Read abua Igbiighi 34 Bible Online

Igbiighi 34 - abua bible

Igbiighi 34

¹Ọmoogh-we phọ ạḅeni Mozis mọ,

²“Tọoghi ạngo we phọ Ịzirel ạḅeni bịdi mọ, ‘Mem dị nyina kẹki bọ esi ẹpe ade phọ aKenan (ḍịphe phọ kụ ade phọ kemeel bọ eḍigh ḍịghaagh anyina eḍighi ẹmoogh anyina rꞌoomo ạruuku ịsiphe ade phọ),

³amarugh ạḍighaagh esoorom mọ anyina kamiigh sịphe Ẹdala Ịisaar aZin ạki asiemi ẹpe ọku Idom; kụ ọku anyina ẹpe ạḍighaagh esoorom mọ, oomo ẹpe oogbom Ọphiiny-Ạla ẹpe erumuḍio phọ remite ghan bọ.

⁴Ọku ọlo esoorom mọ akiton ẹpe Ịbaay Akrabim ạḅeeny apun ẹpe Zin, ḍịghaagh esoorom ẹpe Kades Bania kụ eekuna. Kụ aten ạki asi ẹpe Hazar Adar, kụ ạḍua ạki asi Azmon.

⁵Ọku phọ ạḍua sịphe Azmon kụ ạki asi ẹpe eḍiiny Ijipt. Ọphiiny aMeditarenian phọ kụ eekuna.

⁶“‘Ọku ọlo ẹpe erumuḍio phọ remeel ghan bọ, Ọphiiny Meditarenian phọ.

⁷“‘Ọphon kụ ọku anyina ẹpe ạga ephunom mọ. Amiigh sịphe Ọphiiny aMeditarenian phọ, ạki asiemi ẹpe Eegum aHor.

⁸Amiigh sịphe Eegum aHor, ạki asiemi ẹpe Ịbaay ạHamat; eekuna ọku phọ anyina ẹpe Zedad.

⁹Ọku phọ ạki ghisigh asi ẹpe Zifron; ẹpe Hazar Enan kụ eekuna. Ịphen kụ ạruuku anyina ịlo ẹpe ạḍighaagh ekeeny phọ.

¹⁰“‘Imiigh ẹpe Hazar Enan edoghoḍi ịiku ịlo ạḍighaagh phọ ẹpe erumuḍio phọ remite ghan bọ esiemi Shefam.

¹¹Ọku phọ ạḍua sịphe Shefam ạki asi ẹpe Hạbel, ẹpe erumuḍio phọ remite ghan bọ, ẹpe Ain. Ọku phọ amiigh sịphe kụ ạki asi ẹpe iigbom Ọphiiny aGalili ọman phọ ẹpe erumuḍio phọ remite ghan bọ.

¹²Ọku phọ ạḍua esoorom mọ ạki asi ẹpe Jọdan, ạki asi ẹpe Ọphiiny-Ạla. “‘Ẹpe phọ kụ eekuna. Ḍịen phọ kụ ade phọ anyina rꞌinya ạruuku phọ ekoom bọ.’”

¹³ Kụ aMozis ạḅeni weye phọ Ịzirel mọ, “Ḍịen phọ kụ ade phọ nyina rẹki bọ ọmoogh phọ kọsa ghan bọ ịlhel kụ odiom ịdipho Ọmoogh-we phọ ạtooghi bọ ạngo esugha arughunughun phọ rꞌẹkpigh eghun phọ.

¹⁴Eghun phọ aRuben rꞌeghun phọ ạGad rꞌẹkpigh eghun phọ ạManase, bụo ọto ạbidi rꞌọto ạbidi, mọmoogh ni bin mụo ạbidi,

¹⁵ẹpe ọman ạJodan repogh bọ Jeriko, ẹpe erumuḍio phọ remite ghan bọ.”

¹⁶Ọmoogh-we phọ ạḅeni Mozis mọ,

¹⁷“Ịphen kụ asiḍien awe phọ kodiemi bọ bịdi rere phọ: Ẹliazar oyil ạrikia phọ rꞌaJosua ọony phọ ạNon.

¹⁸Sịghe oniin oḍiemiom eghun ạḅaram ọloghonaan ḍịghaagh madi phọ”

¹⁹Ịphen kụ asiḍien awe phọ nạ kạsighe bọ: [Eghun] — [Uw-ẹmhu] Juda — Kẹleb ọony phọ aJefune Sịmion — Sẹlumiel ọony phọ Amihud Bẹnjamin — Elidad ọony phọ aKislon Dạn — Buki ọony phọ aJogli Mạnase — Hạniel ọony phọ Efod Ifraim — Kẹmuel ọony phọ aSiftan Zẹbiulon — Elizafan ọony phọ aPanak Ịsaka — Pạltiel ọony phọ Azan Ạser — Ahihud ọony phọ aSelomi Nạftalai — Pẹdahel ọony phọ Amihud

²⁹Bụen phọ kụ ạbudi Ọmoogh-we phọ ạto bọ ạḅeni Mozis mọ odianaan we phọ Ịzirel bin ẹmoogh mụo ạbidi sịphe ade phọ aKenan.