Read abua Igbiighi 10 Bible Online

Igbiighi 10 - abua bible

Igbiighi 10

¹Ọmoogh-we phọ ạto ạḅeni Mozis mọ,

²“Sịghe silva ạlemom ịyal ạrukuodu; ạmaar ạgbe ạzeghe kụ ạsighe ạlemom. Nạ kạsighe ghan rụkuodu phọ ịphen kụ agbologhom ghan ḍita awe phọ Ịzirel, ḅịle rꞌamem lọ kọḍua sịphe arugbogo phọ omiigh erelhe.

³Tọrobo amem lọ nạ aphula ịyal phọ ịdi ạdoonye, pọ oomo aḍita awe phọ Ịzirel ookpomoghan ghan esi ạna sịphe ọnhu-aḍibuo Ogbogo Ạdol phọ ạmi.

⁴Eru mạar dị ophula nyoniin bịn, pọ bụo ịtooghi phọ rꞌikumoor awe aropolo phọ kụ ookpomoghan ghan esi ạna.

⁵Eru mạar dị nạ aphulaam rụkuodu phọ rꞌịnyaam akpere, pọ bụphe orugh bọ sịphe arugbogo phọ ẹpe erumuḍio phọ remite ghan bọ oḅerenu omiigh erelhe.

⁶Kụ nạ aphula amuneni ịyal amem rꞌịnyaam akpere, pọ bụphe orugh bọ ḍịghaagh esoorom mọ oḅerenu omiigh erelhe. Nạ kapula ghan ephulaam mọ ẹphen tọrobo amem lọ mẹteeny oḅetenu erelhe.

⁷Tọrobo amem lọ nạ rạwa mọ awe phọ ookpomoghan nạ kapulaam ghan rꞌịnyaam ạdoonye.

⁸Ạnmuny phọ Eeron, ariil ạrikia phọ, kụ kopula ghan rụkuodu phọ ịphen. “Ạrukuodu phọ ịphen kịrolonaan ni inyina oghiil atum oghiil.

⁹Tọrobo amem lọ nyina ẹdi sịphe ade phọ anyina kụ ạbumulogh-ḍien moru ozuom anyina ẹgham, nyina kepulaam ghan rụkuodu phọ rꞌịnyaam. Pọ kụ amem dị Ọmoogh-we Ẹnaan phọ anyina kịitughian inyina, ịphel inyina ạsighe esi ạbumulogh-ḍien phọ anyina.

¹⁰Tọrobo aḍio lọ nyina ẹmoogh ọḅaal ologhi, mꞌaḍio ẹyaal mꞌạḍiḅel aḍio ụnwanyu, ipula ghan rụkuodu phọ ịphen ẹphinyon rạraar aghuḍum rꞌạrikia ẹboroph phọ anyina. Ịphen phọ eḍighi ghan rạraar dị nyina kẹsighe ghan kụ ẹetughianam Ọmoogh-we Ẹnaan phọ anyina.”

¹¹Omuneniom ịyaldi aḍio omuneniom ịyal ụnwanyu esi ạlha dị emuneniom ịyal dị awe phọ mọḍua bọ Ijipt kụ ẹdi ọsighe bọ ọotu phọ sịphe Ogbogo Ạdol Ọmoogh-we phọ.

¹²Kụ awe phọ Ịzirel ọḍua sịphe Ẹdala aSainai omiigh erelhe. Kụ rosi ẹpe ẹdala phọ ạParan kụ ọotu phọ azinian.

¹³Bịdi omiigh ogiriph ọghi ịlo aMozis ạḅem dị emeeraam ịto Ọmoogh-we phọ.

¹⁴Ạbuḅel ạbudi komiighom bọ erelhe phọ, bụphe rọdaph ghan lạgba eghun phọ aJuda, bụo ẹkpigh rꞌẹkpigh, kụ uwo ẹmhu phọ ạbidi aNason ọony phọ Ạminadab.

¹⁵Uw-ẹmhu eghun phọ Ịsaka, ạNetanel ọony phọ aZuar.

¹⁶Uw-ẹmhu eghun phọ ạZebiulon, Eliab ọony phọ aHelon.

¹⁷Rozughuron bọ Ogbogo phọ roseere ude kụ bụo ọto phọ aGerson rꞌạbuo ọto phọ aMerari kụ ọsighe ghan Ogbogo phọ orool kụ oḅetenu omiigh erelhe.

