Read abua Igbiighi 1 Bible Online

Igbiighi 1 - abua bible

Igbiighi 1

¹Ḍịḅel aḍio omuneniom ịyal ụnwanyu esi ạlha dị emuneniom ịyal dị awe phọ Ịzirel mọḍua bọ ẹpe eelhe phọ Ijipt, ḍịḅel aḍughul-otu ịyal ụnwanyu ạlha phọ, aMozis odi sịphe ẹdala phọ aSainai sịphe Ogbogo Ạdol Ọmoogh-we phọ kụ ọdi ạghaaph ạḅeni nyọdi mọ,

²“Nạ rꞌEeron igbi oomo aḍita awe phọ Ịzirel, bụo ọto rꞌopolo kꞌạburude phọ ạbidi, elegheri ọnhu ịlo bịdi ọman, ẹge siḍien ạbidi, oye rꞌoye,

³emiigh bụlo mọman ịyaldi ạsia kụ ẹghiom risigh, bụlo mọmanam ọghi ẹgham sịphe Ịzirel, oki atum oki.

⁴Eghun eghun, oye oye kụ ọḅaram rꞌanyina, oye lọ aru uwo ẹmhu sịphe ọto phọ ạbidi.”

⁵Bụen kụ ạbudi mọmaaghi bọ omitiom sịphe ogbo aḍita ịsiphe arughunughun phọ Ịzirel ịlo oḍighi phọ ọphon: [Eghun] — [Uwo ẹmhu ọto] Ruben — Elizur ọony phọ aSedeur Sịmion — Sẹlumiel ọony phọ aZurisadai Juda — Nason ọony phọ Ạminadab Ịsaka — Nẹtanel ọony phọ aZuar Zẹbiulon — Eliab ọony phọ aHelon Ifraim — Elisama ọony phọ Amihud Mạnase — Gạmaliel ọony phọ aPedazur Bẹnjamin — Abidan ọony phọ aGidioni Dạn — Ahiezer ọony phọ Amisadai Ạser — Pạgiel ọony phọ Ọkran Gạd — Eliasaf ọony phọ ạDeyel Nạftalai — Ahira ọony phọ Enan

¹⁷AMozis rꞌEeron ọsighe we phọ ạbuen phọ ọgo bọ siḍien ạbidi.

¹⁸Kụ ḍịḅel aḍughul-otu ịyal ụnwanyu phọ, kụ bịdi ookpomoghi oomo aḍita awe phọ egina esi, kụ ọgeeghian siḍien ạbidi bụo ọto rꞌopolo, bụo ọto rꞌọto kꞌạburude phọ ạbidi. Ọdaph ọnhu asiḍien phọ ogbi bụo mọman ịyaldi ạsia kụ ọghiom risigh.

¹⁹AMozis ạtuugh ịdipho Ọmoogh-we phọ ạghaaph bọ ạḅeni nyọdi agbi we phọ ẹpe Ẹdala aSainai.

²⁰Awe phọ ogbi bọ omitiom bụo ọto rꞌopolo, ọto rꞌọto kꞌạburude phọ ạbidi, bụlo mọman ịyaldi ạsia kụ ọghiom risigh, tọrobo oye lọ mạmanam ọghi ẹgham, emiigh kꞌeghun phọ aRuben ọkpana ọony phọ ạJekob: [Eghun] — [Ọnhu] Ruben — 46,500 Sịmion — 59,300 Gạd — 45,650 Juda — 74,600 Ịsaka — 54,400 Zẹbiulon — 57,400 Ifraim — 40,500 Mạnase — 32,200 Bẹnjamin — 35,400 Dạn — 62,700 Ạser — 41,500 Nạftalai — 53,400 — 603,550

⁴⁷Eghun phọ aLivai, ọto rꞌopolo, ọto rꞌọto kꞌạburude phọ ạbidi, úgbiom aani,

⁴⁸loor esi dị Ọmoogh-we phọ ạḅeni Mozis mọ,

⁴⁹“Kạ́ḅaram eghun phọ aLivai ágbiom aani sịphe awe phọ Ịzirel.

⁵⁰Sịghe bịdi aseere sịphe Ogbogo Ạdol phọ ạmi, bịdi ophogh ghan oomo ạraraar phọ edi bọ sịphe Ogbogo phọ rꞌoomo ạraraar iiḍighi phọ eru bọ ịlo ịsiphe. Bịdi okumuan ghan rukumuan ịsiphe Ogbogo phọ; bịdi orugh okoom Ogbogo phọ.

⁵¹Kụ mem lọ kopoophe Ogbogo phọ ọḍuanam, bụo kꞌaLivai kụ ọsighe ghan oseere ude, kụ mem lọ kọmeremi Ogbogo phọ, bụo kꞌaLivai kụ ogim ghan ọmeremi. Kụ oopho oye kụ ạghi atuman sịphe phọ, pọ ikiigh oye phọ ọpo.

⁵²Awe phọ Ịzirel odoghoḍi rugbogo phọ ịpe ạbidi; bụo ẹku rꞌẹku, uwo ogbogo rꞌogbogo ọdi, oye ye ạlogh ịpe ẹḅeeraan bọ nyọdi.

⁵³Kụ bụo kꞌaLivai orugh okoom Ogbogo phọ ạraraar ọghiom ologhi phọ, ọbo ọgbaragbara kạtol ghan bọ ogbo awe Ịzirel. Bụo kꞌaLivai kụ ạbudi ophogh ghan Ogbogo phọ.”

⁵⁴Oomo phọ ịpe Ọmoogh-we phọ ạto bọ ạḅeni Mozis kụ ịdi awe phọ Ịzirel ọtuugh ghan oḍighi.