Read abua Nẹhum 1 Bible Online

Nẹhum 1 - abua bible

Nẹhum 1

¹Ḍịen kụ adom dị egbolomaam Nineve, ọghaaph uḍien dị ạNehum ọlo ẹmha dị oghol mọ Elkos kụ ạmiin.

²Omuton Ọmoogh-we Ẹnaan phọ, ọnon dị aaleeny nyọdi ólho. Ọdi rạliom ghan bụdi úmeera mọ ọdi bịn kụ Ẹnaan. Esi ophin ologhi ọdi kụ ẹdi ọdi raḅulemian ghan bịdi.

³Ọmoogh-we phọ ịyaar rẹ́nuun ghan kephin ologhi, Ọdi ạmoogh ni ịikpo kụ kạ́bilenaan ọliom ọpo aḍighiton eephanaan bọ. Esi lọ Ọmoogh-we phọ arelhe, oghim akim; ọotu phọ kụ ophugh dị ạrada ọdi emitiom ghan!

⁴Ọdi ạto, kụ ạbazi phọ ạkaraghar! Ọdi aḍighi ịdi ạriphiiny phọ, ạmuum amineen. Ireeny eḍum ạBasan ekeel ọnam, Eegum ạKarmel ekiton ekelele, kụ ạsifalaway ạLebanon enme ḍizu.

⁵Ạraaḅaraph ekpeghekpeghe egbodo Ọmoogh-we phọ; aroogbolom ẹgbo ghisigh ọdi. Ade phọ epiigha mem dị Ọmoogh-we phọ aru amite; aḅirini phọ rꞌoomo awe ọdi opiigha.

⁶Mem dị ophin ologhi odianaan nyọdi, ạnhian kụ kakpetenaan? Ọdi raakuom ghan ophin ologhi ọdi mụdi anem ạnian; asighiigh eetughuḍian eten ophugh ghisigh ọdi.

⁷Ọmoogh-we phọ ạnighe ni; ọdi raakpereghi ghan weye ọdi mem ịiḅaghami; ọdi rạmaar ghan kạpham bụphe okiton bọ oru esi ọdi.

⁸Ịdipho aḍigbogh aḍigho dị rekil kụ ịdi ọdi aphiemi bụmulogh-ḍien phọ ọdi; ọdi aḍeenaan eten aḍuugh ạbidi bụphe ọḅem bọ mọ eeye egbodo ọdi.

⁹Eeghe ịkaraph ịitughian kụ ẹdi nyina ẹmooghom Ọmoogh-we phọ? Ọdi kiphiemi ni inyina. Oye ólho dị kạmeera ghisigh ọdi kụ ạḅem mọ eeye amuneni ịyal amem.

¹⁰Ịdipho iitoor dị ẹkula rꞌịpherepher dị ẹgharaghar, nyina awe dị amiim rạyegheyeghemi kịsu ni inyina nịan opiemi.

¹¹Loor ạna, Nineve, kụ ẹdi oye ạḍua amite rꞌịbadi ịkaraph igbiighi, dị ạmooghom ẹkaraph ezue Ọmoogh-we phọ.

¹²Ịphen kụ ịdi Ọmoogh-we phọ ạḅeni weye phọ ọdi Ịzirel: “Ghạlamo ịduon awe Asiria ọkpar bọ ni kụ oḍiza, kopiemi ni bịdi. We ạmi, mị iseere inyina dọl ịminimiin, kụ mị káḍighi mun ịdipho.

¹³Nyịidipho mị kakunughi ịikpo phọ Asiria esi anyina kụ aagbo izime phọ ịpham bọ inyina.”

¹⁴Ịphen kụ ịdi Ọmoogh-we phọ mạto esi awe phọ Asiria: “Bịdi kọ́moogh ẹemara ẹemara dị komeera ḍien ạbidi. Mị kapiemi ni ịkaaghineen ạrumugh phọ edi bọ ruutu ịiḅereghi aruru phọ ạbidi. Mị raguphanaan oḍi weye Asiria — bịdi ụ́kpe ọrol!”

¹⁵Ipogh, otelhedom ạḍua ni ạnyu ạraaḅaraph phọ ratu rꞌooḅi ọghaaph! Ọdi odi eten dị ratu ọghaaph oleenye ọkpar opu! Weye aJuda, ile rạyaal phọ anyina kụ ẹngo Ẹnaan ịpe nyina eghiran bọ nyọdi. Ạbukaraph awe kóḍigh mun de anyina rꞌẹekpara ekpeḍien. Moogulemi bịdi kpel kpel kpel.