Read abua Igbiighi 27 Bible Online

Igbiighi 27 - abua bible

Igbiighi 27

¹AMala, Noa, Hogla, Milka rꞌaTirza, ạnmanyaan phọ aZelofahad ọony phọ aHefer, ọony phọ ạGiliad, ọony phọ aMakir, ọony phọ ạManase, ọony phọ ạJosef,

²ụghi ni ọmeregha risigh aMozis rꞌẸliazar oyil ạrikia phọ, rꞌarisigh ạbuo ạrumhu phọ sịphe ọnhu-aḍibuo Ogbogo Ạdol Ọmoogh-we phọ awe phọ Ịzirel ookpomoghan bọ, kụ opuru bịdi mọ,

³“Ọde phọ ayoor amugh ẹpe ẹdala phọ, dị olephiri ọony ọ́mar. Ịkaraph ọdi íkiigh nyọdi. Ọdi óḍighan otul phọ aKora, bụphe ọḅophoghan bọ ọwa Ọmoogh-we phọ sighiton.

⁴Uḍighi ika kụ aḍien ọde phọ ayoor ílho aani bọ sịphe eghun phọ? Ụtu dị ọde phọ ayoor olephiri ọony ụ́mar bọ? Ịki sịphe abumor phọ ayoor, ịlogh aani iyoor bin ẹmoogh.”

⁵AMozis ạsighe ḍipuru phọ ạbidi ạghi apuru Ọmoogh-we phọ.

⁶Kụ Ọmoogh-we phọ ạḅeni Mozis mọ,

⁷“Ịphen ạnmanyaan phọ aZelofahad ọghaaph bọ kụ ịne. Nạ kạngo ni bịdi bin ẹmoogh phọ ẹlo ạbidi. Sịphe asibin abumor ọde phọ ạbidi, sịghe bin ẹmoogh ọde phọ ạbidi ạngo bịdi.

⁸Kịa ạḅeni we Ịzirel mọ, ‘Eru mạar dị oye olephiri ọony ụ́mar kụ amugh, pọ ọnyani oye phọ aphin ni bin phọ ọdi.

⁹Kụ eru mạar dị oye phọ ọnyani ụ́mar, pọ abumor phọ ọdi ophin ni bin phọ ọdi.

¹⁰Kụ eru mạar dị oye phọ bumor ụ́moogh, pọ sịghe bin ẹmoogh phọ nyẹpe ọdi ạngo bumor ọde phọ ạbidi.

¹¹Kụ eru mạar dị ọde phọ ọdi bumor ụ́moogh, pọ sịghe bin ẹmoogh phọ ọdi ạngo ọnyo asiya ọdi lọ atuman nyọdi sịphe eghun phọ ạbidi. Ọphon phọ aḍighi ologh dị awe phọ Ịzirel kọsighe ghan kụ oogboom ịiruen, esi oghiil atum oghiil, ịdipho Ọmoogh-we phọ ạḅeni bọ Mozis.’”

¹²Ọmoogh-we phọ ạḅeni Mozis mọ, “Sịiny ạnyu Aruugum Abarim ạmiin de phọ mị rạngo bọ we phọ Ịzirel.

¹³Kụ nạ rọmiin de phọ, bịn kọsighe nyịna ọḅophoghiom rꞌawe phọ ạna ẹpe ọmar iḍim, ịdipho ọsighe bọ Eeron umor phọ ạna,

¹⁴ịdi eḍighi bọ nyina ịmi ị́naghanam mem mọ ạmuphe awe phọ Ịzirel ọgbaragbara bọ ẹpe ẹdala phọ aZin, ịmi íseere dọl iigbia risigh ạbidi sịphe ạmuum mọ.” (Mụen phọ pọ ạmuum mọ ẹpe Meriba ẹpe Kades ẹpe ẹdala phọ aZin.)

¹⁵Kụ aMozis ạḅeni Ọmoogh-we phọ,

¹⁶“Ọmoogh-we Ẹnaan oomo aruwaloor iphulupul phọ, mạ oye sịphe ogbo aḍita awe phọ Ịzirel,

¹⁷dị kaḍiemiom bịdi kụ ạtol sịphe ogbo phọ ạbidi, atorori bịdi amitiom, ạsighe bịdi ạki asiemi, ọbo aḍita awe Ọmoogh-we phọ kọtol ghan bọ dịadi iyool-ịga dị okoriom úlho.”

¹⁸Ọmoogh-we phọ ạḅeni Mozis mọ, “Sịghe Josua ọony phọ ạNon; ọdi kụ ạmoogh uwaloor. Sịghe rạghaagh ạna ạzuom nyọdi,

¹⁹ạsighe nyọdi ạmeremi risigh Ẹliazar oyil ạrikia phọ rꞌesomanan oomo aḍita awe phọ kụ ạngo nyọdi ọghor sịphe risigh ạbidi.

²⁰Kụ ạsighe iniin arughuenian phọ ạna ạngo nyọdi, ọbo oomo aḍita awe phọ Ịzirel ọnaghanan ghan nyọdi.

²¹Ọdi ạmeera ghan esomanan Ẹliazar oyil ạrikia phọ, ọpo kạsighe ghan bọ Yurim rꞌaTumim apuruom ghan ịlo ịiruen Ọmoogh-we phọ. Bịdi ọdaph ghan ịlo aJosua ạḅem kụ orelhe, ịlo ọdi ạḅem kụ oḅula oḍigh otu, ọdi rꞌoomo awe phọ Ịzirel rꞌaḍita ookpomoghan phọ.”

²²AMozis ạtuugh ịpe Ọmoogh-we phọ ạḅeni bọ nyọdi kụ aḍighi. Ọdi ạsighe Josua ạmeremi risigh Ẹliazar oyil ạrikia phọ rꞌaḍita ookpomoghan phọ;

²³kụ ạsighe rạghaagh ọdi ạzuom nyọdi, kụ agbiemi nyọdi iigbia phọ, ịdipho Ọmoogh-we phọ ạḅeni bọ nyọdi.