Read abua Maika 7 Bible Online

Maika 7 - abua bible

Maika 7

¹Oḍuom ologhi ólho. Mị ạkigh oye dị ọkoony rasiph kụ ụ́miin rꞌeniin eghuuny ạfig sịphe ireeny phọ, ḅịle rꞌeniin eemuma sịphe iizin avain phọ. Oomo iimuma phọ redugh ghan bọ moḅom ọman.

²Rꞌoniin ogey oye ósugha sịphe ade phọ, rꞌoniin ólho dị ameelom Ẹnaan. Tọrobo oye odi ragon ghan eepoogh oghiigh oye. Tọrobo oye rạwa ni ọgur umor ọdi bịn olher.

³Oomo ạbidi ạbuo ẹmaar esi oḍighi ịkaraph. Awe ịtooghi rꞌabuugboom ịiruen role ghan oti ọman. Oye aḍigbogh ạdol rạḅeni ghan bịdi ịyaar lọ ọdi rạwa; ịdipho kụ ẹdi bịdi ọḅoph ọnhu kụ roopuruan.

⁴Ghạlamo ogey oye ịma ạdol sịphe ogbo ạbidi ọ́man mạar; ịdipho ọmirimiir dị odi ozo, ọ́moogh ịyaar oḍighinom. Aḍio phọ mẹteeny dị Ẹnaan kẹliom weye ọdi, ịdipho ọdi ạḅeni bọ riil phọ mọ ọphur bịdi rụru. Nyịidipho bịdi úlegheri ịlo oḍighi.

⁵Kémeeraam matuman anyina, ḅịle kẹ́kpasi ekpom anyina ọyaghiri. Igona loor ịyaar lọ nyina rẹkaaph ghạlamo rꞌạnir anyina.

⁶Sịen amem mọ ạmuen alephiri ạnmuny rọgilaam ghan bụrude mụdi awe dị ịyaar úlegheri, ạnmanyaan rọgbagharan mem lọ onhiin ạghaaph ịyaar, kụ arisina ạnmanyaan rọtuan ghan ọruonu rꞌaburunhiin olhom mọ ạbidi; ạmulogh-ḍien oye odi sịphe eghun phọ ọdi.

⁷Kụ ọlo, mị kagon Ọmoogh-we phọ; rꞌoḍuom ologhi mị kakoriom ọmiin Ẹnaan, ọpo kụphel bọ ịmi. Ẹnaan ạmi kịnaghanan ni ịmi.

⁸Ạbumulogh-ḍien ayoor ụ́moogh ẹmhu ọtuan kụ ọnmoghoghoom ayoor. Yoor momeel, kụ kọḅile ni oḅetenu. Yoor odi esi ufiri nyịidipho, kụ Ọmoogh-we phọ kụngo ni iyoor ḍịḅaal.

⁹Yoor moḍighi ni ịkaraph esi Ọmoogh-we phọ, kụ yoor kọkparagham ophin ologhi ọdi ẹnum amem. Kụ ruukuna phọ ọdi kụ eenan ni iyoor, kụ aalemi rạraar lọ eeph dị uḍighi iyoor. Ọdi kumitiom iyoor atumom esi ạḍiḅaal phọ; yoor kọtol li ọmiin mem dị ọdi kụphel iyoor.

¹⁰Pọ kụ amem dị ạbumulogh-ḍien ayoor kọmiin ịphen kụ umugholoor asiph — buniin phọ ạbumulogh-ḍien phọ ụgilaam bọ iyoor kụ ọḅem ghan mọ, “Odi ẹghen Ọmoogh-we Ẹnaan phọ anyina?” Yoor kọmiin ịdi bịdi momeel; kọozeghi bịdi ịdipho ọposo eten orelhe.

¹¹Weye aJeruselem, amem ọḅile ọloghoḍi iikpe ẹmha phọ retu ni. Mem mọ ọpo, ọmar phọ ạna kạbugh ni iboom.

¹²Awe ạna kotigheel ọteeny nyịna tọrobo ekpisi — ọḍua ẹpe Asiria ẹpe emitenom erumuḍio phọ, ọḍua ẹpe Ijipt ẹpe esoorom mọ, ọḍua ẹpe eelhe phọ aYufratis, ọḍua rịphiiny dị ẹkel rꞌạraaḅaraph ẹekela ekpisi.

¹³Kụ ọlo, ade phọ keten ẹdala ịisaar loor ẹmhu ẹkaraph eḍighinom ịyaar awe phọ odi bọ sịphe.

¹⁴Ḍighi okoriom awe ạna, Ọmoogh-we, weye phọ nạ mạsaḅar bọ. Ghạlamo bịdi odi ni gem gem ẹpe ẹdala phọ, ade ẹeḍiom edi ekoom bịdi. Meera bịdi ọghi ọraal ịma ạroogho phọ ạBasan rꞌạGiliad, ịdipho bịdi ọraal ghan bọ mem dị mebia.

¹⁵Uḍighinaan iyoor ịiḍaany, Ọmoogh-we, ịdipho nạ aḍighi ghan bọ mem mọ nạ ụsighe bọ iyoor ạḍuanam sịphe Ijipt.

¹⁶Areelhe phọ kọmiin ni ịphen kụ iloghi ebeeph ghạlamo rꞌoomo ịnyaam mọ ạbidi. Rꞌologhi dị mạphu kụ bịdi okpereghi ịnhu ạbidi kụ opua reḅeri ạbidi.

¹⁷Bịdi kọkogha ạnyu ophugh ịdipho ịkaraph-ạraraar; bịdi kọḍuaghu omite sịphe ariisi ogona aloor phọ, ropiigha rꞌoghiilaan. Bịdi kokiton rꞌoghiilaan kụ otu ọteeny Ọmoogh-we Ẹnaan phọ ayoor.

¹⁸Ẹkaaneen ẹmugh ílho dị ẹghigh nyịna, Ọmoogh-we. Nạ ụsar ịkaraph awe ạna ạwilenaan bụphe okpetenaan bọ. Nạ rạ́tolom ghan rꞌophin ologhi kꞌagee-pọ, kụ nạ ạmoogh ḍịḅeeraan oḍeenaan ghan ẹphomoghian oomo amem.

¹⁹Nạ kạḅile ni ạmoogh ọnma ighirigiir esi ayoor. Nạ kạazeghiom ịkaraph ayoor rạda kụ ạsighe asiemi ude ọphiiny!

²⁰Nạ kaḍeenaan ọmeeraam rꞌẹphomoghian oomo amem weye ạna, bụo ẹemara Ebraham rꞌạJekob, ịdipho nạ aguanaan bọ bụrude ạburude ayoor mem dị meten.