Read abua Igbiighi 14 Bible Online

Igbiighi 14 - abua bible

Igbiighi 14

¹Oomo aḍughul phọ ookpomoghan awe phọ Ịzirel ụyughuron ni ọḅile romoghi yogh.

²Bịdi ugum ni ophoghom Mozis rꞌEeron kụ ọḅem mọ, “Ọbo yoor mọrol ghụn ni ẹpe ade phọ Ijipt kụ omuughu. Kẹn, ọbo mọrol sịen ẹdala phọ omuughu.

³Eeghe kụ iḍighi kụ Ọmoogh-we phọ ụsighe bọ iyoor rạkimom de phọ ạḍiphe? Kụze iyoor ẹgham kụ osiphi nmạriir phọ rꞌạnmuny phọ ayoor ọḍuanam. Ẹnighe ghụn dị yoor koḅula ẹpe Ijipt.

⁴Itu ọma uwo ẹmhu dị kụsighe iyira aḅulemi Ijipt.”

⁵Pọ kụ amem dị aMozis rꞌEeron okpuḍian okaram epul ude ghisigh oomo awe phọ.

⁶Kụ aJosua ọony phọ ạNon rꞌạKeleb ọony phọ aJefune, ịyal ạbuo iḅiligha phọ, ọphanyi rukpe ạbidi loor ọto,

⁷kụ ọḅeni we phọ mọ, “Ade phọ yoor ọghi bọ oḅiligha phọ, aḍigeny ade.

⁸Eru mạar dị yira ọḅeeraan ni Ọmoogh-we phọ, pọ ọdi kụsighe ni iyira ạkimom kụ ụngo iyira de ẹetool rꞌọninom, de dị ạmamaam ạnam rꞌẹnuum aḍiowo phọ rekilogh bọ.

⁹Ịdi idianaan iyira; yira kụ́moogh ịgbagharan esi Ọmoogh-we phọ. Kẹn, yira kúkiilaan bụo ade phọ, ịdi eḍighi bọ bịdi phọ eḍien ayira. Ẹloghonaan bịdi ílhoonaan mun; mạar bịdi ẹloghonaan phọ ạbidi. Ọmoogh-we phọ odi ni rꞌayira, kékiilaan bịdi.”

¹⁰Oomo aḍita phọ ạbidi ọḅem mọ, “Oroḅol bụen phọ ikpo.” Kụ eegu Ọmoogh-we phọ esoor sịphe Ogbogo phọ, risigh oomo awe phọ Ịzirel.

¹¹Kụ Ọmoogh-we phọ ạḅeni Mozis mọ, “Kꞌapuramem kụ ẹdi awe phọ ạbuen kọbile ọḅitonaan ghan ạmi? Kꞌapuramem kụ ẹdi awe phọ ạbuen kumeeraam ghan ịmi ghạlamo rꞌoomo areḍeenaan phọ ịpe mị raḍereghinaan ghan bọ bịdi?

¹²Mị kạsighe ẹepoph dị reeteneghian ghan ạziom bịdi. Mị kaḍighi ni nyịna ọde eelhe dị ẹbugh, ẹmoogh ịikpo epu bịdi.”

¹³Kụ aMozis ạḅeni Ọmoogh-we phọ mọ, “Kụ bụo Ijipt phọ ọnaghan ịphen phọ, mọ nạ ụsighe ịikpo rꞌịnyaam mọ ạna kụ ạsighenom we phọ ạbuen ạḍuanam ogbo ạbidi.

¹⁴Kụ bịdi kọkaaph ni ọḅeni we phọ bụen orugh bọ de phọ aḍien, ịdi eḍighi bọ bịdi mọnaghan ni mọ Ọmoogh-we phọ odianaan ni rꞌawe phọ ạbuen. Seseeny, Ọmoogh-we, oomo ariḍien phọ kụ rẹmiin ni, dị ọotu phọ ạna ạmeera esomanan ạbidi, kụ nạ raḍiemiom ghan bịdi ootaany rꞌeekpoogh ọotu, ḍughul eekpoogh ạnian.

