Read abua Igbiighi 35 Bible Online

Igbiighi 35 - abua bible

Igbiighi 35

¹Ọmoogh-we phọ ạḅeni Mozis ẹpe ạḍiyaghaghaany ade phọ ạMoab ẹpe ẹḅeenyom mọ ạJodan dị ọḍua Jeriko rotu

²mọ ạto ạḅeni we phọ Ịzirel mọ, “Ịsighe sịphe abin ẹmoogh phọ anyina ẹngaani bụo kꞌaLivai phọ rạmha ịlo bịdi kotughogh, ẹsighe de lọ bịdi kọmoogh ịyaar olhe; de phọ ạḍiphe ekoom bọ rạmha phọ ẹngo bịdi.

³Ạramha phọ eḍighi ịlo ạbidi bịdi orughogh; ade phọ etuman ekoom bọ ẹmoogh riisi ịḅal ịlo ạsinam rꞌoomo ịpheri ịnam mọ ạbidi.

⁴Arere ịḅal ịnam ekoom bọ rạmha phọ kọngo bọ bụo kꞌaLivai, emiigh sịphe iikpe ẹmha phọ kụ ẹsighe rẹki ẹman 450 akuḅu ekitonom.

⁵Inya phọ ạraghaagh ade phọ eeleeny ni ḍịdoony rꞌẹreghe ẹman 900 akuḅu, kụ ẹmha phọ ẹrol ogbo phọ.

⁶Sịphe ạramha phọ ịpe nyina kẹngo bọ bụo kꞌaLivai, nyina kẹson odiiny ạramha oḍigh aḍibuo lọ oye aghiigh matuman ọdi kasuma ghan akeel. Ịḅar kẹn inyadi rꞌịyal ịnon ạramha ẹloghom ẹngo bịdi.

⁷Oomo ạramha phọ nyina kẹngo bọ bụo kꞌaLivai kẹman bọ inyadi rꞌọphaanya ạramha, ọḅaram rꞌarere ịḅal ịnam mọ ạbidi.

⁸Ạramha phọ ịpe nyina kẹsighe bọ esi arughunughun phọ Ịzirel keḍighi ịduon: eghun lọ ephin mugbogh abin, ọgbatan sịphe ẹminighan eghun lọ ephin mụbam abin, ọgbatan ẹnum abin. Ịtuugh ịdipho odiemi bọ bịdi kụ ẹgbarion ẹngo bụo kꞌaLivai phọ.”

⁹Ọmoogh-we phọ ạghaaph ạḅeni Mozis

¹⁰mọ ạḅeni we phọ Ịzirel mọ, “Mem dị nyina mẹḅeeny Ọphiiny ạJodan ephun ẹghi esi ẹpe ade phọ aKenan,

¹¹ịgbatan eseere gem rạmha dị keḍighi rạmha dị koḍigh ghan ḍibuo ọphelaam ẹmhu, ịdi oye lọ ạsighe elegheri kụ aghiighom matuman ọdi kasuma ghan akeel.

¹²Ạramha phọ ịpe phọ eḍighi esi anyina rạmha dị oye lọ aghiigh oye kạpela ghuḍum mọ ọdi atene, ọbo ọnyo asiya lọ rạwa oḅulemian kakiigh ghan bọ nyọdi ekperenom. Oye lọ ạko enu kokiigh emuton dị ọdi mạmeera erugh ịiruen kụ osoph ḍighiton phọ ophume.

¹³Esi ạramha phọ ịpe nyina kẹngo bọ bụo kꞌaLivai, ịsaḅar odiiny ạramha eseere gem mọ eḍighi rạmha ọphela aghuḍum otene,

¹⁴ịraar ạramha ạga emitenom erumuḍio phọ ẹpe Jọdan, ịraar ẹpe ade phọ aKenan.

¹⁵Tọrobo oye, mꞌọlo ịsiphe awe phọ Ịzirel mꞌooruen mꞌọlo rꞌanyina erughan, tọrobo oye lọ ạsighe elegheri kụ aghiighom oye, pọ asuma ghan agheel nyeniin ẹpe phọ.

¹⁶“Kụ ọlo, eru mạar dị oye ạsighe okuron kụ ạguroghom oye kụ oye phọ amugh, pọ ọdi ọokom-enu, pọ ikiigh nyọdi egina amem.

