Read abua Maika 5 Bible Online

Maika 5 - abua bible

Maika 5

¹Weye aJeruselem, iikpomoghi weye ẹgham anyina! Mukoom iyira! Bịdi rozuom oḍiemiom Ịzirel.

²Ọmoogh-we phọ ạḅem mọ, “Bẹtilihem Efrata, nạ eniin ẹmha dị eghom iboom sịphe Juda, kụ aloor ạna kụ ẹdi mị kamitiom oye dị kạda Ịzirel, dị ẹemara ẹemara ọdi emiigh kꞌageedi.”

³Ọmoogh-we phọ kakel weye ọdi ạngo mụlogh-ḍien ạbidi tụtu ạnir dị kạmar mạmar mọony olephiri ọdi. Pọ kụ amem dị awe phọ ọdi dị odi dọl iiruen kotu ọḅophan rꞌawe ạbidi.

⁴Mem dị ọdi aru, ọdi kạdaam weye ọdi rꞌịnyaam dị ẹḍua esi Ọmoogh-we phọ rꞌesi igbogh Ọmoogh-we Ẹnaan phọ rꞌaloor. Awe ọdi kọtol rꞌẹepho loor esi dị awe oomo aḅirini phọ kologhoma igbogh phọ ọdi,

⁵kụ ọdi kạsighe ẹepho atu. Mem dị awe Asiria ozuom eelhe ayoor ẹgham kụ ọphueghi ịikpara ariisi ayoor, yoor kotom ni buḍiemiom ịnyaam ayoor eenan ạbidi,

⁶Esi ạraraar ẹgham bịdi kọkpar opu Asiria, kụ bịdi ụphel iyoor ḍịghaagh Asiria mem dị bịdi oḍigh eelhe ayoor ẹgham.

⁷Awe Ịzirel lọ okpetenaan kọkigh ịdipho ooto kꞌỌmoogh-we phọ dị rạngo ịnyaam ịbadi areelhe, ịdipho oyiririph ạnyu ịizupha dị repoph. Bịdi koḍuom ologhi esi Ẹnaan, kési oye.

⁸Bụphe kosugha bọ sịphe areelhe phọ kọkigh ạnam-dịka dị rẹwa eḍien olhe esi ẹekpua ḅịle mꞌesi ạroogho: ọdi aateneghian rꞌiyool-ịga phọ, azuom bịdi bịn atunyi bịdi — kụ oḍuom ologhi ọloghonaan ạḍighaagh kạ́tol.

⁹Ịzirel kọkpar opu bụmulogh-ḍien ạbidi kụ opiemi oomo ạbidi.

¹⁰Ọmoogh-we phọ ạḅem mọ, “Mem mọ ọpo mị kạsighiogh ni rụsu anyina kụ aagulemi rughuugh-ude anyina.

¹¹Mị kapiemi rạmha phọ edi bọ de phọ anyina kụ ạpueghi riisi ịnyaam mọ anyina.

¹²Mị kạpueghi rụgba ịiḍaany phọ nyina reḍighinom ghan bọ kụ rꞌoniin oyil ịmiin inyina kísughanaan.

¹³Mị kapiemi ịkaaneen ạrumugh anyina rꞌạroko asighiigh ariisi ạrikia anyina; nyina kéeseeny mun rạraar phọ nyina rꞌaloor kụ eḍighi yogh bọ.

¹⁴Mị kanyuughi aler igbudu um-ạke Asera sịphe ade phọ anyina, kụ apiemi rạmha anyina.

¹⁵Kụ rꞌogbogh ophin ologhi ạmi mị kaḅulemian oomo areelhe dị ịmi kụ́naghanan.”