Read abua Igbiighi 22 Bible Online

Igbiighi 22 - abua bible

Igbiighi 22

¹Awe phọ Ịzirel oḅetenu omiigh erelhe ẹpe ạḍiyaghaghaan ade phọ ạMoab, ọghi osi ẹpe ẹḅeenyom ạJodan etuman bọ Jeriko kụ odoghoḍi rugbogo sịphe.

²ẠBelak ọony phọ aZipor, ọdaam eelhe phọ ạMoab, kụ ạmiin dị awe phọ Ịzirel oḍiza, ạḅile ạnaghan oomo ịpe bịdi oḍighi yogh bọ Ạmorait phọ,

³kụ aruugu rasiph nyọdi rꞌoomo awe phọ ọdi.

⁴Kụ awe phọ ạMoab ọḅeni ikumoor awe phọ ạMidian mọ, “Nyịidipho awe phọ ạbuen kọlaay oomo ạraraar phọ ikoom bọ iyira, ịdipho aḍilephiri ạnam rạtaal ghan bọ imoom ạrinya eḍum.”

⁵Kụ ạBelak arom butelhedom ạghiom Bẹlam ọony phọ aBior ẹpe Petor etuman bọ ẹpe Ọphiiny aYufratis ẹpe ade phọ awe phọ ọdi orugh bọ, mọ ọmagh ọḅeni mọ, “Mị rạwa dị nạ kalegheri mọ aḍigbogh aḍita awe ọḍua ni ẹpe Ijipt otu kụ ọḅiraan sịen ade phọ kụ otugh esomanan ạmi.

⁶Tue nyịidipho urulughinaan ịmi we phọ ạbuen, ịdi eḍighi bọ bịdi oḍiza, ọmoogh ịikpo upu ịmi; ạgama, mị katue ni ạkpar apu bịdi, aporogh bịdi sịphe ade phọ. Mị alegheri ni mọ mem lọ nạ ạngo ọghor awe rọmoogh ghan ḍịseph, kụ mem lọ nạ maruule pọ moruule we phọ.”

⁷Kụ ikumoor awe phọ ạMoab rꞌikumoor awe phọ ạMidian ọsighe ikpoki ạḅaphanya ọpham ọghi kꞌạBelam, kụ ọḅeni nyọdi dom mọ ạBelak.

⁸Ọdi ạḅeni bịdi mọ, “Ịmina sịen kụ iḍue mị kịḅeni inyina tọrobo ịlo Ọmoogh-we phọ ụḅeni ịmi.” Kụ ạBelam rꞌikpolom awe phọ ạMoab ọmina sịphe kꞌọdi.

⁹Kụ Ẹnaan eru ẹteeny Bẹlam kụ epuru nyọdi mọ, “Bụen odi bọ kꞌạna ạbughen awe?”

¹⁰ẠBelam ạḅeni Ẹnaan mọ, “ẠBelak ọony phọ aZipor, ọdaam eelhe phọ ạMoab, kụ arom bịdi dom mọ oru ụḅeni ịmi mọ mị ụki utuule bịdi; ạgama mọ ọno katue ni abianaan rꞌạbidi

¹¹mọ awe ọḍua ni ẹpe Ijipt otu ooḅiraan ookpereghiom de phọ ọno, kụ porogh bịdi ạsighe.”

¹²Ẹnaan ẹḅeni Bẹlam mọ, “Kạ́daph bịdi ạki atulughi we phọ, ịdi eḍigh bọ bịdi awe dị mị mạseph.”

¹³Ḍịeri phọ ạḍiroor phọ ạBelam ạghi ạteeny we phọ ạBelak mọ, “Ikeel ẹmha anyina, ịdi eḍighi bọ Ọmoogh-we phọ ómeera mọ mị ịdaph inyina ụki.”

