Read abua Zẹfanaya 1 Bible Online

Zẹfanaya 1 - abua bible

Zẹfanaya 1

¹Ḍịen kụ adom mọ Ọmoogh-we phọ arom bọ ạZefanaya mem dị aJosaya ọony phọ Ạmon aḍighi ọdaam aJuda. (ẠZefanaya aḍighi ọnyo ẹemara ẹemara ạHezekaya ọdaam mọ, sịphe kꞌAmaraya, Gedalaya rꞌaKusi.)

²Ọmoogh-we phọ ạḅem mọ, “Mị kapiemi ni tọrobo ịyaar lọ edi sịen ade phọ,

³oomo awe rꞌịnam, ịnun rꞌina. Mị kaḍighi ịdi bụo ẹkaraph eḍighinom ịyaar kopeeghu. Mị kapiemi ni oomo ọmar awe kụ rꞌoniin kásugha. Mị Ọmoogh-we phọ mạghaaph.

⁴“Mị kạliom ni we phọ aJeruselem rꞌoomo aJuda. Mị kapiemi ni tọrobo ẹesuna lọ rọoḅereghi ghan bọ eru aBaal sịphe, kụ rꞌoniin oye kạ́atughian mun riil aghuḍuul phọ rokumu ghan bọ nyọdi.

⁵Mị kapiemi tọrobo oye lọ ạsiiny ạnyu otu kụ ạaḅereghi erumuḍio phọ, mꞌụnwanyu phọ rꞌạraanaan phọ. Mị kạḅaram apiemi bụphe moghunya bọ mọ bụno kuuseeny ghan ịmi, kụ ọḅile bọ oghiran ịyo rꞌeru aMilkom.

⁶Mị kapiemi bụphe mọgum bọ ọman kụ ịmi ụ́daph mun bọ, bụphe útu mun bọ esi ạmi ḅịle ịmi ụ́ḅeni mun bọ mọ ọmaar ooko bịdi.”

⁷Aḍio phọ rẹteeny dị Ọmoogh-we phọ kaagbo ịiruen; loor ịduon phọ, iḅoorian sịen egbodo phọ ọdi. Ọmoogh-we phọ raakolobian ọphighironom ẹkia weye phọ ọdi, kụ mạamaghagh bụmulogh-ḍien oogulemi aJuda.

⁸“Ḍio phọ kọze bọ,” Ọmoogh-we phọ ạḅem, “Mị kạliom ni bụo iiḍighi, rꞌạnmuny ọdaam mọ rꞌoomo ạbulo ọphamanam eeruen eḍighinom ịyaar.

⁹Mị kạliom oomo ạbulo rooseeny ghan mụdi awe aruru rꞌạbulo romi ghan kọḅile ọze we ọbo bịdi omuzeḍiom otu ọde-otu ạbidi ruphua dị owum.

¹⁰“Ḍio phọ ạḍiphe,” Ọmoogh-we phọ ạḅem, “Nyina kẹnaghan ni emoghi sịphe Ọnhu-aḍibuo Ina phọ ẹpe Jeruselem. Nyina kẹnaghan ni ịlooghi ạga amumoom amarugh ẹmha phọ rꞌẹḍogh dị kẹtol mụdi ịyaar kụ imeel eetughuḍian ạnyu aroogbolom mọ.

¹¹Ịlooghi ẹḅile emoghi yogh mem dị nyina ẹnaghan ịphen phọ, nyina phọ ạbuphe edi bọ ạga ẹmha phọ esoorom bọ, loor esi dị oomo abugbogh abumuul ḍighi komuughu ni!

¹²“Mem mọ ọpo mị kạsighe ni ọtozi kụ ạwaam Jeruselem. Mị kạliom weye dị ịlo aloor ạbidi ẹgbaanyan kụ oḅio ạkpar, dị ọḅenian siloor mọ, ‘Ọmoogh-we phọ ráḍighi ghan rꞌịyaar rꞌẹnum.’

¹³Ẹelha ạbidi kobum ni ọsighiogh kụ ruutu ạbidi kolereghi ni. Bịdi kọ́tol iloghi aruutu phọ bịdi rodoghoḍi bọ ḅịle kọ́pughol miim mọ ạḍua bọ sịphe ireeny avain phọ bịdi rọzuphogh bọ.”

¹⁴Aḍigbogh aḍio Ọmoogh-we phọ meesulom — mẹkar eesulom kụ retu ni elhom! Keḍighi ḍio eghiḍim. Ghạlamo rꞌạbuo ẹgham lọ ọmoogh oḅio komoghi rꞌiloghi dị meeph!

¹⁵Keḍighi ḍio ophin ologhi, aḍio ịiḅaghami rꞌạraraar dị kẹ́nighe, aḍio ọphueghi rꞌophiemi, aḍio ufiri rꞌọdoghian, aḍio dị ewil kụ ẹḅaram ọotu,

¹⁶aḍio ọnaghan iigho rꞌạrukuodu ẹgham rꞌịlooghi awe ẹgham dị robianaan olhereghi iikpe ogonaam aloor ịikpara ạramha.

¹⁷Ọmoogh-we phọ ạḅem mọ, “Mị katuomaan ịiḅaghami phọ ịphen ẹrol dị tọrobo oye aakula ịdipho oye ikpom ariḍien. Oomo phọ ạbidi moḍighi ịkaraph esi ạmi, kụ nyịidipho ịḅaal ạbidi kekil mụdi ạmuum kụ aḍizu ạbidi ẹtol ạnyu ade ẹḅor.”

¹⁸Ḍio dị Ọmoogh-we phọ aḍeenaan ọghagh ologhi ọdi, ghạlamo oomo asilva rꞌagol ạbidi bịn kẹ́pel bịdi. Ạnian ophin ologhi ọdi kele epiemi oomo ade phọ. Ekperenom bịn ọdi kakunughi tọrobo oye lọ odi sịen ade phọ.