Read abua Igbiighi 15 Bible Online

Igbiighi 15 - abua bible

Igbiighi 15

¹Ọmoogh-we phọ ạḅeni Mozis

²mọ ạḅeni we phọ Ịzirel mọ, “Mem lọ nyina ẹghi esi ẹpe ade phọ nyina ketugh bọ, ḍịphe mị rịngo bọ inyina,

³kụ keḍighi ịyaar aghuḍum ọngo Ọmoogh-we phọ, mꞌịyaar aghuḍum oguom ạnian, mꞌịyaar aghuḍum omuzeḍi ịlo nyina eguanaan, mꞌịyaar aghuḍum ophooph ologhi, mꞌịyaar aghuḍum dị roḍighinom ḍilephiri ạnam mꞌodughuna, mꞌoyool-ọga mꞌạtu-ọga mem ẹyaal dị kepur eeḅi eḍu esi Ọmoogh-we phọ,

⁴pọ ọpo ratu bọ oḍighi ịyaar aghuḍum oguom ạnian mꞌẹlo ọony oyool-ọga kạḅaram ni ịyaar aghuḍum ịbiakpa kụ atumom egbodo Ọmoogh-we phọ. Ọdi kạsighe ịgbieneen ịbiakpa ạto ogbogh ọtoom ẹemor kụ ạsighe eeku ạmunum aḅunyonom, ḅịle rꞌeeku amiim.

⁶Mọ roḍighinom odughuna, pọ kookolobian ẹlo ịyaar aghuḍum ịbiakpa, ạsighe ịyal igbogh ịtoom ẹemor ịbiakpa kụ ạsighe 1.5 aruuku ạmunum-ọliv aḅunyonom, ạpham arumom.

⁷Kụ eru ẹlo ịyaar aghuḍum ịpughol, pọ sịghe 1.5 aruuku amiim ạngo Ọmoogh-we phọ. Eeḅi eḍu ạrikia mọ ịphen phọ kẹḅeeraan nyọdi.

⁸Kụ mem dị nạ aakolobian ịlo ọsighe ḍilephiri ạnam kụ oḍighinom ịyaar aghuḍum oguom ạnian, mꞌoḍighinom ịyaar aghuḍum lọ nạ aguanaan, mꞌịyaar aghuḍum ẹboroph ọngo Ọmoogh-we phọ,

⁹pọ oye phọ ratu bọ kạsighe ịgbieneen ịbiakpa ạto ịraar igbogh ịtoom ẹemor ạsighe ịyal aruuku ạmunum aḅunyonom ạpam kụ atumom.

¹⁰Mọ nạ rạki oḍighi ịyaar aghuḍum ịpughol, pọ pạm ịyal aruuku amiim, dịadi ẹlo ịyaar aghuḍum ạnian. Eeḅi eḍu ịyaar aghuḍum mọ ẹphen phọ kẹḅeeraan Ọmoogh-we phọ.

¹¹“Eniin phọ eḍighinom mọ kụ ịdi koḍighi ni, mꞌaḍilephiri ạnam, mꞌodughuna, mꞌọony oyool-ọga, mꞌọony ạtu-ọga.

¹²Ọdaph ghan ọnhu ạraraar phọ ịpe nạ aakolobian bọ kụ ạtuugh ịdipho kụ aḍighi ghan, tọrobo tọrobo ọnyo anyina.

¹³Oomo ạbulo oḍighi bụo ịsien ẹmha phọ, ịduon kụ ịdi bịdi kọtuugh ghan kụ oḍighi ịyaar aghuḍum oguom ạnian lọ kepur eeḅi eḍu esi Ọmoogh-we phọ.

¹⁴Kụ eru ooruen dị arughan rꞌanyina, tọro oye lọ odi rꞌanyina sịphe oghiil phọ anyina, lọ ạatughian oḍighi aani ịyaar aghuḍum oguom ạnian phọ, dị kepur eeḅi eḍu esi Ọmoogh-we phọ, pọ ọdi ạtuugh ịpe nyina reḍighi ghan bọ kụ aḍighi aani.

