ, kạsighe oḍim mọ sịphe ologhi otu phọ amitiom, kụ umor phọ ạmagh tọrobo oye lọ asugha sịphe otu phọ mọ, “Oye odi ẹpe rꞌạna?” Ẹḍogh kẹpagharanaan ni mọ, “Eeye!” Kụ umor phọ ạḅem mọ, “Ḅoorian sịphe! Yira ogona loor ghạlamo rꞌaḍien Ọmoogh-we phọ bịn kúkol.”

¹¹Mem dị Ọmoogh-we phọ kụ mạḅa ẹḍogh-adom, koogulemi ni ruutu, ịbam rꞌigbogh.

¹²Ạrusu rekiil ghan ni ạnyu asighiigh ḍụghum? Awe rọsighe ghan ni sịnam arukumuan koḍighinom oḍighi ozo ọphiiny ḍụghum? Kụ ọlo nyina mẹsighe ịiruen dị esel etene ịyaar olhe-omugh, kụ ẹḅile ẹsighe elhiom etene ọpioman.

¹³Nyina iituma ịlo eeghian ọsighe ẹmha phọ ạLodebar! Nyina eetuma mọ, “Yoor ụmoogh ni ịnyaam iboom kụ ọsighe bọ Kanaim.”

¹⁴Ọmoogh-we Ẹnaan Oomo Ịikpo phọ rꞌaloor ạḅem mọ, “Weye Ịzirel, mị katom ruuruen awe ẹgham oru orugh eelhe phọ anyina. Bịdi kịkpiloghom ni inyina emiigh kꞌẹpe Eḍighom ạHamat ẹpe ephunom mọ ẹghi esi Eḍiiny Araba ẹpe esoorom mọ.”