Read abua Igbiighi 29 Bible Online

Igbiighi 29 - abua bible

Igbiighi 29

¹“Ḍịḅel aḍughul-otu ụnwanyu dị amuneniom oḍual lhạ phọ nyina ẹmoogh ookpomoghan ooseeny. Kékumuan ghan rukumuan ḍio phọ ạḍiphe. Aḍio phọ ạḍiphe aḍio ophula yogh aruuḍue.

²Ẹphighironaan ghan ẹkia oguom ạnian ịdipho ẹpe eeḅi eḍu rọpighironaan ghan bọ kọngo Ọmoogh-we phọ: oniin onyugheel aḍilephiri ạnam, oniin odughuna rꞌoḍual ilephiri iyool-ịga ịlo mẹman ḍiniin ạlha dị loor kẹ̋epuan.

³Ẹlo ẹkia ịbiakpa, ịpighironaan ghan ẹḅaram ịgbieneen ịbiakpa rꞌạmunum-ọliv: ẹlo aḍilephiri ạnam, ịraar igbogh ịtoom ẹemor; ẹlo odughuna, ịyal igbogh ịtoom ẹemor;

⁴ẹlo ọony oyool-ọga, oniin ogbogh ọtoom ẹemor.

⁵Ịsighe ghan eniin ekpe ẹphighironom ghan ẹkia ịkaraph ẹngo Ọmoogh-we phọ, ịlo owophom awe phọ.

⁶Ẹkia dị nyina keguom ghan nịan aḍio etum ḍio phọ rꞌẹpe ịbiakpa phọ rꞌẹpe ịpughol phọ rꞌẹpe ạḍiḅel aḍio ụnwanyu phọ rꞌịphen phọ kụ ịdi nyina kẹpinyon ghan. Ịphen phọ ạrikia eeḅi eḍu dị ọphighironaan Ọmoogh-we phọ.

⁷“Ḍioph aḍughul-otu oḍual ụnwanyu phọ nyina ẹmoogh ookpomoghan ooseeny, esooromi siloor anyina, kékumuan ghan rukumuan ḍio phọ ạḍiphe.

⁸Ẹphighironaan ghan ẹkia oguom ạnian ịdipho ẹpe eeḅi eḍu dị ọphighironaan ọngo Ọmoogh-we phọ: oniin onyugheel aḍilephiri ạnam, oniin odughuna rꞌoḍual alephiri iyool-ịga ịlo mẹman ḍiniin ạlha dị loor kẹ̋epuan.

⁹Ẹlo ẹkia ịbiakpa, ịpighironaan ghan ẹḅaram ịgbieneen ịbiakpa rꞌạmunum-ọliv: ẹlo aḍilephiri ạnam, ịraar igbogh ịtoom ẹemor; ẹlo odughuna, ịyal igbogh ịtoom ẹemor;

¹⁰ẹlo ọony oyool-ọga, oniin ogbogh ọtoom ẹemor.

¹¹Ịsighe ghan eniin ekpe ẹphighironaan ghan ẹkia ịkaraph ẹngo Ọmoogh-we phọ, ịlo owophom awe phọ. Ẹkia dị nyina keguom ghan nịan aḍio etum ḍio phọ rꞌẹpe ịbiakpa phọ rꞌẹpe ịpughol phọ rꞌịphen phọ kụ ịdi nyina kẹpinyon ghan.

¹²“Ḍioph rꞌoogh aḍughul-otu oḍual ụnwanyu phọ nyina ẹmoogh ookpomoghan ooseeny, kékumuan ghan rukumuan, elhianaan Ọmoogh-we phọ ẹyaal oḍual aḍughul-otu.

¹³Ḍịḅel aḍio phọ, ẹphighironaan ghan ẹkia oguom ạnian ịdipho ẹkia eeḅi eḍu dị ọphighiron ọngo Ọmoogh-we phọ: ḍioph rꞌịraar ilephiri ugheel ạsinam, ịyal idughuna rꞌiḍioph rꞌinya ilephiri ạnmuny iyool-ịga ịlo mẹman ḍiniin ạlha dị loor kẹ̋epuan.

¹⁴Ẹlo ẹkia ịbiakpa, ịpighironaan ghan ẹḅaram ịgbieneen ịbiakpa rꞌạmunum-ọliv: ẹlo aḍilephiri ạnam, ịraar igbogh ịtoom ẹemor; ẹlo odughuna, ịyal igbogh ịtoom ẹemor;

¹⁵ẹlo ọony oyool-ọga, oniin ogbogh ọtoom ẹemor ẹḅaram ẹkia ịpughol phọ.

¹⁶Ịsighe ghan eniin ekpe ẹphighironaan ghan ẹkia ịkaraph ẹngo Ọmoogh-we phọ, ịlo owophom awe phọ. Ẹkia dị nyina keguom ghan nịan aḍio etum ḍio phọ rꞌẹpe ịbiakpa phọ rꞌẹpe ịpughol phọ rꞌịphen phọ kụ ịdi nyina kẹpinyon ghan.