¹⁵Oniin phọ ologh phọ ọpo odi bọ sịphe ogbo phọ anyina kụ odianaan ni ooruen lọ rꞌanyina erughan. Ọphon phọ ologh dị nyina keeko ghan oghiil atum oghiil. Ịpe nyina edi bọ kụ ịdi ooruen phọ kạtuugh kụ ạtol aani esi Ọmoogh-we phọ.

¹⁶Oniin phọ ologh phọ rꞌiniin phọ ịtooghi phọ idianaan bọ inyina kụ edianaan ni ruuruen lọ rꞌanyina erughan bọ.”

¹⁷Kụ Ọmoogh-we phọ ạḅeni Mozis

¹⁸mọ ạḅeni we phọ Ịzirel mọ, “Mem dị nyina ẹghi esi ẹpe ade phọ kịsighe bọ inyina ọki osiemi,

¹⁹kụ mem lọ ẹteeny dị nyina kele eḍien ịsiphe phọ, pọ ịpur eḍighi ịyaar aghuḍum oseere oḅio ogiph ẹngo Ọmoogh-we phọ.

²⁰Ekori ẹsighe kịkia ịḅel ịizupha phọ anyina kụ eḍighinom ịyaar aghuḍum oḅio ogiph phọ anyina. Ịdipho ịyaar aghuḍum ạsigba ịbiakpa phọ, ịdipho kụ ịdi nyina kẹtuugh eḍighi.

²¹Ịḅel iimuma ịbiakpa phọ anyina ịsighe ghan ekori eḍighinom ịyaar aghuḍum oseere oḅiom ẹngo Ọmoogh-we phọ, oghiil atum oghiil anyina.

²²“Eru mạar dị nyina ẹpioman kụ ẹwile iilogh phọ ịphen Ọmoogh-we phọ ạlogh bọ ạḅeni Mozis kụ nyina ị́daph,

²³oomo iilogh phọ ịpe Ọmoogh-we phọ ạlogh bọ ạḅeni Mozis emiigh ḍio phọ ạḍiphe Ọmoogh-we phọ adoghoḍi bọ iilogh phọ kụ ẹghiom ghisigh, oghiil atum oghiil anyina,

²⁴kụ eru dị ẹrol dịadi ụsighe élegheri kụ ọpioman, dị aḍita awe phọ úlegheri, pọ oomo aḍita awe phọ ọsighe onyugheel aḍilephiri ạnam oḍighinom ịyaar aghuḍum oguom ạnian, ẹlo kepur eeḅi eḍu esi Ọmoogh-we phọ, ọḅaram rꞌịyaar aghuḍum ịbiakpa rꞌịyaar aghuḍum ịpughol, ọdaph ologh phọ, eniin ekpe ẹlo oḍighinom ịyaar aghuḍum ịkaraph.

²⁵Kụ oyil ạrikia phọ awoph oomo aḍita awe phọ Ịzirel, kụ ọsar ịkaraph phọ ạbidi ọbilenaan bịdi, ịdi eḍighi bọ bịdi úlegheri kụ ọpioman. Bịdi ọsighe ịyaar aghuḍum mọ ạbidi koḍighinom bọ nịan ọngo Ọmoogh-we phọ, rꞌịyaar aghuḍum ịkaraph phọ ạbidi ọngo Ọmoogh-we phọ loor élegheri phọ ạbidi.

²⁶Pụruku kọsar ọbilenaan oomo aḍita awe phọ Ịzirel rꞌaruuruen phọ rꞌạbidi orughan bọ loor élegheri phọ ạbidi.

²⁷“Eru mạar dị oye ạsighe élegheri kụ ạpioman aḍighi ịkaraph, pọ ạsighe ọya ạtu-ọga lọ ạman ḍiniin ạlha, kụ ạphighironom ẹkia ịkaraph.