¹⁴Kụ ikumoor awe phọ ạMoab oḅula ọteeny Bẹlak kụ ọḅeni nyọdi mọ ạBelam ómeera ọdaph ạbuno oru.

¹⁵Kụ ạBelak ạḅile arom ḍita ạbunon awe dị oghuan opu bụḅel phọ.

¹⁶Bịdi ụghi ọteeny Bẹlam kụ ọḅeni nyọdi mọ, “ẠBelak ọony phọ aZipor ạḅem mọ, ‘Ịyaar nyịna kísophoghom oru ọteeny ạmi.

¹⁷Mị kạngo ni rughuenian dị ẹkasian. Tọrobo ịlo nạ ụḅeni ịmi mị kaḍighi ni. Tue urulughinaan ịmi we phọ ạbuen.’”

¹⁸Kụ ạBelam ạphagharanaan kụ ạḅeni rụukpaany phọ ạBelak mọ, “Ghạlamo ạBelak kụngo ịmi otu phọ ọdi, asilva rꞌagol kụ amuza bọ, mị kạ́pel ịpe Ọmoogh-we Ẹnaan phọ ạmi ụḅeni bọ ịmi, aḍighi ịnon.

¹⁹Kụ ikoriom ḍughul ẹrol dị mị apuru mụghumo Ọmoogh-we phọ ạmoogh ni ịyaar ọḅeni ạmi.”

²⁰Ḍughul phọ ạḍiphe Ẹnaan eru ẹteeny Bẹlam kụ ạḅeni nyọdi mọ, “Awe phọ ạbuen mọḅile bọ oru ọmagh ạna, pọ ḅetenu ạdaph bịdi ạghi; kụ ọlo ịpe mị kạḅeni bọ nyịna kụ ịdi nạ kạtuugh kụ aḍighi.”

²¹Kụ ạBelam ạsuma ḍịroor kụ aḅetenu aselemi ẹnam adool phọ ọdi, kụ ạdaph we phọ ạMoab ạghi.

²²Iphin ni ologhi Ẹnaan mọ ạBelam rạki. Ọdi rakiilom ni ẹnam adool phọ ọdi rꞌịyal abutelhedom ọdi kụ rꞌọghagh ologhi ọokpaany kꞌỌmoogh-we phọ asophoghom nyọdi eten.

²³Kụ ẹnam adool phọ dị aḍigh bọ ạmiin ọokpaany kꞌỌmoogh-we phọ dị ạmeera sịphe eten phọ rꞌelhool ẹgham dị ạpham ḍịghaagh, kụ ẹnam adool phọ ẹwile eten phọ ephogh eḍum. ẠBelam ạgurogh ẹnam aḅulemi sịphe eten phọ.

²⁴Ọokpaany kꞌỌmoogh-we phọ ạmeera ẹkololoony eten dị edi sịphe ozo ireeny avain, dị iikpe edi ịyal ạga phọ.

²⁵Mem dị ẹnam adool phọ ẹmiin bọ ọokpaany kꞌỌmoogh-we phọ kụ ạghi akula iikpe phọ, ạsighe owol ạBelam ạkpaariom iikpe phọ, kụ ạBelam ạḅile ạgurogh ẹnam mọ ẹsaany bọ nyọdi.

²⁶Ọokpaany kꞌỌmoogh-we phọ aḍiemi risigh kụ ạghi ạmeera esi dị ẹkoophian, esi dị ịlo oten ílho ekeeny rꞌelhiom mọ.

²⁷Mem dị ẹnam adool phọ ẹmiin bọ ọokpaany kꞌỌmoogh-we phọ kụ eḅololo ude ruwol ạBelam. ẠBelam órue ọ́pham ophin ologhi ọdi, bịn amiigh ọgurogh ẹnam adool phọ.

²⁸Kụ Ọmoogh-we phọ ạngo ẹnam adool phọ ịikpo ọḅa, kụ epuru Bẹlam mọ, “Mịna uḍighi nyịna eeghe kụ nạ mụgurogh ịmi sịen ịraar amem?”

