Read abua Igbiighi 12 Bible Online

Igbiighi 12 - abua bible

Igbiighi 12

¹AMozis maphin ạnir ọlo Ẹtiopia kụ ạMiriam rꞌEeron ọḍagha nyọdi mọ ạtuan eeghe.

²Bịdi ọḅem ghan mọ, “Agey ni, ọghaaph Ọmoogh-we phọ rạḍua ghan loor aMozis bịn kụ karu? Rạ́ḍua aani ghan esi ayoor kamite ḍụghum?” Kụ Ọmoogh-we phọ ạnaghan ịphen bịdi ọḅem ghan bọ.

³(AMozis oye ophooph ologhi. Ophooph ologhi ọlo ọdi apu ọlo oomo awe ịsien aḅirini phọ.)

⁴Ekperenom bịn Ọmoogh-we phọ ạḅeni Mozis rꞌEeron rꞌạMiriam mọ, “Mị rạwa dị ịraar phọ anyina kemite etu Ogbogo Ạdol phọ ạmi.” Kụ ịraar phọ ạbidi ọghi.

⁵Kụ Ọmoogh-we phọ ạdaph eekpoogh ọotu phọ asoor, kụ azinian sịphe ọnhu-aḍibuo Ogbogo phọ, kụ ạmagh Eeron rꞌạMiriam mọ itu, kụ ịyal phọ ạbidi ọgbatan ọghi ghisigh.

⁶Kụ ọdi ạḅeni bịdi mọ, “Ịnaghan ịphen mị kạkaaph bọ. Eru mạar dị ariil uḍien odi sịphe ogbo phọ anyina, pọ mị Ọmoogh-we phọ aḍeenaan loor ạmi bịdi uḍien, kụ ạḅaanaan bịdi rạmalha.

⁷Ọgbaranaan odi mem dị mị ạḅaanaan Mozis otelhedom ạmi; mị maseere nyọdi ophogh oomo awe phọ ạmi Ịzirel.

⁸Ọdi rꞌạmi roosuan ghan ọnhu ọghaaph ayoor. Yoor rọ́moghomogho ghan ọghaaph, dị rạmiin ghan ni ḍimite phọ ạmi. Iḍighi ika kụ nyina íkiilaan bọ ọghaaph ịkaraph ịlo aMozis otelhedom mọ ạmi?”

⁹Ọmoogh-we phọ ạghagham bịdi ologhi kụ ạḍua.

¹⁰Kụ mem dị ọotu phọ ạḍua sịphe ạnyu Ogbogo phọ bịn ẹzegh ọku ufe eḍighi Mịriam dị ẹḅaal forororo. Mem dị Eeron aphogh nyọdi kụ ạmiin dị ẹzegh ọku meekpereghiom ḍizu,

¹¹ọdi ạḅeni Mozis mọ, “Seseeny, ọde-otu ạmi, mị rạaḅereghi ni nyịna, ụ́tuan ghan eḍighinom ịyaar elologhi phọ ayoor rꞌịkaraph phọ ayoor, bịn ạsighe ịkaraph ạḅam rụmhu ayoor.

¹²Kámeera dị ạnir phọ ạghigh ịyaar dị oolemi-odi aloor phọ ọdi melian emuneen kụ ogbi ọmar.”

¹³Kụ aMozis amoghiom Ọmoogh-we phọ kụ ạaḅereghi mọ, “Seseeny, Ẹnaan, kookonom nyọdi.”

¹⁴Ọmoogh-we phọ ạḅeni Mozis mọ, “Eru mạar dị ọde ọdi ạsinom risigh ọdi ịghor, umugholoor nyọdi kásiph oḍual aḍughul-otu ḍụghum? Ịsighe nyọdi sịphe arugbogo phọ ẹḍuanam dị ạrol oḍual aḍughul-otu, kụ egbi ọḅile oḅulemi ọdi.”

¹⁵Ụsighe ni Mịriam ọḍuanam sịphe arugbogo phọ kụ ạrol ẹpe phọ oḍual aḍughul-otu, kụ awe útelhe ụ́ki esi, tụtu oḅulemi nyọdi.

¹⁶Pụruku awe phọ Ịzirel ọḍua sịphe Hazerot omiigh erelhe, ọghi osi ẹpe Ẹdala ạParan, kụ odoghoḍi rugbogo sịphe.