Read abua Maika 6 Bible Online

Maika 6 - abua bible

Maika 6

¹Ịnaghan ḍighiton dị Ọmoogh-we phọ ạmooghom rꞌỊzirel. Ḅetenu, Ọmoogh-we, ạghaaph ịiḅaghami phọ ạna; ạraaḅaraph phọ rꞌaroogbolom mọ ẹnaghan ịpe nạ kạkaaph bọ!

²Nyina ạraaḅaraph phọ, nyina ariphighiom ade phọ, ịnaghan ọghaaph Ọmoogh-we phọ! Ọmoogh-we phọ ạmoogh ni ḍighiton rꞌawe phọ ọdi. Ọdi kạkpalham Ịzirel.

³Ọmoogh-we phọ ạḅem, “Weye ạmi, mị iḍighi inyina eeghe? Ika kụ ẹdi mị aḍighi dool esi anyina? Ịphagharanaan ịmi.

⁴Mị ịsighe inyina amitiom sịphe Ijipt; mị ịtagharan inyina dọl ạrebene; mị arom Mozis, Eeron rꞌạMiriam mọ iḍiemiom inyina.

⁵Weye ạmi, ịitughian ịpe ạBelak ọdaam mọ ạMoab ạnya bọ oḍighi anyina rꞌịpe ạBelam ọony phọ aBior ạphagharanaan bọ nyọdi. Ịitughian ịpe emite bọ ẹpe eten phọ emiigh sịphe arugbogo phọ ẹpe Akasia kụ esi Gịlgal. Ịitughian rạraar phọ ịphen bịn nyina kelegheri ni mọ mị uḍighi ịlo ọphelom anyina.”

⁶Mị katuomaan eeghe Ọmoogh-we Ẹnaan phọ kꞌạke, mem lọ mị aru ooseeny ọdi? Mị kạpam ọkaraghi igey ạnmuny ạsinam kụ ạsu esi ịyaar aghuḍum dị mị kạngo nyọdi ḍụghum?

⁷Kẹḅeeraan ni Ọmoogh-we phọ eḍighi ịyaar lọ mị aruomaan nyọdi sịmuunir idughuna ḅịle rꞌạmunum-ọliv dị rakiil kụ eekuna ị́tol? Mị kạngo nyọdi ọkpana ọony phọ ạmi ọkpiom ịkaraph ạmi ḍụghum?

⁸Eeye. Ọmoogh-we phọ mụḅeni ni iyira ịdi ẹnighe. Ịdi ọdi rạwa esi ayira ịduon: oḍighi ịlo ẹkpianaan, oḍeenaan ẹphomoghian oomo amem, rꞌosooromi aloor kụ ọrolan rꞌẸnaan ayira.

⁹Ẹkpe ni ọlogh eghuan Ọmoogh-we phọ. Ọdi ạmagh ẹmha phọ mọ, “Ịnaghan, nyina awe phọ ookpomoghan bọ ẹmha phọ.

¹⁰Ologhi aruutu ạbukaraph awe, aruphua edi ni dị bịdi ọmoogh ịkaraph areten. Bịdi rọtoom ghan ọtoom iigbegheḍiom, ịyaar dị mị aghel.

¹¹Ika kụ ịdi mị kạsar ạbilenaan weye dị rọtoom ghan ọtoom iigbegheḍiom rꞌịlo ẹemor dị ị́nighe?

¹²Awe ikpoki anyina rọkpiloghom ghan bụphe ị́nighenom bọ, kụ oomo anyina awe ọkpe.

¹³Loor ẹmhu ịkaraph phọ anyina — pọ kụ ịyaar phọ mị mamiigh ọphue rꞌoogulemi anyina.

¹⁴Nyina kele ni, kụ kẹ́per — ọkar agey, ọkoony kisiph inyina nịiniin. Nyina kẹpam ni rạraar ẹḍuanam kụ nyina kétue eekpomoghi. Tọrobo ịyaar lọ nyina eeko kopiemiom ẹgham.

¹⁵Nyina kẹzuph ni ịbiakpa, kụ kẹ́ku ịizupha phọ. Nyina kemiim ni mụnum loor ọliv, kụ kétue eḍighinom ịyaar. Nyina kẹsa ni miim, kụ kẹ́pughol.

¹⁶Ịphen kemite ni loor esi dị nyina mẹdaph ẹkaraph eḍighinom Ọmri ọdaam mọ rꞌEhab ọony phọ ọdi. Nyina edimom iilogh ạdol ạbidi. Esi ịduon phọ, mị kiphiemi ni inyina, kụ tọrobo oye kighel inyina. Awe tọrobo ekpisi kiphogh inyina ọḅitonaan.”