¹⁸Bụdi otum pạ, bụphe rọdaph ghan lạgba eghun phọ aRuben, bụo ẹkpigh rꞌẹkpigh, kụ uwo ẹmhu phọ ạbidi Elizur ọony aSedeur.

¹⁹Uw-ẹmhu eghun phọ ạSimion, ạSelumiel ọony phọ aZurisadai.

²⁰Uw-ẹmhu eghun phọ ạGad, Eliasaf ọony phọ ạDeyel.

²¹Sịphe eghun phọ aLivai ọto phọ aKohat oḅetenu orool rạraar iigbia phọ omiigh erelhe. Bụphe oḍiemiom bọ bịdi mọmeremi Ogbogo phọ rokoriom ghan bịdi.

²²Bụdi otumeriom, bụphe rọdaph ghan lạgba eghun phọ Ifraim, bụo ẹkpigh rꞌẹkpigh, kụ uwo ẹmhu phọ ạbidi Elisama ọony phọ Amihud.

²³Sịphe eghun phọ ạManase uwo ẹmhu ạGamaliel ọony phọ aPedazur.

²⁴Sịphe eghun phọ ạBenjamin uwo ẹmhu Abidan ọony phọ aGidioni.

²⁵Bụdi odi ghan ọman oomo ạriikpigh phọ, bụphe rọdaph ghan lạgba eghun phọ ạDan, bụo ẹkpigh rꞌẹkpigh, kụ uwo ẹmhu phọ ạbidi Ahiezer ọony phọ Amisadai.

²⁶Sịphe eghun phọ Ạser uwo ẹmhu ạPagiel ọony phọ Ọkran.

²⁷Sịphe eghun phọ ạNaftalai uwo ẹmhu Ahira ọony phọ Enan.

²⁸Ịduon kụ ịdi arughunughun phọ Ịzirel otelhe ghan, bụo ẹkpigh rꞌẹkpigh, mem lọ bịdi oḅetenu erelhe.

²⁹Kụ aMozis ạḅeni Hobab ọony phọ aJetro ọlo ạMidia phọ ọde ạnir phọ ọdi mọ, “Yoor mọnyaaghian ọghi esi phọ Ọmoogh-we phọ kịngo bọ iyoor. Ọdi maguanaan ọngo Ịzirel eboom ẹeḍiom. Tue rụdaph iyoor. Yoor kodi ni ẹelha phọ ọngo aani nyịna.”

³⁰Kụ aHobab ạphagharanaan kụ ạḅeni nyọdi mọ, “Mị inyina rị́daph. Mị kakeel ọkar ade phọ ụmar bọ ịmi.”

³¹Kụ aMozis ạḅeni nyọdi mọ, “Seseeny, iyoor kụ́wile. Nạ alegheri riisi lọ yoor kodoghoḍi rugbogo ẹpe ẹdala phọ, kụ nạ kụ kaḍighi ekpeḍien ayoor.

³²Kụ eru mạar dị nạ ụdaph ni iyoor, pọ tọrobo iiḅi phọ ịpe Ọmoogh-we phọ kuḍighi bọ iyoor, ịpe phọ kụ ịdi kọtuugh ni oḍighi aani nyịna.”

³³Kụ bịdi ọḍua sịphe Sainai eegum Ọmoogh-we phọ kụ orelhe ịraar aḍughul-otu. Igbe Ịyo phọ Ọmoogh-we phọ kụ iḍiemiom bịdi erelhe ịraar aḍughul-otu phọ, ọwa esi lọ bịdi kọtol kụ opooghian.

³⁴Kụ ọotu phọ Ọmoogh-we phọ ạrolonaan ghan ni bịdi ootaany tọrobo amem lọ bịdi ọḍua sịphe arugbogo phọ rọki.

³⁵Tọrobo amem lọ Igbe Ịyo phọ eḅetenu, aMozis ạmagh ghan ạḅeni mọ, “Ḅetenu, Ọmoogh-we, wạlalami bụmulogh-ḍien phọ kụ aphorogh bụphe ọlogh bọ nyịna.”

³⁶Kụ tọrobo amem lọ ẹdi ezinian, ọdi ạḅem ghan mọ, “Ḅula, Ọmoogh-we ạteeny sịmuunir arughunotu phọ Ịzirel.”