Read abua Obadaya 1 Bible Online

Obadaya 1 - abua bible

Obadaya 1

¹Ịphen kụ ịmiin Obadaya — ịpe Ọmoogh-we Oomo Ịikpo phọ ạḅem bọ ịlo eelhe phọ Idom. Ọmoogh-we phọ marom otelhedom ọdi ạkiom reelhe phọ, kụ yoor mọnaghan ni dom mọ ọdi: “Iikolobian ọghi ee ẹgham rꞌIdom!”

²Ọmoogh-we phọ ạḅeni ịduon Idom mọ, “Mị kadughe ni nyịna; kụ tọrobo oye aghel nyịna.

³Ologhoma igbogh phọ mebi nyịna. Ẹkpana ẹmha phọ ạna eḍighi ẹmha dị asighiigh kụ ẹpham; Amarugh phọ ạna odi ẹpe ạnyu aruugum mọ kụ ẹdi nạ rapuruan ghan bọ loor mọ, ‘Ạnhian nụun kụ katue bọ ụpham ịmi asoore?’

⁴Ghạlamo nạ ụlogh marugh phọ ạna ẹpe ẹkel ạnyu, esi dị uga rạlogh ghan bọ otu ọdi kụ ẹghigh mụdi edi igbo ạraanaan, mị kạpham ni nyịna asoore ude.

⁵“Mem dị ạruḅa oru ḍughul, bịdi romi ghan ịyaar lọ bịdi ọwa bịn. Mem dị awe rọku iimuma avain, bịdi rosugheeny ghan ni ẹphurukpu. Kụ ạmulogh-ḍien phọ anyina miikpolion inyina bịn ẹman.

⁶Nmụny ạnmuny Ịso, ruphua phọ anyina mowum.

⁷Awe ạmuḅoph phọ anyina mibi inyina; bịdi miphorogh inyina sịphe eelhe phọ anyina. Awe dị rꞌanyina ẹrolan ghan rꞌẹepho mọkpar ipu inyina nyịidipho. Ạrighiri dị rꞌanyina elhian ghan eḍien mịkpaminaan inyina siphil; bịdi rọkaaph ghan ịlo anyina mọ, ‘Odi ẹghen oomo olegheri-ịyaar phọ bịdi ọmoogh bọ?’

⁸“Ḍio phọ ạḍiphe mị kạliom bọ Idom, Mị kapiemi ni we olegheri-ịyaar phọ ạbidi kụ aagulemi oomo olegheri-ịyaar phọ ạbidi.

⁹Arephelegbe ẹgham mọ aTeman kọmoogh ni oghiilaan, kụ tọrobo oye ẹgham Idom, kokiigh ni.

¹⁰“Ụtuan dị nyina ẹkaaghi ruutu, ẹze bumor phọ anyina oḍighi bọ ẹemara ẹemara phọ ạJekob, kiphiemi ni inyina osiphiom umugholoor kꞌagee-pọ.

¹¹Nyina ịngo ọgel ḍio phọ ạḍiphe mem mọ ạbumulogh-ḍien robonyon bọ rụnhu-aḍibuo phọ ạbidi. Nyina ebeeph ịdipho aruuruen phọ owum bọ ẹelha phọ aJeruselem odianagh.

¹²Ị́nighe ịduon nyina ẹnughe bọ ẹka muphe abumor phọ anyina ẹpe Juda. Ị́nighe ịduon nyina ẹḅaal bọ iloghi ḍio phọ ạmuphe phọ ameelom bọ bịdi. Ị́nighe ịduon nyina ẹmilogh bọ bịdi mem ọto.

¹³Ị́nighe ịduon nyina eḍigh bọ ẹmha awe phọ ạmi oboh iboh mem ọmiinom ạbidi ḅịle rꞌọsighiogh aruphua ạbidi ḍio dị ịiḅaghami emitenaan bịdi.

¹⁴Ị́nighe ịduon nyina ẹmeera bọ ịgbaranuom areten phọ osiphi ạbulo rosumughu. Ị́nighe ịduon nyina ẹḅogh bọ bịdi ẹngo ẹpomoghian phọ ḍio dị ịiḅaghami emitenaan bịdi.

¹⁵“Aḍio phọ meesulom dị mị Ọmoogh-we phọ kaagboonaan ịiruen reelhe phọ. Idom, ịpe nyina meḍighi bọ kiḍighi aani ni inyina. Ịpe nyina mẹngo bọ, nyina kẹḅile ni ẹmoogh aani.

¹⁶Awe ạmi mọphughol mọgo eghiḍim esi ạmalhiom ạnyu eegbolom iigbia ạmi. Kụ ọlo oomo areelhe phọ ekoom bọ kọpugholom ni ọnon ọdo ạmogo egbogh eghiḍim ạmalhiom; Bịdi kọpughol li kụ oomo phọ ạbidi opeeghu.

¹⁷“Kụ ọlo, ẹpe Eegbolom ạZayon, opol kokpetenaan ni kụ eegbolom mọ eḍighi esi ạdol iigbia. Awe phọ ạJekob kọmoogh ni de phọ ạbidi esi ariliom.

¹⁸Awe phọ ạJekob rꞌawe phọ ạJosef kọkigh nịan; bịdi kopiemi ni we Ịso ịdipho ạnian rele ghan bọ ịzeghe phọ. Rꞌoniin ọony ọony Ịso kásugha. Mị Ọmoogh-we phọ kụ ạḅem.

¹⁹“Awe dị kọḍua esoorom aJuda kụ kotugh Idom; ạbudi kọḍua ẹpe erumuḍio phọ remeel ghan bọ eeḍian aroogbolom mọ kụ kobianan ọsighe Filistia. Awe Ịzirel kụ kọmoogh eelhe phọ ẹpe Ifraim rꞌaSameria; awe ạBenjamin kụ kọsighe Gịliad.

²⁰Ạbuo ẹgham dị ọḍua ẹpe ephunom mọ Ịzirel kụ ọghi ẹnon eelhe ọmiinom dọl iiruen kotigheel kụ ọkpar opu we aFinisia kꞌẹpe ephunom mọ ẹlo ạZarefat. Ạbudi ọḍua bọ Jeruselem kụ odi ẹpe Sạadis rọmiinom dọl iiruen kụ kọkpar opu kụ ọsighiogh rạmha ẹpe esoorom mọ aJuda.

²¹Awe aJeruselem, bụphe mọkpar bọ opu, kozuom Idom ẹgham, kụ bịdi kụ ọpam ịtooghi esi ạbidi. Kụ Ọmoogh-we phọ rꞌaloor ọdi kụ kaḍighi ọdaam.”