Read abua Ẹmos 7 Bible Online

Ẹmos 7 - abua bible

Ẹmos 7

¹Mị ụmiin ni ịmiin dị Ọmoogh-we Oomo Ịikpo phọ uḍeenaan ịmi. Mị ụmiin ịdi ọdi ạlhem ọoloogh igurubia mem dị mogbo bin ạroogho dị ịnam ọdaam mọ rẹḅal ịḅal, kụ ạroogho phọ mạḅile rasiighi.

²Sịphe ịmiin phọ ạmi, mị ụmiin igurubia phọ dị elhe ẹmadan oomo ạroogho dị ạrol sịphe ade phọ, kụ mị ạḅem mọ, “Ọmoogh-we Oomo Ịikpo, sạr ạwilenaan we phọ ạna. Bịdi koḍum bọ ika? Bịdi okom ni kụ ọḅile odugh!”

³Ọmoogh-we phọ anme ni ologhi phọ ọdi kụ ạḅem mọ, “Ịphen nạ ạmiin bọ kémite.”

⁴Ọmoogh-we Oomo Ịikpo phọ ạḅile ni uḍeenaan ịmi ịmiin. Nyẹen, mị ụmiin dị odi raakolobian ọlhiom awe phọ ọdi rꞌạnian. Ạnian phọ ilhe ni ogbogh ọphiiny phọ odi bọ eeḍian ade phọ, kụ emiigh olhe oomo ade phọ.

⁵Kụ mị ạḅem mọ, “Bịle, Ọmoogh-we Ẹnaan. Ika kụ ẹdi awe phọ ạna koḍum bọ? Bịdi okom ni kụ ọḅile odugh!”

⁶Ọmoogh-we phọ ạḅile kẹn ni anme ologhi phọ ọdi kụ ạḅem mọ, “Ịphen phọ kẹn ni kémite.”

⁷Ọmoogh-we phọ ạḅile ni uḍeenaan ịmi uḍien. Nyẹen, mị ụmiin dị ọdi ạmeera ọgbal iikpe dị ọsighe okuron-oolemiom kụ ọloghom, kụ okuron-oolemiom ạrol li ḍịghaagh ọdi.

⁸Ọdi upuru ni ịmi mọ, “Ẹmos, nạ ạmiin eeghe?” Mị ụphagharanaan mọ, “Okuron-oolemiom.” Kụ ọdi agbi ọḅem mọ, “Mị ạsighe ịyaar phọ ẹphen kụ raḍighinom ịlo oḍeenaan mọ awe phọ ạmi ọkigh iikpe dị íileeny. Kụ mị kánme mun ologhi ạmi esi ọliom ạbidi.

⁹Ariisi phọ ạnmuny ạnmuny phọ Ạizik ọghi ghan bọ ịiḅereghi, kopiemi ni. Ariisi iigbia phọ Ịzirel koogulemi ni. Mị kakureri oḍigh ạgada ọda-eelhe phọ esi aJeroboam ọdaam mọ.”

¹⁰Amazaya oyil ạrikia phọ ạBetel arom ni dom iphiligba ạghiom Jeroboam ọdaam mọ Ịzirel mọ: “Ẹmos ramitenom ni nyịna ẹkaraph ezue igbo awe phọ. Ikpo ọnhu phọ ọdi kepiemi ni eelhe phọ.

¹¹Ịphen kụ ịdi ọdi ạḅem mọ: ‘Kokiigh ni Jeroboam mem ẹgham, kụ kọsighe ni we phọ Ịzirel sịen ade phọ kụ okeelom ẹnon eelhe ọmiinom ạdol iiruen.’”

¹²Pọ kụ amem dị Amazaya ạḅeni Ẹmos mọ, “Mẹkasian ni, oyil! Ḅula ẹpe Juda kụ ạmiin ịmiin ạna. Bịdi ọkpe nyịna ikpoki esi ịmiin phọ.

¹³Kạ́miin mun ẹphen Bẹtel. Ẹphen kụ ẹmha dị ọdaam mọ rạpam ghan ịiḅereghi sịphe ogbogh obughotu eelhe phọ.”

¹⁴Ẹmos ạphagharanaan mọ, “Mị kọ́do phọ oyil phọ ọpo rạmiin ghan bọ ịmiin ikpoki. Mị otelhiom ịnam, kụ mị ạḅile aḍighi oye dị raakonom ghan ireeny ạfig.

¹⁵Kụ Ọmoogh-we phọ kụ ụsighe ịmi ẹpe oḍighi okoriom iyool-ịga phọ kụ ụḅeni ịmi oru ọghaaph ghan ịpe ọdi agananami bọ ọḅeni awe phọ ọdi Ịzirel.

¹⁶Kụ nyịidipho ịnaghanan ịdi Ọmoogh-we phọ ạḅem. Nyina rịḅeni ghan ịmi mọ mị kụ́kaaph mun, ụ́ḅile mun ụ́looghiom we phọ Ịzirel.

¹⁷Kụ iḍighi kụ Ọmoogh-we phọ ạḅeni nyịna Amazaya mọ, ‘Ạnir ạna kaḍighi oliom-ẹmha ẹpe areten phọ, kụ nmụny ạna kọze ẹgham, de phọ ạna kodiighi ni kụ ọngo bụnon awe, kụ nạ rꞌaloor ạna kamugh eelhe dị Ẹnaan úlegheri. Kụ kọsighe ni we phọ Ịzirel sịen ade phọ ạbidi kụ okeelom ẹnon eelhe ọmiinom ạdol iiruen.’”