Read abua Jona 4 Bible Online

Jona 4 - abua bible

Jona 4

¹Ịphen phọ ị́ḅeeraan Jona rꞌẹnum kụ ọdi ạghagh ologhi.

²Kụ ọdi ạaḅereghi mọ, “Ọmoogh-we, mịna ụ́ḅem ḍien mem mọ mị rạḍua bọ ẹmha phọ mọ ịphen phọ kụ ịdi nạ kaḍighi? Ịdipho kụ iḍighi bọ ịyaar phọ mị aghiil bọ ogheel aSpen! Mị alegheri ni mọ nạ Ẹnaan ẹphomoghian rꞌọkparam rꞌọnma ighirigiir dị ạnya, oomo amem, katue ni anme ologhi ạna ạḅile ạbilenaan mạlhiom.

³Nyịidipho, Ọmoogh-we, bịle mị umugh. Kịnighenaan ịmi omugh rꞌọrol eye.”

⁴Ọmoogh-we phọ ạphagharanaan mọ, “Eeghe ọdo ariliom kụ edianaan nyịna ọghagh ologhi?”

⁵AJona ạghi ni ạga ẹmha phọ ẹpe erumuḍio phọ remite ghan bọ kụ ạrol ude. Ọdi ạlogh ni esi oghoph kụ ạrol eeḍian phọ, ọdi ạrol okori ịdi kemitenaan Nineve.

⁶Kụ Ọmoogh-we Ẹnaan phọ aḍighi ịdi ẹezupha ephoph ẹngo oghoph Jona, pịdi aJona ạmoogh ọḅaal ologhi. Ẹezupha phọ ẹpe phọ ịḅaal ologhi aJona iboom.

⁷Kụ eḅon ạḍiroor ẹpheri phọ aḍio phọ, esi ikpo ọnhu Ẹnaan phọ, ạḍileegbem ẹghi elhe ẹezupha phọ kụ ẹgharaghar emugh.

⁸Kụ mem dị ọmu mamite, Ẹnaan irom ni ọghologhol ookuugh dị ạḍua ẹpe erumuḍio phọ remite ghan bọ kụ aru, kụ aJona ạwa ọghaaru loor ẹghologhol ọmu phọ rạgur bọ ẹmhu phọ ọdi. Kụ ọdi ạwa mọ ọbo ọno amugh. Kụ ọdi ạḅem mọ, “Ịḅeeraan ịmi omugh epu ọrol eye.”

⁹Kụ Ẹnaan ẹḅeni nyọdi mọ, “Eeghe ọdo ariliom kụ edianaan nyịna ọghagh ologhi ịlo ẹezupha phọ?” AJona ạphagharanaan mọ, “Mị ạmoogh ni riliom ophin ologhi — ophin ologhi dị ạkpe omughom!”

¹⁰Pọ kụ amem dị Ọmoogh-we phọ ạḅeni nyọdi mọ, “Ẹezupha phọ ẹphen iphoph ḍughul kụ ephe; nạ óḍighinaan ịyaar ẹezupha phọ, kụ nạ kụ óḍighi ịdi ephoph bọ — kụ nạ ạmoogh ni ọnmaanaan ighirigiir!

¹¹Kịom nụun ologhi ịdi mị ạḅile ạmoogh ighirigiir esi awe phọ aNineve, egbogh ẹmha phọ ẹpe. Ghạlamo rꞌịduon phọ bịn, sịphe ẹmha phọ odi ni oniin okuron rꞌịyaldi ọonir ịbam ạnmuny dị ịkaraph úlegheri ḅịle rꞌọoloogh ịnam!”