Read abua Igbiighi 25 Bible Online

Igbiighi 25 - abua bible

Igbiighi 25

¹Mem dị Ịzirel orugh sịphe Eḍiiny Akasia, kụ awe umiigh ọrolan esi rꞌạnmanyaan ạMoab olhiom ghan ẹmha.

²Ạnmariir phọ ạbuphe ụmagh ni we phọ Ịzirel ọḅophoghan rꞌạbidi olhe ạrayaal esi phọ ọphinyon ghan bọ rịkia ọngo ruru phọ ạbidi, kụ bịdi ule malhe phọ kụ okpuḍian ọoḅereghi ruru phọ ạMoabait.

³Kụ Ọmoogh-we phọ ạghagham ologhi we phọ Ịzirel loor esi dị bịdi ọsighe loor phọ ạbidi ọkuom Baal eru phọ aPior.

⁴Kụ Ọmoogh-we phọ ạḅeni Mozis mọ, “Sịghe oomo ạbuo ạrumhu phọ Ịzirel asinogh bịdi egbodo ạmi, sịphe ogogo phọ, bịn mị kạ́mooghom mun ophin ologhi we phọ.”

⁵AMozis ạḅeni bụo ịiruen phọ mọ, “Tọrobo ọnyo anyina kakiigh bụo eghun ạna dị mokpuḍian ọoḅereghi Baal eru phọ aPior.”

⁶Oniin ọnyo Ịzirel ạsighe oniin ạnir ọlo ạMidia aḍighom ogbogo phọ ọdi risigh aMozis rꞌoomo ookpomoghan phọ Ịzirel, dị ọrol pạ ọnhu-aḍibuo Ogbogo Ạdol Ọmoogh-we phọ kụ romoghi yogh.

⁷Mem dị ạFinehas ọony phọ Ẹliazar ọony phọ Eeron oyil ạrikia phọ ạmiin ịphen, ọdi aḅetenu bịn ạḍua ookpomoghan awe phọ. Ọdi ạsighe ọsoph,

⁸ạdaph oye phọ rꞌạnir phọ, aḍigh ogbogo phọ kụ agimi ọsoph phọ rụkuruḅaka ịyal phọ ạbidi. Ịduon phọ kụ ịdi okunughi ẹepoph phọ repiemi bọ Ịzirel.

⁹Bụdi ẹepoph phọ mẹze bọ ọman bọ ịyaldi rꞌinya ọonir awe.

¹⁰Ọmoogh-we phọ ạḅeni Mozis mọ,

¹¹“ẠFinehas ọony phọ Ẹliazar ọony phọ Eeron oyil ạrikia phọ mạphoomi ọghagh ologhi phọ ạmi. Loor ịpe ạFinehas maḍighi bọ, mị kápiemi we phọ Ịzirel. Ịphen phọ ịghagh aani ni ologhi ọdi ịdipho rẹkagh bọ ologhi ạmi.

¹²Kụ iḍighi, ḅẹni nyọdi mọ mị rakiran ịyo ẹepho dị kẹtol bịn oomo amem.

¹³Ọdi rꞌoghiil ọdi, bụphe kọḍua bọ kꞌọdi omite, kọtol bịn oḍighi bụpinyon ạrikia phọ, ịdi eḍighi bọ dị ạtuan Ẹnaan phọ ọdi ạkagh ologhi, aakpereghi ịkaraph phọ awe phọ Ịzirel.”

¹⁴Ḍien oye ọlo Ịzirel phọ ọḅaram bọ ạnir ọnyo ạMidia phọ kụ oghiigh, ughol mọ aZimri ọony aSalu, uwo ẹmhu ọto sịphe eghun phọ ạSimion.

¹⁵Ḍien ạnir phọ aKozbi. AZur, ọde ọdi, aḍighi uwo ẹmhu sịphe oniin ookpomoghan aropolo phọ ạMidia.

¹⁶Ọmoogh-we phọ ạto ạḅeni Mozis mọ,

¹⁷“Zuom weye ạMidia phọ aagulemi bịdi,

¹⁸loor esi ịkaraph phọ bịdi oḍighi bọ nyịna mem mọ bịdi iigbegheḍiom bọ inyina ẹpe aPior kụ loor ẹmhu aKozbi ọpo oghiigh bọ mem mọ ẹepoph phọ esoor bọ ẹpe Pior.”