Read abua Igbiighi 28 Bible Online

Igbiighi 28 - abua bible

Igbiighi 28

¹Ọmoogh-we phọ ạḅeni Mozis mọ

²ạto ạngo we phọ Ịzirel mọ, “Ịpamanam ni ị́bile ghan ọphinyon ghan oomo ạrikia phọ ọngo ạmi, mꞌẹpe roguom ghan bọ nịan phọ, mꞌẹpe repur ghan bọ eeḅi eḍu phọ, tọrobo amem lọ ẹteeny.

³“Ẹphen phọ ẹkia dị kọpighiron ghan nịan egbodo Ọmoogh-we phọ aḍio etum ḍio: ịyal alephiri iyool-ịga lọ mẹman ḍiniin ạlha dị loor kẹ̋epuan.

⁴Oniin ọony oyool-ọga ạphighironaan ghan ḍịroor, ọphori ạphighironaan ghan dulhe.

⁵Ịsighe ịgbieneen ịbiakpa ẹto oniin ogbogh ọtoom ẹemor, ekironom eniin eeku amugeny ạmunum-ọliv, ẹlo ọphighironom ẹkia phọ.

⁶Ẹphen phọ ẹkia oguom ạnian, dị nyina kẹpighiron ghan ḍio etum ḍio, ẹpe Eegum aSainai, ẹkia eeḅi eḍu dị ọphighironaan Ọmoogh-we phọ.

⁷Ẹlo ẹkia ịpughol phọ dị ọḅaram ọḅel ọony oyool-ọga phọ, ịsighe eniin eeku amugbagara amiim emoor sịphe Ogbogo Ạdol Ọmoogh-we phọ.

⁸Nyọori phọ ọony oyool-ọga phọ, ịpighironaan ghan, ẹḅaram nyẹpe ịpughol phọ rꞌẹpe eeḅi eḍu phọ ọphighironaan bọ Ọmoogh-we phọ.

⁹“Ḍio ophooghian phọ, ịpighironom ghan ịyal ạnmuny iyool-ịga lọ mẹman ḍiniin ạlha dị loor kẹ̋epuan, ẹḅaram ịyal igbogh ịtoom ẹemor ịgbieneen ịbiakpa rꞌạmunum, ẹḅar eḅua, ẹlo ọphighironom ẹkia phọ.

¹⁰Ẹphen phọ ẹkia oguom ạnian, ẹlo ạtorobo aḍio ophooghian. Ẹkia dị nyina keguom ghan nịan ḍio etum ḍio phọ rꞌẹpe ịpughol phọ rꞌẹphen phọ kụ ịdi nyina kẹpinyon ghan.

¹¹“Emiighom ạtorobo ụnwanyu, nyina kẹpighiron ghan ẹkia oguom ạnian egbodo Ọmoogh-we phọ: ịyal ugheel ilephiri ạsinam, oniin odughuna rꞌoḍual ilephiri ạnmuny iyool-ịga lọ mẹman ḍiniin ạlha dị loor kẹ̋epuan.

¹²Ẹlo ẹkia ịbiakpa, ịpighironaan ghan ẹḅaram ịgbieneen ịbiakpa rꞌạmunum-ọliv: ẹlo aḍilephiri ạnam, ịraar igbogh ịtoom ẹemor; ẹlo odughuna, ịyal igbogh ịtoom ẹemor;

¹³ẹlo ọony oyool-ọga, oniin ogbogh ọtoom ẹemor. Ẹphen phọ ẹkia eeḅi eḍu dị ọphighironaan Ọmoogh-we phọ.

¹⁴Ẹlo ẹkia ịpughol, ịsighe ịyal ạkarama amiim emoorom, tọrobo aḍilephiri ạnam; ịsighe oniin rꞌegbem ạkarama emoorom odughuna; ịsighe oniin ọtoom emoorom, tọrobo ọony oyool-ọga. Ẹphen phọ ẹkia oguom ạnian, ẹlo ụnwanyu atum ụnwanyu ạlha phọ, kụ ịdi kọpighironaan ghan.