¹⁷Eru mạar dị oye ạsighe ikpo kụ aroḅol oye kụ oye phọ amugh, pọ ọdi ọokom-enu, pọ ikiigh nyọdi egina amem.

¹⁸Eru mạar dị oye ạsighe ọkolhom kụ ạguroghom oye kụ oye phọ amugh, pọ ọdi ọokom-enu, pọ ikiigh nyọdi egina amem.

¹⁹Ọnyo asiya ọpo oghiigh kụ aghiigh ghan ọokom-enu phọ tọrobo esi lọ ạmiin.

²⁰“Eru mạar dị oye ạsighe mụlogh-ḍien kụ azuom oye aghiigh; iini ạbona esi kụ azuom oye aghiigh;

²¹iini akuphogh oye kụ aghiigh; pọ ikiigh ghan ni oye phọ ọpo, ọdi ọokom-enu. Ọnyo asiya ọpo oghiigh bọ kụ aghiigh ghan ọokom-enu phọ. Rọghi rọteeny ọokom-enu phọ bịn aghiigh ni nyọdi.

²²“Kụ ọlo, eru mạar dị oye ụ́tuan ẹpomoghian ekperenom bịn kụ aḍighi oye ịyaar aghiigh; iini ọ́bona esi kụ ạgur aghiigh;

²³kẹn óroph ekpo dị emeelom oye kekiigh; ọdi oye phọ ọ́miin kụ emeelom oye phọ kụ oye phọ amugh, dị ịyaar ụ́ugbanaghian ḅịle kẹn óosophoghian nyọdi oḍighi ịyaar;

²⁴pọ aḍita ookpomoghan phọ ọdaph iilogh phọ ịphen osoph ọoruen okeelemi oye phọ aghiigh bọ matuman phọ ọdi kụ opume nyọpo rạle bọ ghẹlhe ịḅaal ọnyo asiya phọ ọdi.

²⁵Aḍita ạbuo ookpomoghan phọ ọotoghion elegheri oye phọ aghiigh bọ matuman phọ ọdi ọphel ọsighe esi ọpo rạle bọ ghẹlhe phọ oghiigh bọ ọnyo asiya phọ ọdi, ọsighe nyọdi oḅulemi ẹpe ẹmha phọ ọdi aḍigh bọ ḍibuo, ọdi arugh ẹpe phọ tụtu oyil abiil phọ amugh.

²⁶Eru mạar dị ọokom-enu phọ ạḍua atenom ọku ẹpe ọdi asuma agheel aḍigh ḍibuo,

²⁷kụ ọnyo asiya ọpo oghiigh bọ ạwa ọokom-enu phọ ạmiin kụ aghiigh, pọ oḅulemian phọ ọphon kózu ịḅaal,

²⁸ịdi eḍighi bọ oye phọ aghiigh bọ matuman phọ ọdi mụtol ẹpe ẹmha phọ ọdi asuma bọ agheel aḍigh ḍibuo phọ tụtu oyil abiil phọ mamugh. Oyil abiil phọ romugh bịn mẹteeny mem dị ọdi katigheel sịphe abin ẹmoogh phọ ọdi atugh.

²⁹Ịtooghi phọ ịphen kụ ịdi nyina kẹsighe ghan kụ eegboom ịiruen, oghiil atum oghiil phọ anyina, tọrobo esi lọ nyina erugh.”

³⁰“Ọokom-enu lọ erugh aḍuugh mephum, ikiigh ghan ni. Kụ olọ ạsiagba oniin oye dị ọmiin aani bịn ị́gbaanyan, ẹḍua ịyal awe kụ ẹghiom ạnyu.

³¹Oghiigh ghan ni ọokom-enu. Erugh aḍuugh phọ rọ́taam ghan ikpoki.

³²Ímeera ghan mọ ọokom-enu dị asuma agheel ẹmha aḍigh ḍibuo ạkpeeghi ikpoki bịn arigheel mem dị oyil abiil phọ kőmugh.

³³Nyina emeel eḍighanaan, pọ nyina mẹepu de nyina edi bọ. Ozu ịḅaal rạapu ghan de phọ; tụtu ọokom-enu phọ omugh, pọ kótue oḅoor de phọ ozu bọ ịḅaal phọ.

³⁴Kẹ́epu ghan de phọ nyina erugh bọ, ịdi eḍighi bọ mị kụ Ọmoogh-we phọ kụ mị atugh igbo awe phọ Ịzirel.”