¹⁷“Ḍio phọ ạḍiphe emuneniom bọ ịyal, ẹphighironaan ghan ẹkia oguom ạnian ịdipho ẹkia eeḅi eḍu dị ọphighironaan ọngo Ọmoogh-we phọ: ḍioph rꞌịyal ilephiri ugheel ạsinam, ịyal idughuna rꞌiḍioph rꞌinya ilephiri iyool-ịga ịlo mẹman ḍiniin ạlha dị loor kẹ̋epuan.

¹⁸Eniin phọ eḍighinom ạḍiḅel aḍio phọ kụ ịdi nyina kẹdaph ghan kụ ẹpinyon ghan rịkia phọ.

²⁰“Ḍio phọ ạḍiphe emuneniom bọ ịraar, ẹphighironaan ghan ẹkia oguom ạnian ịdipho ẹkia eeḅi eḍu dị ọphighironaan ọngo Ọmoogh-we phọ: ḍioph rꞌoniin ilephiri ugheel ạsinam, ịyal idughuna rꞌiḍioph rꞌinya ilephiri iyool-ịga ịlo mẹman ḍiniin ạlha dị loor kẹ̋epuan.

²¹Eniin phọ eḍighinom ạḍiḅel aḍio phọ kụ ịdi nyina kẹdaph ghan kụ ẹpinyon ghan rịkia phọ.

²³“Ḍio phọ ạḍiphe emuneniom bọ inya, ẹphighironaan ghan ẹkia oguom ạnian ịdipho ẹkia eeḅi eḍu dị ọphighironaan ọngo Ọmoogh-we phọ: ḍioph ilephiri ugheel ạsinam, ịyal idughuna rꞌiḍioph rꞌinya ilephiri iyool-ịga ịlo mẹman ḍiniin ạlha dị loor kẹ̋epuan.

²⁴Eniin phọ eḍighinom ạḍiḅel aḍio phọ kụ ịdi nyina kẹdaph ghan kụ ẹpinyon ghan rịkia phọ.

²⁶“Ḍio phọ ạḍiphe emuneniom bọ oogh, ẹphighironaan ghan ẹkia oguom ạnian ịdipho ịyaar aghuḍum eeḅi eḍu dị oḍighinaan Ọmoogh-we phọ: esugha ilephiri ugheel ạsinam, ịyal idughuna rꞌiḍioph rꞌinya ilephiri iyool-ịga ịlo mẹman ḍiniin ạlha dị loor kẹ̋epuan.

²⁷Eniin phọ eḍighinom ạḍiḅel aḍio phọ kụ ịdi nyina kẹdaph ghan kụ ẹpinyon ghan rịkia phọ.

²⁹“Ḍio phọ ạḍiphe emuneniom bọ odiiny, ẹphighironaan ghan ẹkia oguom ạnian ịdipho ịyaar aghuḍum eeḅi eḍu dị oḍighinaan Ọmoogh-we phọ: ọphaanya ilephiri ugheel ạsinam, ịyal idughuna rꞌiḍioph rꞌinya ilephiri iyool-ịga ịlo mẹman ḍiniin ạlha dị loor kẹ̋epuan.

³⁰Eniin phọ eḍighinom ạḍiḅel aḍio phọ kụ ịdi nyina kẹdaph ghan kụ ẹpinyon ghan rịkia phọ.

³²“Ḍio phọ ạḍiphe emuneniom bọ oḍual, ẹphighironaan ghan ẹkia oguom ạnian ịdipho ịyaar aghuḍum eeḅi eḍu dị oḍighinaan Ọmoogh-we phọ: oḍual alephiri ugheel ạsinam, ịyal idughuna rꞌiḍioph rꞌinya ilephiri iyool-ịga ịlo mẹman ḍiniin ạlha dị loor kẹ̋epuan.

³³Eniin phọ eḍighinom ạḍiḅel aḍio phọ kụ ịdi nyina kẹdaph ghan kụ ẹpinyon ghan rịkia phọ.

³⁵“Ḍio phọ ạḍiphe emuneniom bọ ọphaanya, nyina ẹmoogh ookpomoghan ooseeny, kékumuan rukumuan ḍio phọ ạḍiphe.

³⁶Ẹphighironaan ghan ẹkia oguom ạnian ịdipho ẹkia eeḅi eḍu dị ọngo Ọmoogh-we phọ: oniin onyugheel aḍilephiri ạnam, oniin odughuna rꞌoḍual ilephiri iyool-ịga ịlo mẹman ḍiniin ạlha dị loor kẹ̋epuan.

³⁷Eniin phọ eḍighinom ạḍiḅel aḍio phọ kụ ịdi nyina kẹdaph ghan kụ ẹpinyon ghan rịkia phọ.

³⁹“Nyina ikori ghan ẹphinyon rịkia oguom ạnian, rꞌịbiakpa, rꞌịpughol phọ ịphen ẹngo Ọmoogh-we phọ mem ạrayaal phọ anyina, ẹḅaram rꞌịpe nyina eguanaan bọ rꞌophooph ologhi rꞌẹboroph phọ.”

⁴⁰AMozis ạtuugh oomo ịtooghi phọ ịpe Ọmoogh-we phọ ạto bọ ạngo nyọdi ạghaaph ạḅeni we phọ Ịzirel.