Read abua Maika 2 Bible Online

Maika 2 - abua bible

Maika 2

¹Pọ eeghe ọdo ịminimiin dị kẹtolonaan bụphe ọmina kụ ụ́naani ọḅile rogbiighi ghan ịkaraph! Mem lọ ạḍiroor ẹḅaal, bịdi rọmoogh eepoogh bịn, bịdi oḍighi omitiom ịkaraph ịitughian phọ ạbidi.

²Mem lọ bịdi ọwa ọmoogh arere, bịdi oziton; bịdi ọwa ruutu, bịdi ọsighe. Oye lọ ạmoogh eghunotu ḅịle mꞌephua, pọ kẹ́lo ọdi.

³Kụ iḍighi kụ Ọmoogh-we ạḅem mọ, “Mị rạatughian ghan ọsighe ịiḅaghami oruom anyina, kụ nyina kétue ekpetenaan. Nyina kẹmoogh ni ịiḅaghami, kụ nyina kételhiom rꞌobaga.

⁴Mem dị retu, awe kọsighe ọghaaph anyina kụ oḍighinom ịyaar dị reḍeenaan igbogh ịiḅaghami, kụ bịdi kọmoor ḍụor phọ ạḍien dị keḍeenaan ologhi dị eeph esi ịdi nyina mẹmiin: “Yoor mophe ọmuneen! Ọmoogh-we phọ mạsighe de ayoor kụ ạngo bụphe usiphi bọ iyoor ọḍuanam.”

⁵Kụ mem dị ẹteeny dị koḅulemi de phọ ọngo weye Ọmoogh-we phọ, abin kạ́tolonaan rꞌoniin ọnyo anyina.

⁶Awe ọgba kụ ụḅeni ịmi kụ ọḅem mọ, “Kẹ́gba ị́ḅeni iyoor. Kẹ́gba ịlo oomo ịpe. Ẹnaan kíifolomi iyoor.

⁷Nyina regbi mọ otonyon ni weye phọ Ịzirel ḍụghum? Ọmoogh-we phọ maroph ọkparagham phọ ọdi ḍụghum? Ọdi kạkar ri aḍighi rạraar phọ ịphen ḍụghum? Ọdi ọ́ḅaanaan weye egey eḍighinom rꞌoodugha ọnhu?”

⁸Ọmoogh-we phọ ạpagharanaan mọ, “Nyina rezuom weye ạmi ịdipho ạmulogh-ḍien. Awe ọḍua ẹgham origheel, oḍuom ologhi mọ bụno mokpetenaan ẹpe ologhi otu, pọ ịsiphe kụ ẹdi nyina edi rekori omi asikoti ạbidi ọsighe rạman ạbidi.

⁹Nyina eporogh nmạriir aweye ạmi ẹsighe ruutu phọ bịdi ọphomoghian bọ, kụ nyina meḍighi ịdi ạḍiseph ạmi nmụny phọ ạbidi kẹ́teeny mun kꞌagee-pọ.

¹⁰Iḅerenu ẹḍua; ạdol ẹepho ílho mun sịen. Ịkaraph anyina mẹphue esi phọ ẹphen ẹḅogh ẹngo oogulemi.

¹¹“Awe phọ ạbuen rọwa ọdo oyil dị ratelhe yogh rꞌọkpe rꞌiikeleghian kụ ạḅem mọ, ‘Mị ạmiin mọ amiim, muphoneen rꞌạmughologhol, kakil kụ atu esi anyina.’

¹²“Kụ ọlo, mị kiikpomoghi inyina, oomo anyina awe phọ Ịzirel osugha bọ. Mị kịsighe inyina aakpomoghi ịdipho iyool-ịga dị retigheel ọteeny aḍita ạbidi. Ịdipho esi ạroogho dị iyool-ịga emuza, de phọ anyina awe kọḅile ni omuza.”

¹³Ẹnaan kekughuron eten ẹngo bịdi kụ eḍiemiom bịdi omite esi ạdol iiruen. Bịdi kọka rughuugh ẹmha phọ omite ọtol dọl ẹereegh. Ọdaam ạbidi Ọmoogh-we phọ rꞌaloor kaḍiemiom bịdi amitenom.