²⁹Kụ ạBelam ạḅeni ẹnam adool phọ mọ, “Ịdi eḍighi bọ nạ muufolomi ịmi. Mụghumo mị ụpham elhool ẹgham ḍịghaagh, mị mughiigh ni nyịna.”

³⁰Ẹnam adool phọ epuru Bẹlam mọ, “Mịna kẹ́nam adool phọ ạna, ọpo nạ ratelhiom ghan bọ oomo aghuḍum mọ ạna ẹteeny kꞌarodon? Mị maḍighi ghan ni ịduon nyịna kꞌekulha?” Kụ ọdi ạphagharanaan mọ, “Eeye.”

³¹Pọ kụ amem dị Ọmoogh-we phọ ạḅarion riḍien ạBelam, kụ dị ạmiin ọokpaany kꞌỌmoogh-we phọ, dị ạmeera sịphe eten phọ rꞌelhool ẹgham dị ạpham ḍịghaagh; kụ ạBelam azumeri ẹmhu ọdi, ameel ezuemi.

³²Kụ ọokpaany kꞌỌmoogh-we phọ apuru nyọdi mọ, “Uḍighi ika kụ nạ mạgurogh ẹnam adool phọ ạna sịen ịraar amem? Mị maru okikima eten ạna, ịdi eḍighi bọ erelhe phọ ạna erelhe amuphe esi ạmi.

³³Ẹnam adool phọ ạna ịmiin ịmi kụ ạgbol ọgbal ịraar amem. Mụghumo mụ́gbol bọ, mị mukiigh nyịna nyịidipho kụ ạwile ẹnam adool phọ.”

³⁴ẠBelam ạḅeni ọokpaany kꞌỌmoogh-we phọ mọ, “Mị aḍighi ịkaraph ịdi eḍighi bọ mị úlegheri mọ nạ kụ ụmeera ghan bọ eten phọ okikima ạmi, kụ nyịidipho eḍighi ịyaar dị nạ ạatughian mọ ebeeph dị mị kạghi, pọ mị kaḅula ni.”

³⁵Kụ ọokpaany kꞌỌmoogh-we phọ ạḅeni Bẹlam mọ, “Pạm ni we phọ ạbuen ạghimom; kụ ạghaaph ịlo mị ạḅem bịn.” Kụ ạBelam rꞌạbidi ọghi.

³⁶Mem dị ạBelak ạnaghan bọ mọ ạBelam ratu kụ ọdi ạghi ozuan ọdi ẹpe ẹmha phọ Ar, ẹpe ọgbal Ọphiiny Anon phọ, ẹpe eekuna ọku phọ ạMoab.

³⁷ẠBelak apuru Bẹlam mọ, “Eeghe kụ nạ óru bọ ẹḅel amem mọ mị arom bọ mọ ọmagh nyịna ḍụghum? Nạ ugbi mọ mị kátue ạngo nyịna ruunmo dị ẹkasian?”

³⁸Kụ ạBelam ạḅeni Bẹlak mọ, “Pọrono ạmi, mị maru. Kụ nyịidipho eeghe ịikpo kụ ẹdi mị mạmoogh? Mị kạkaaph ịlo Ẹnaan ịḅeni ịmi ọghaaph bịn.”

³⁹Kụ ạBelam ạdaph Bẹlak ọghi osi ẹpe Kịriat Huzot,

⁴⁰esi dị ạBelak ạkanyan sịnam rꞌiyool-ịga kụ ạsighe iniin iphulupul ạngo Bẹlam rꞌikpolom awe dị ọrolan rꞌọdi mọ bịdi ạa.

⁴¹Kụ rẹḅaal kụ ạBelak ạpham Bẹlam ạghi asiom aBamot-Baal esi dị ạBelam arue ạrol kụ ạmiin buniin awe phọ Ịzirel.