¹⁵Kụ eru mạar dị nyịidipho nạ ạze ḍita awe phọ ạbuen, oomo phọ ạbidi dịadi oniin oye, pọ bụphe mọnaghan bọ ịlo ạna kọkaaph ghan mọ

¹⁶Ọmoogh-we phọ órue mun ọsighe we phọ ạbuen osiemi mun ẹpe ade phọ ạḍiphe ọdi aghunya bọ ọngo ạbidi, kụ iḍighi kụ dị mạze bịdi ẹpe ẹdala phọ.

¹⁷Nyịidipho mị rạaḅereghi ni nyịna mọ ịikpo Ọmoogh-we phọ ạmi ẹbugh ni, ịdipho nạ kụ aguanaan bọ kụ ạḅem mọ,

¹⁸‘Ọmoogh-we phọ rạ́nuun ghan kạghagh ologhi, ạmoogh oboom ọnma ighirigiir, rꞌọsar ịkaraph ọwilenaan, dị rạ́pel ghan oye lọ erugh ephum, dị rạsighe ghan ịkaraph ạburude kạkpiom nmụny ạbidi esi ịraar rꞌinya oghiil.’

¹⁹Seseeny, mị rạaḅereghi ni nyịna, sạr ịkaraph phọ awe phọ ạbuen ạwilenaan, loor esi oboom ọnma ighirigiir phọ ạna, rꞌẹphomoghian phọ ạna, ịdipho nạ ạsar ghan bọ rạbilenaan ghan bọ we phọ ạbuen emiigh kꞌẹpe Ijipt kụ ẹteeny kꞌarodon.”

²⁰Kụ Ọmoogh-we phọ ạḅem mọ, “Mị mạsar ịkaraph phọ ạbidi ạbilenaan loor esi ikpo ọnhu phọ ạna.

²¹Ageny ni, ịduon mị odi bọ ni, eegu phọ Ọmoogh-we phọ keekpereghiom ni oomo aḅirini phọ.

²²Oomo awe phọ ạbuen ọmiin bọ eegu phọ ạmi rꞌịiḍaany phọ ịpe mị aḍighi yogh bọ ẹpe Ijipt rꞌẹpe ẹdala phọ mụdegh bọ ịmi sịen ḍioph amem kụ ịmi ụ́naghanam.

²³Ageny ni, bịdi kọ́miin de phọ ạḍiphe mị aghunya bọ ọngo ạburude phọ ạbidi; kụ esi aḍita ạbuphe uphogh bọ ịmi osooromi, ọlo kạmiin ólho.

²⁴Kụ ạKeleb otelhedom mọ ạmi, ịdi eḍighi bọ ọdi ạmoogh ni kịro ọdo ologhi kụ rụdaph ghan ịmi ageny, mị kạsighe nyọdi asiemi ẹpe ade phọ ọdi ạghi bọ, kụ ạnmuny ọdi kụ kọmoogh de phọ.

²⁵(Bụo Ạmalek rꞌạbuo aKenan otugh ẹpe ade phọ ạḍiphe eḍiinyaan bọ.) Iḍue ḅetenu ạghi ẹpe ẹdala phọ. Kiton ẹpe eten Ọphiiny Igbilha phọ.”

²⁶Kụ Ọmoogh-we phọ ạghaaph ạḅeni Mozis rꞌEeron mọ,

²⁷“Kꞌapuramem kụ ẹdi aḍita ạbuo ạsipioghom mọ ạbuen kọbile ọgumom ghan ạmi? Mị rạnaghan ghan ni igum awe phọ Ịzirel ịpe bịdi rugumom ghan bọ ịmi.

²⁸Ịḅeni bịdi mọ Ọmoogh-we phọ ạḅem ịduon mọ, ‘Mị odi bọ ni. Mị mạnaghan ni ịpe nyina rẹkaaph bọ. Mị kạtuugh ni ịpe nyina rẹkaaph bọ aḍighi.

²⁹Nyina kemeleghu sịen ẹdala phọ emuughu, oomo anyina bụphe ogbi bọ, emiigh bụlo mọman ịyaldi ạsia kụ ọghiom risigh, bụphe ugumom bọ ịmi.

