Read abua Igbiighi 8 Bible Online

Igbiighi 8 - abua bible

Igbiighi 8

¹Ọmoogh-we phọ ạghaaph ạḅeni Mozis mọ,

²“Ḅẹni Eeron mọ, mem lọ ọdi rạsuughi ịtozi phọ, oḍual phọ ịtozi phọ ẹngo ghan ḍịḅaal esomanan ịmeremiom ịtozi phọ.”

³Kụ Eeron ạtuugh ghan ịdipho phọ aḍighi ghan; ạsuughi ghan ịtozi phọ ịdi kẹngo ghan ḍịḅaal esomanan ịmeremiom ịtozi phọ, ịdipho ọḅeni bọ Mozis.

⁴Ịmeremiom ịtozi phọ oḍighinom gol dị oobum, emiigh kꞌẹphen ude phọ kụ esi ẹpe ạnyu phọ. Ụdaph ịpe Ọmoogh-we phọ aḍeenaan bọ Mozis kụ ọtuugh ọlem ịmeremiom ịtozi phọ.

⁵Ọmoogh-we phọ ạghaaph ạḅeni Mozis mọ,

⁶“Gbạtan bụo kꞌaLivai ạsighe bịdi esi awe phọ Ịzirel aseere gem, aḍighi bịdi ịlo bịdi koseleman.

⁷Ịduon kụ ịdi nạ kaselemi bọ bịdi, sạraghi bịdi mụum oselemian aloor phọ. Bịdi oghula oomo aloor phọ ạbidi, ootologh oomo arukpe phọ ạbidi, oselemi asiloor ạbidi ẹḅaal.

⁸Bịdi ọsighe onyugheel aḍilephiri ạnam rꞌạraraar ọmooghom ịbiakpa rꞌigeny ịgbieneen ịbiakpa dị okironom mụnum, rꞌọnon onyugheel aḍilephiri ạnam ọdi koḍighinom ịyaar aghuḍum ịkaraph.

⁹Kpookpomoghi oomo awe phọ Ịzirel egina esi, ạḅeni bụo aLivai phọ ọmeregha egbodo Ogbogo Ạdol phọ ạmi.

¹⁰Awe phọ Ịzirel kọḅamaghi rạghaagh ạbidi loor ạrumhu ạbidi,

¹¹kụ Eeron awoph kꞌaLivai phọ ạsighe bịdi ạḅogh ụngo ịmi, ạphighiron bịdi ịdipho ẹkia esi awe phọ Ịzirel ẹrol dị bịdi oḍighi yogh ghan oḍighi phọ ạmi.

¹²Kụ bụo kꞌaLivai phọ ọsighe rạghaagh ạbidi ọzuom rụmhu ilephiri ạsinam mọ, kụ ọsighe nyoniin oḍighinom ịyaar aghuḍum ịkaraph, ọsighe nyọori phọ oḍighinom ịyaar aghuḍum oguom ạnian ọngo ạmi. Ịduon phọ pọ moselemi bụo kꞌaLivai ọsighe esi ịkaraph phọ ạbidi.

¹³“Sịghe bụo kꞌaLivai phọ ạghi ạmeremi risigh Eeron rꞌạnmuny phọ ọdi, kụ ạḅogh bịdi ụngo ịmi ịdipho ẹkia lọ ọphighironaan.

¹⁴Ịduon phọ pọ nạ mạgbatan bụo kꞌaLivai phọ ạsighe esi awe phọ Ịzirel, bịdi moḍighi bụo ạmi.

¹⁵Selemi bịdi ạḅaalami, ạsighe bịdi ạphighiron ịdipho ẹkia ụngo ịmi. Ịphen phọ reten, bụo kꞌaLivai phọ ọghi sịphe Ogbogo Ạdol Ọmoogh-we phọ, kụ oḍighi yogh ghan iiḍighi ịsiphe phọ.

¹⁶Oomo ịkpana ạnmuny Ịzirel bụo ạmi. Mị mạsaḅar bụo kꞌaLivai ạsighe dịadi bịdi ịkpana ạnmuny Ịzirel oḍighi bụo ạmi.

¹⁷Mem dị mị ạze ịkpana ạnmuny phọ Ijipt, mị ụsighe ni oomo ịkpana ạnmuny phọ Ịzirel aḍighi bịdi bụo ạmi ḅịle rꞌoomo ịkpana ạnmuny ịnam mọ.

¹⁸Nyịidipho mị mạsaḅar bụo kꞌaLivai phọ ạsighe dịadi bịdi kụ ịkpana ạnmuny phọ Ịzirel.

¹⁹Kụ mị mạsighe bụo kꞌaLivai anmoom Eeron rꞌạnmuny phọ ọdi ịdipho ịyaar lọ ọngaani, ạgbatan ạsighe esi awe phọ Ịzirel mọ bịdi oḍighinaan ghan oḍighi awe phọ Ịzirel sịphe Ogbogo phọ, ookpereghi ghan ịkaraph phọ awe phọ Ịzirel, ọbo ẹepoph kesoorom ghan bọ bịdi mem lọ bịdi ọghi sịphe Ạdol Iigbia phọ.”

²⁰Kụ aMozis, Eeron rꞌoomo aḍita awe phọ Ịzirel ụtuugh ghan oomo phọ ịpe Ọmoogh-we phọ ạḅeni bọ bịdi ịlo ạbuo kꞌaLivai phọ kụ oḍighi bịdi.

²¹Bụo kꞌaLivai phọ ọkporion rạghaagh ạbidi esi ịkaraph, ootologh rukpe ạbidi, kụ Eeron ạsighe bịdi ạphighironaan ịdipho ẹkia risigh Ọmoogh-we phọ. Eeron awoph bịdi ạsighe esi ịkaraph, bịdi ọḅaal.

²²Kụ roḍighi ịphen phọ reten, kụ bụo kꞌaLivai phọ omiigh oḍighi yogh ghan iiḍighi ịsiphe Ogbogo phọ, ọdaph Eeron rꞌạnmuny phọ ọdi. Ịpe Ọmoogh-we phọ ạto bọ ạḅeni Mozis ịlo ạbuo kꞌaLivai, ịdipho kụ ịdi bịdi ọtuugh ghan oḍighi bịdi.

²³Kụ Ọmoogh-we phọ ạghaaph ạḅeni Mozis mọ,

²⁴“Ịphen ịlo ạbuo kꞌaLivai. Emiigh ọlo mạman 25 ạsia kụ ẹghiom risigh, pọ ọdi ạghi aḍigh sịphe oḍighi ghan oḍighi ịsiphe Ogbogo Ạdol phọ ạmi.

²⁵Kụ ọlo mạman ooghdi ạsia, pọ ọdi ạwile oḍighi ghan oḍighi ịsiphe phọ; ọdi kúḍighi ghan mun oḍighi pạ phọ.

²⁶Pọ ọdi ạrolan ni rꞌabumor phọ ọdi, ạdaph ghan ni bịdi aḍighi ghan oḍighi ịsiphe Ogbogo phọ. Ạtuugh ghan ịlo esi rꞌesi kụ asereghi, kụ ogina ọdi kúḍighi ghan mun oḍighi. Ḍịen kụ ạdol dị nạ kaseere bụo kꞌaLivai esi iiḍighi phọ ạbidi.”