Read abua Igbiighi 19 Bible Online

Igbiighi 19 - abua bible

Igbiighi 19

¹Ọmoogh-we phọ ạto ạḅeni Mozis rꞌEeron mọ

²bịdi ọghaaph iilogh phọ ịphen ọdi adoghoḍi bọ ạḅeni we phọ Ịzirel mọ, “Ịsighe ọya ọtogh-tọgh ạnam ọlo útiagha, lọ kọ̋opuan loor kụ ụ́moogh ịghagh orum, erumom ụteeny iyoor

³yoor ọsighe ọngo Ẹliazar oyil ạrikia phọ. Ọdi kạsighe ni ạḍuanam sịphe arugbogo phọ, kụ oniin ọnyo anyina aghiigh nạm mọ sịphe risigh ọdi.

⁴Ẹliazar oyil ạrikia phọ ạsighe ghụnugh ọdi atiom ịḅaal phọ ạsighe ạsaraghi esomanan Ogbogo phọ oḍual amem.

⁵Oniin ọnyo anyina ạsighe nạm mọ aguom nịan egbodo ọdi; ạsighe oomo phọ ạnam mọ, ozu phọ, iphulupul phọ, ịḅaal phọ, rꞌoomo ịpe ọkuruḅaka phọ, aguom nịan.

⁶Oyil ạrikia phọ ạsighe opoḍi ọsaga, aghuudia rꞌoodor asumeeny sịphe oguom bọ ọtogh-tọgh ạnam mọ nịan.

⁷Kụ oyil ạrikia phọ aatologh rukpe ọdi, awura mụum kụ agbi oḅula ẹpe arugbogo phọ. Ọdi ạrol dọl oye lọ úseleman ụ́ḅaal tụtu ẹteeny kꞌadulhe.

⁸Kụ oye phọ ọpo ạsighe bọ nạm mọ aguom nịan akori aatologh rukpe ọdi, awura mụum, kụ ạrol dọl oye lọ úseleman ụ́ḅaal tụtu ẹteeny kꞌadulhe.

⁹Oye lọ aseleman ạsighe ọoru ạnam mọ ạḍuanam pạ arugbogo phọ, ạsighe ạghi azu esi lọ ẹḅaal, esi lọ kooseenaan ḍita awe phọ Ịzirel okirionom mụum mụo oselemian ghan aloor oye lọ aḍighi ịkaraph.

¹⁰Kụ oye phọ ọpo ạsighe bọ ọoru ạnam mọ, akori aatologh rukpe ọdi, ạrol dọl oye dị úseleman ụ́ḅaal tụtu ẹteeny kꞌadulhe. Ọphon phọ ologh dị awe phọ Ịzirel rꞌaruuruen lọ rꞌạbidi orughan kooko ghan kꞌagee-pọ.

¹¹“Oye lọ ạḅogh oye dị mamugh, pọ oye phọ ọpo ạrol dọl oye dị úseleman ụ́ḅaal oḍual aḍughul-otu.

¹²Kụ rẹman ịraar aḍughul-otu, ọdi ạsighe mụum mọ ạmuphe phọ aselemian loor ọdi, kụ rẹman oḍual aḍughul-otu, ọdi aselemian loor; kụ eru mạar dị ọdi úselemian loor ọdi, dị mẹman ịraar phọ aḍughul-otu phọ rꞌoḍual aḍughul-otu phọ, pọ ọdi ọ́ḅaal óseleman.

¹³Tọrobo oye kụ ạaḅoghogh oye lọ mamugh kụ loor ọdi úselemian, pọ ọdi mạapu Ogbogo Ọmoogh-we phọ, pọ awe phọ Ịzirel oroph nyọdi ogbeph, omutonaan nyọdi. Ịdi eḍighi bọ kọ̋sighe mụum oselemian aloor phọ ọsaraghi nyọdi, pọ ọdi ọ́ḅaal óseleman. Ọdi ạrolom ni ịdipho rꞌéseleman phọ ọdi.

¹⁴“Ologh phọ ọphon: eru mạar dị oye ạrol sịphe ogbogo kụ amugh, pọ tọrobo oye lọ ạghi sịphe ogbogo phọ rꞌạbuphe ọrol bọ sịphe ogbogo phọ, pọ bịdi ọrol dọl oye lọ úseleman ụḅaal oḍual aḍughul-otu.

¹⁵Oomo ạsigbagba rꞌasuugh erughotu phọ edi bọ sịphe ogbogo phọ kụ ị́moogh ekpereghi, pọ íseleman ị́ḅaal.

¹⁶Tọrobo oye lọ ạḅogh oye lọ oghiighom elhool, mꞌoye dị mamugh mꞌọḅarara oḍim mꞌoḍi ẹpe iizo phọ, pọ ọdi ạrol dọl oye lọ úseleman ụ́ḅaal oḍual aḍughul-otu.

¹⁷“Oye lọ úseleman ụ́ḅaal pọ bịdi ọsighe ghan ọoru ạnam mọ oguom bọ nịan ịlo ịyaar aghuḍum ịkaraph phọ, okor mụum lọ rakil ọlogh ologhi ọnyoki.

¹⁸Kụ oye lọ aseleman ạḅaal ạsighe aghuudia ạtophori ologhi ạmuum mọ kụ ạsighe ạsaraghi ogbogo phọ rꞌoomo ạraraar phọ edi bọ sịphe ogbogo phọ, ạsaraghiom nyọpo ạḅogh bọ ọḅarara oḍim mọ, rꞌọpo ạḅogh bọ nyọpo oghiigh bọ, rꞌoḍi phọ.

¹⁹Kụ rẹman ịraar aḍughul-otu kụ oye lọ aseleman ạḅaal, ạsighe ạsaraghi oye phọ ọpo ạapuan bọ loor ọdi. Rẹman oḍual aḍughul-otu, dị aselemian loor ọdi, aatologh rukpe ọdi, awura mụum. Rẹteeny dulhe bịn dị mạḅaal.

²⁰“Oye lọ úseleman dị mạphu kụ úselemian loor, pọ itoph oye phọ ọpo ogbeph, emutonaan nyọdi esi aḍita awe phọ Ịzirel. Ịdi eḍighi bọ ọdi mạphu Ogbogo Ạdol Ọmoogh-we phọ kụ mụum oselemian aloor phọ nyọdi kọ̋saraghi, pọ ọdi ọ́ḅaal.

²¹Ọphon phọ ologh iigbia dị bịdi ogbi ooko kꞌagee-pọ. Tọrobo oye lọ ọsighe mụum oselemian aloor phọ kụ ạsaraghiom, pọ ọdi aatol rukpe ọdi; kụ ọlo ạḅogh mụum oselemian aloor phọ, pọ ọdi ạrol dọl oye lọ mạapuan loor tụtu ẹteeny kꞌadulhe.

²²Tọrobo oye lọ úseleman dị mạphuph kụ ạḅogh oye dị aseleman ạḅaal, pọ ọdi mạphue oye phọ ọpo ọdi ạḅogh bọ, ạrol dọl oye lọ úseleman ụ́ḅaal tụtu ẹteeny kꞌadulhe.”