²⁸Kụ oyil ạrikia phọ awoph oye phọ ạsighe esi ịkaraph phọ ọdi ạsighe bọ élegheri kụ aḍighinom kụ ạpioman bọ risigh Ọmoogh-we phọ. Kụ mowoph bọ nyọdi, pọ mọsar ịkaraph phọ ọdi ọbilenaan.

²⁹Oniin phọ ologh phọ ọphon odianaan bọ oye lọ ạsighe élegheri kụ ạpioman aḍighi ịkaraph odianaan bọ rꞌanyina ạbuo ẹmha phọ. Ịdipho phọ kẹn kụ ẹdi edianaan ruuruen lọ rꞌanyina erughan.

³⁰“Tọrobo oye dị ạsighe ologhoma rꞌịpa rꞌiituma kụ aḍighinom tọrobo ịyaar, mꞌọlo ịsien ẹmha phọ mꞌooruen, pọ ọdi rạwa Ọmoogh-we phọ sighiton, pọ moroph nyọdi ogbeph omutonaan nyọdi esi ogbo awe phọ ọdi,

³¹ịdi eḍighi bọ dị maafolomi ikpo ọnhu phọ Ọmoogh-we phọ ọ́maghami ịyaar, dị mạka ologh phọ Ọmoogh-we phọ, pọ itoph oye phọ ọpo ogbeph emutonaan. Ịkaraph ọdi, ẹmhu ọdi.”

³²Eniin amem mem dị awe phọ Ịzirel odi ni sịphe ẹdala phọ, ụmiin oniin oye dị ạghi ọso ịpe ḍio ophooghian phọ.

³³Bụphe ọmiin bọ nyọdi dị rạso bọ ịpe phọ osiph nyọdi ọpham ọsighe oruomonaan Mozis rꞌEeron rꞌoomo aḍita awe phọ Ịzirel.

³⁴Kụ ọsighe oye phọ ọkasiom otu ikoli, ịdi eḍighi bọ ịpe koḍighi bọ nyọdi úlegheri.

³⁵Kụ Ọmoogh-we phọ ạḅeni Mozis mọ, “Ikiigh oye phọ ọpo phọ. Ịsighe nyọdi ẹḍuanam sịphe arugbogo phọ.”

³⁶Kụ oomo aḍita awe phọ ọsighe oye phọ ọḍuanam sịphe arugbogo phọ kụ oroḅol nyọdi ikpo kụ amugh, ịdipho Ọmoogh-we phọ ạto bọ ạḅeni Mozis.

³⁷Ọmoogh-we phọ ạto ạngo Mozis

³⁸mọ ạḅeni we phọ Ịzirel mọ, “Ịsighe ghan ịsawolowo kụ ẹkologhom ghan oomo aruukuna ạrusuoma phọ anyina, oghiil atum oghiil phọ anyina. Kụ ẹsighe ẹnu ẹḅaram rꞌịsawolowo phọ.

³⁹Ịsawolowo phọ keḍighi ghan ịdi tọro amem lọ nyina ephogh bịn nyina kẹetughian ghan iilogh phọ ạmi kụ kẹdaph ghan eḍighi, ọbo nyina kẹdaph ghan bọ rụuphua iloghi phọ anyina rꞌịpe ariḍien phọ anyina rẹmiin bọ bịn ẹdaph ele ẹmha,

⁴⁰ọbo nyina ẹetughian ghan eḍighi ghan oomo ịpe edi bọ sịphe iilogh phọ mị adoghoḍi bọ ịngo inyina, ọbo nyina eḍighi we iigbia egbodo ạmi.

⁴¹Mị kụ Ọmoogh-we Ẹnaan phọ anyina, ọpo ịsighe bọ inyina ẹpe Ijipt amitiom ạḍuanam oḍighi Ẹnaan anyina. Mị kụ Ọmoogh-we Ẹnaan phọ anyina.”