Read abua Igbiighi 30 Bible Online

Igbiighi 30 - abua bible

Igbiighi 30

¹AMozis ạghaaph ạḅeni bụo ạrumhu ịsiphe arughunughun phọ Ịzirel mọ ịphen phọ kụ ịdi Ọmoogh-we phọ ạto.

²Eru mạar dị oye aguanaan Ọmoogh-we phọ oguan, kẹn aghunya ịlo ọphamam uwaloor ọdi, pọ ọdi kụ́bile ịpe ọdi ạghaaph bọ. Ọdi ạtuugh ni ịpe ẹḍua bọ ọnhu phọ ọdi emite aḍighi.

³Eru mạar dị ạnir-ephoph aguanaan Ọmoogh-we phọ oguan kụ akunya iikunya ạngo loor ọdi sịphe otu ọde phọ ọdi mem ẹghoroghor phọ ọdi

⁴kụ ọde phọ ọdi ạnaghan ni oguanaan phọ ọdi rꞌiikunya phọ ịpe ọdi aghunya bọ ọphamam uwaloor phọ ọdi kụ nyọdi ịyaar ọḅeni, pọ oomo aruguan phọ ọdi ẹmeera ni.

⁵Kụ eru mạar dị ọde phọ ọdi akporom nyọdi ḍio phọ ạḍiphe ọdi rạḅemogh bọ mọ kụ́ḅemogh ịphen, pọ oguanaan phọ mꞌiikunya phọ ọdi, pọ ịlo kẹmoogh ẹmhu ílho mun. Pọ Ọmoogh-we phọ kạsar ri ạbilenaan, ịdi eḍighi bọ ọde ọdi akporom ni nyọdi mọ kụ́tol sịphe ụḅemogh ịphen.

⁶Eru mạar dị ọnyani dị ilhom kạ̋al aguanaan bọ Ọmoogh-we phọ oguan rꞌọdorodo ịpe ẹḍua bọ sịphe ọnhu phọ ọdi emite ịlo uwaloor ọdi kụ ạal ilhom

⁷kụ olhom mọ ọdi ạnaghan aani, kụ aḅoorian bịn, ḍio phọ ạḍiphe dị nyọdi úkporom, pọ oguan phọ ọdi rꞌiikunya phọ ọdi ẹmeera ni.

⁸Kụ eru mạar dị olhom mọ ọdi akporom ni nyọdi ḍio phọ ạḍiphe ọdi ạnaghan bọ, pọ ọdi maḍighi ịdi ịpe ạnir phọ aguanaan bọ rꞌịpe ạnir phọ ạḅemogh bọ ịlo uwaloor phọ ọdi ị́moogh mun ịyaar dị keḍighi. Pọ Ọmoogh-we phọ mạsar ạbilenaan nyọdi.

⁹Tọrobo oguan lọ ekpukele ạnir mꞌạnir lọ ạḅam ikpoki aguanaan, ịlo bịdi ọḅemogh ịlo aruwaloor ạbidi, pọ edi ni ẹmhu ạbidi.

¹⁰Eru mạar dị ạnir ạrol kꞌolhom mọ kụ aguanaan Ọmoogh-we phọ oguan, aghunya yogh iikunya ịlo uwaloor ọdi agurughian

¹¹kụ olhom mọ ọdi ạnaghan aani, kụ aḅoorian bịn, ḍio phọ ạḍiphe nyọdi ókporom, pọ oguan phọ ọdi rꞌiikunya phọ ọdi ẹmeera ni.

¹²Kụ eru mạar dị olhom mọ ọdi akporom nyọdi ḍio phọ ạḍiphe ọdi ạnaghan aani bọ, pọ ọdi mạphueghi ịpe ạnir phọ ạḅemogh bọ ị́moogh mun ḍipuru, mꞌoguanaan phọ mꞌogurughian phọ ọdi. Pọ Ọmoogh-we phọ mạsar ạbilenaan nyọdi.

¹³Tọrobo oguan rꞌạtorobo iikunya ịlo aloor ọdi, pọ olhom ọdi kạkool ịkool, kẹn olhom mọ ọdi kạawalami ạaḅemion ạpue.

¹⁴Kụ eru mạar dị olhom mọ ọdi aḅoronom nyọdi ịlo aḍio rꞌaḍio, pọ ọdi ạmeeraam ni ruguan phọ rꞌiikunya phọ rꞌịgurughian phọ ọdi. Ịpe ọdi arool bọ akpolha, ọdi ạkparami ni, ịdi eḍighi bọ ọdi aḅoronom ni ạnir phọ ḍio phọ ạḍiphe ọdi olhom ạnaghan aani bọ ịpe ọdi rạḅemogh bọ.

¹⁵Eru mạar dị olhom mọ nyọdi úkporom kụ ạawalami ạaḅemion ạphue, pọ aḍipuru phọ edi ni ẹmhu olhom mọ.

¹⁶Ịphen phọ ịtooghi dị Ọmoogh-we phọ ạto ạngo Mozis ịlo olhom rꞌạnir, rꞌịlo ọde rꞌọnyani, mem ẹghoroghor ọnyani phọ, dị odi sịphe kꞌọde phọ ọdi.