¹⁵Ịsighe ghan eniin ekpe ẹphighironom ghan ẹkia ịkaraph ẹngo Ọmoogh-we phọ. Ẹkia dị nyina keguom ghan nịan aḍio etum ḍio rꞌẹpe ịpughol phọ, rꞌẹphen phọ kụ ịdi nyina kẹpinyon ghan oomo amem.

¹⁶“Ẹyaal ọphel otene oghueniom Ọmoogh-we phọ kẹtol ghan ḍioph rꞌinya aḍughul-otu ọḅel ụnwanyu ạlha phọ.

¹⁷Ḍioph rꞌoogh aḍughul-otu ọḅel ụnwanyu ạlha phọ aḍio ẹyaal. Esi oḍual aḍughul-otu kụ ẹdi nyina kele ghan brẹd dị yist ụ́logh.

¹⁸Ạḍiḅel aḍio phọ, pọ aḍio ookpomoghan ooseeny, kékumuan ghan rukumuan.

¹⁹Ẹphighironaan ghan ẹkia oguom ạnian ẹngo Ọmoogh-we phọ: ịyal ugheel ilephiri ạsinam, oniin odughuna rꞌoḍual ilephiri iyool-ịga ịlo mẹman ḍiniin ạlha dị loor kẹ̋epuan.

²⁰Ẹlo ẹkia ịbiakpa, ịpighironaan ghan ẹḅaram ịgbieneen ịbiakpa rꞌạmunum-ọliv: ẹlo aḍilephiri ạnam ịraar ịtoom ẹemor; ẹlo odughuna, ịyal igbogh ịtoom ẹemor;

²¹ẹlo ọony oyool-ọga, oniin ogbogh ọtoom ẹemor.

²²Ịsighe ghan eniin ekpe ẹphighironom ghan ẹkia ịkaraph ẹngo Ọmoogh-we phọ, ịlo owophom awe phọ.

²³Ẹkia dị nyina keguom ghan nịan aḍio etum ḍio phọ rꞌịphen phọ kụ ịdi nyina kẹpinyon ghan.

²⁴Eniin phọ eḍighinom mọ kụ ịdi nyina kẹdaph ghan kụ ẹpinyon ghan rịkia eeḅi eḍu dị ọngo Ọmoogh-we phọ oomo aḍio tụtu ẹman oḍual phọ aḍio phọ. Ịyaar aghuḍum dị nyina keguom ghan nịan aḍio etum ḍio rꞌẹpe ịpughol phọ rꞌịphen phọ kụ ịdi nyina kẹpinyon ghan.

²⁵Kụ rẹman oḍual aḍughul-otu, pọ aḍio ookpomoghan ooseeny phọ, kékumuan ghan rukumuan ḍio phọ ạḍiphe.

²⁶“Kẹn, ḍio phọ ạḍiphe ịḅel iimuma phọ nyina kẹsighe bọ imoom iimuma phọ ẹsighe etu ọphighironom ẹkia ịbiakpa phọ ọngo Ọmoogh-we phọ riiḍio ẹyaal phọ anyina, ịmoogh ookpomoghan ooseeny, kékumuan ghan rukumuan.

²⁷Ẹphighironaan ghan ẹkia oguom ạnian ịdipho ẹpe eeḅi eḍu dị ọphighironaan ọngo Ọmoogh-we phọ: ịyal ugheel ilephiri ạsinam, oniin odughuna rꞌoḍual ilephiri iyool-ịga ịlo mẹman ḍiniin ạlha dị loor kẹ̋epuan.

²⁸Ẹlo ẹkia ịbiakpa, ịpighironaan ghan ẹḅaram ịgbieneen ịbiakpa rꞌạmunum-ọliv: ẹlo aḍilephiri ạnam, ịraar igbogh ịtoom ẹemor; ẹlo odughuna, ịyal igbogh ịtoom ẹemor;

²⁹ẹlo ọony oyool-ọga, oniin ogbogh ọtoom ẹemor.

³⁰Ịsighe ghan eniin ekpe ẹphighironaan ghan ẹkia ịkaraph ẹngo Ọmoogh-we phọ, ịlo owophom awe phọ.

³¹Ẹkia dị nyina keguom ghan nịan aḍio etum ḍio phọ rꞌẹpe ịbiakpa phọ rꞌẹpe ịpughol phọ rꞌịphen phọ kụ ịdi nyina kẹpinyon ghan.