³⁰Iikia ílho, nyina kési ẹpe ade phọ ạḍiphe mị akunya bọ mọ nyina kụ ketugh, omuton Kẹleb ọony phọ aJefune, rꞌaJosua ọony phọ ạNon.

³¹Kụ ạnmuny phọ anyina, bụphe nyina ẹḅem bọ mọ koḍighi ịḅal, mị kạsighe ni bịdi asiemi; kụ bịdi kolegheri de phọ ạḍiphe nyina mẹḅitonaan bọ.

³²Kụ nyina, aruzu anyina kemeleghu sịen ẹdala phọ ẹphen.

³³Ạnmuny phọ anyina koḍighi bukoriom ịga sịen ẹdala phọ inyadi ạsia, kụ ọmiinom ịminimiin dị ẹbugh loor ẹmoogh omeeraam mọ anyina rꞌole ẹmha phọ anyina, tụtu aruzu phọ anyina ẹḅor emuneen sịen ẹdala phọ.

³⁴Kọdaph ọnhu asuḍughul-otu phọ ịpe nyina ẹrol bọ oḅiligha ade phọ, inyadi aḍughul-otu phọ, ḍiniin aḍughul-otu ạlha, nyina kẹmiinom ịminimiin loor ịkaraph phọ anyina, inyadi ạsia.

³⁵Mị Ọmoogh-we phọ kụ rạkaaph. Agey ni, ịduon kụ ịdi mị kaḍighi ḍita otul ạbuo ạsipioghom mọ ạbuen, ookpomoghan bọ ọḅoph ọnhu kụ ụlogh bọ ịmi ḍien: ịlo ạbidi memuneen sịen ẹdala phọ, bịdi komuughu sịen phọ.’”

³⁶Kụ awe phọ ạbuphe aMozis arom bọ ọghi oḅiligha ade phọ roḅula, kụ ọghaaph ịdi ítu ịne ịlo ade phọ, kụ eḍighi ịdi aḍita awe phọ ọgumom nyọdi.

³⁷Kụ ẹepoph ẹze we phọ ạbuphe ọgba bọ ọkpe ọphue de phọ egbodo Ọmoogh-we phọ.

³⁸AJosua ọony phọ ạNon rꞌạKeleb ọony phọ aJefune bịn kụ usugha esi ạbuphe ọghi bọ oḅiligha ade phọ.

³⁹AMozis ạghaaph oomo phọ ịdi ạḅeni ḍita awe phọ Ịzirel kụ bịdi omeelom oboom ọto.

⁴⁰Bịdi oḅon esoph ạḍiroor oḅerenu ọsiinyighu ạnyu aroogbolom mọ, kụ ọḅem ghan mọ, “Mịin, yoor odi ni sịen. Yoor kọki ni osi ekpisi phọ ẹpe eguanaan bọ, ịdi eḍighi bọ yoor moḍighi ịkaraph.”

⁴¹Kụ aMozis apuru bịdi mọ, “Iḍighi ika kụ nyina epel bọ ọnhu phọ Ọmoogh-we phọ, loor ịdipho kị́nighenom bọ inyina?

⁴²Ị́ki ghan, ịdi eḍighi bọ Ọmoogh-we phọ inyina kị́daph, ọbo ạbumulogh-ḍien phọ anyina kịze ghan bọ inyina.

⁴³Bụo Ạmalekait phọ rꞌạbuo aKenanait phọ odi ni ẹpe risigh anyina. Nyina kemeel eḍighanaan elhool ẹgham, ịdi eḍighi bọ nyina mẹwile ọdaph Ọmoogh-we phọ. Ọmoogh-we phọ kị́rolonaan inyina.”

⁴⁴Okue ghan bịn, kụ roḍighi ghan ịdi ẹrol dị rọki ẹpe aroogbolom mọ, kụ ạri Igbe Ịyo Ọmoogh-we phọ rꞌaMozis kẹn, ọlo mạḍua sịphe arugbogo phọ ólho.

⁴⁵Kụ bụo Ạmalekait phọ rꞌạbuo aKenanait phọ orughogh bọ ẹpe aroogbom mọ osoroghu ude okuphogh bịdi, ophorogh bịdi osiemi ẹpe Homa.