Read abua Hạbakuk 2 Bible Online

Hạbakuk 2 - abua bible

Hạbakuk 2

¹Mị kạsiiny ạnyu otu ạmi kụ agon ọnaghan ịlo Ọmoogh-we phọ kụḅeni ịmi ịlo ọghaaph rꞌọphagharanaan lọ ọdi kạngo esi emoghi phọ ạmi.

²Ọmoogh-we phọ ụngo ịmi ọphagharanaan phọ ọphon mọ: “Gẹ agananami ạnyu opoḍi aḍighiigh ịlo mị agananami ạḅeni nyịna ẹrol dị otue ọbal ophogh-ọsighe.

³Lọgh esi ịge, loor esi dị kẹ̋teeny mem dị kemite. Kụ amem mọ kẹnuun ni etu, kụ ịpe mị aḍeenaan bọ nyịna kemite ni. Kẹkigh mụdi reebinya ni omite, kụ kori ni; kẹkar ri emite, kụ kéebinya.

⁴Kụ ḍịen kụ adom mọ, ‘Bụo ịkaraph phọ kókpetenaan, kụ bụo aruukuan phọ kọtol li, loor esi dị bịdi omeelom Ẹnaan.’”

⁵Ẹelha areekeleghian ni. Awe dị ọphomoghian ole ẹpher ropoophe siloor kụ rópooghian ghan — mụdi aḍuugh rꞌaloor, rẹ́gbaanyan ghan bịdi. Ịdipho kụ ẹdi bịdi robe ghan bọ ọḍua eelhe oten eelhe.

⁶Awe phọ ạbuphe ụkpar bọ kọgilaam ghan bụphe ọkpar bọ kụ oḍeenaan ghan ophogh ọḅitonaan. Bịdi kọḅem mọ, “Nyina ẹsighe ịdi ítu bọ ịlo anyina, kụ nyina kẹmiin ni! Kꞌaḍighen aḍio kụ ẹdi nyina kẹtol ghan ọkpaariom awe lọ ọpham ikpoki anyina mọ ọkpe ẹrol dị nyina eḍighi rạalha ikpoki?”

⁷Kụ tụtu nyina relegheri, nyina phọ mẹkpar bọ epu bụnon keleeghi ni ịimugh rꞌaloor kụ ịkpaariom inyina ọlogh ọḅar. Ạbumulogh-ḍien kotu kụ oḍighi ịdi nyina kekpekper. Bịdi kiwum ni inyina!

⁸Nyina mewum ni weye ịbadi areelhe, kụ nyịidipho bụphe mokpetenaan bọ kiwum ni inyina loor esi awe phọ nyina mẹzeeghi bọ ḅịle rꞌaloor esi ạmukpoogh phọ nyina ẹrolom bọ weye aḅirini phọ rꞌạramha phọ ạbidi.

⁹Nyina mephe! Nyina meḍighi ịdi eghunotu anyina mẹmoogh ẹelha rꞌạraraar dị nyina ẹmooghom rꞌẹekpara ekpeḍien, kụ ẹmaar ekikima otu anyina dị rꞌịyaar kẹ́ḅogh!

¹⁰Kụ igbiighi phọ anyina mẹsighe umugholoor etuomaan eghunotu anyina; ịdipho nyina repiemi ghan bọ ịbadi areelhe, nyina ẹsighe ghan dọl oguul kụ ratuomaan loor anyina.

¹¹Ghạlamo rꞌasighiigh iikpe phọ bịn remoghi ni kịgurughiom inyina, kụ ịgurom otu phọ emegheron emoghi phọ.

¹²Nyina mephe! Nyina imitiom ni ẹmha rꞌọwa asighiton kụ ẹsighe ọko enu kụ ẹloghom.

¹³Areelhe phọ nyina ẹkpar bọ epu asiloor eminenom loor ịḅoria arukumuan, kụ oomo ịlo bịdi odoghoḍi ạnian kụ ile. Ọmoogh-we Oomo Ịikpo phọ kụ maḍighi ịphen.

¹⁴Kụ olegheri-ịyaar eegu Ọmoogh-we phọ kamuza ni de phọ ịdipho ạmuum mọ amuza bọ rịphiiny phọ.

¹⁵Nyina mephe! Esi ophin ologhi anyina, nyina iifolomi ni matuman anyina; nyina eḍighi ịdi ọbelebele mụdi amiim kụ rakiigh.

¹⁶Kekiton eḍighi dị nyina kụ kẹmoogh umugholoor esi arughuenian. Nyina rꞌaloor kẹpughol kụ ẹbelebele. Ọmoogh-we phọ kaḍighi ịdi nyina kẹpugholom ẹgo ạmuliom mụo anyina, kụ eghuan anyina kotene roofola.

¹⁷Nyina melhereghi rụukpua phọ ạLebanon; nyịidipho kisoph inyina kụ oler. Nyina ẹze ịnam mọ ạbidi; nyịidipho ịnam kiḍighi inyina ịlo aḍiigu. Ịphen kemite ni loor esi awe phọ nyina mẹzeeghi bọ ḅịle rꞌaloor esi ekpom eḍighinom ịyaar phọ nyina ẹrolom bọ weye aḅirini phọ rꞌạramha phọ ạbidi.

¹⁸Ẹkaaneen ẹmugh koḍighinom eeghe? Eḍighi ịyaar dị oye kụ aḍighi, kụ inyina egey ịyaar kị́ḅeni emuton ọkpe. Eeghe ạsuo kụ ẹdi keḍighinaan nyọpo aḍighi bọ kụ ẹkpe bọ omeeraam mọ — ẹnaan dị kétue kẹn ẹḅa!

¹⁹Nyina mephe! Nyina ẹḅeni ekulha oreeny mọ, “Ḅetenu!” ḅịle mꞌekulha aḍighiigh mọ, “Mẹera!” Ẹkaaneen ịyaar ketue ni ẹkaaph ịyaar dị ẹeghian ịḅeni inyina ḍụghum? Iini okpoghom silva rꞌagol, kụ aghuḍum ólho loor.

²⁰Ọmoogh-we phọ odi sịphe Otu Iigbia phọ ọdi; ẹkpianaan tọrobo oye lọ odi sịen aḅirini phọ aḅoorian ghisigh ọdi!