Read abua Zẹfanaya 2 Bible Online

Zẹfanaya 2 - abua bible

Zẹfanaya 2

¹Nyina aweye eelhe dị umugholoor úlegheri, iloghoma siloor anyina,

²kụ ogbi ophorogh anyina mụdi ịpherepher dị ookuugh aphula, kụ ophin ologhi Ọmoogh-we phọ agbi ọteeny anyina, kụ egbi ọteeny aḍio dị ọdi kaḍeenaan ophin ologhi ọdi.

³Ikiton ephogh Ọmoogh-we phọ, oomo phọ anyina ạbuphe mosooromi bọ loor sịen ade phọ, kụ rọnaghanan bọ ịto phọ ọdi. Iḍighi ịlo ẹnighe, kụ esooromi siloor anyina ghisigh Ọmoogh-we phọ. Iini nyina kekpetenaan ni mạlhiom ḍio phọ Ọmoogh-we phọ kaḍeenaan bọ ophin ologhi phọ ọdi.

⁴Rꞌoye kásugha sịphe ẹmha aGaza. Awe Askelon kosumughu ni. Koporogh ni we Ạsdod ọsighiogh oolemi-odi aḍio, kụ oporogh we Ẹkron ọsighe sịphe ẹmha phọ ạbidi.

⁵Nyina mephe, we aFilistia, nyina phọ edi bọ ọogaany ọphiiny phọ. Ọmoogh-we phọ masoph ọoruen ịngo inyina. Ọdi kiphiemi ni inyina, kụ rꞌoniin ọnyo anyina kásugha.

⁶Ade phọ anyina edi bọ ọogaany ọphiiny phọ keten ẹyaghaghaany esi dị abukoriom iyool-ịga rꞌaroghoony ạbidi kụ kẹtol.

⁷Awe aJuda lọ okpetenaan kụ kọtol sịphe ade phọ anyina. Bịdi kookonom ghan sita ịga phọ sịphe phọ kụ ọki ọmina iloghi aruutu Askelon. Ẹnaan phọ ạbidi Ọmoogh-we phọ kạtolan rꞌạbidi kụ ạḅile aḍume bịdi.

⁸ Ọmoogh-we Oomo Ịikpo phọ ạḅem mọ, “Mị mạnaghan ni ịdi aweye phọ ạMoab rꞌAmon rọḅeni yogh kọnmoghoghoom weye phọ ạmi, kụ robaga mọ bụno kọsighe de ạbidi rꞌẹekpara ekpeḍien.

⁹Ịduon mị kụ ạkar bọ aḍighi Ẹnaan phọ rémugh ghan bọ, Ẹnaan phọ Ịzirel, mị akunya mọ kopiemi ni weye ạMoab rꞌAmon ịdipho ạSodom rꞌaGomora. Bịdi koten riini aboph dị kágbo bịn kꞌagee-pọ, kụ ạroogho asi aakpereghiom. Bụphe okpetenaan bọ sịphe ogbo awe phọ ạmi kobum rạraar ạbidi kụ ọsighe de phọ ạbidi.”

¹⁰Ịdipho kụ ịdi awe ạMoab rꞌAmon kọmiinom loor esi ophoophe rꞌobaga aloor ạbidi rꞌootuuny awe Ọmoogh-we Oomo Ịikpo phọ.

¹¹Ọmoogh-we phọ ạdegh ni bịdi ịlo aḍiigu. Ọdi kapiemi ni ịkaaneen ạrumugh ịsien ade phọ, kụ tọrobo eelhe keeseeny ni nyọdi sịphe ade phọ ạbidi.

¹²Ọmoogh-we phọ kạze aani ni weye Ẹtiopia.

¹³Ọmoogh-we phọ kạsighe ni ịikpo phọ ọdi kụ apiemiom Asiria. Ọdi kaḍighi ẹmha phọ aNineve ịdi keegulaan, ịdipho ade ịisaar dị ạmuum úlho.

¹⁴Keten esi dị asita ịga rꞌịnam kịrokiro kụ kẹmina ghan. Aruukughum ketugh pạ ikulha arughuugh phọ meegulaan bọ kụ etulughian ghan. Ạrighiligho kemoghi ghan rụnhu-aḍibuo phọ. Kotuph ni ireeny ọsaga ọsighiogh sịphe aruutu phọ ạbidi.

¹⁵Ịpe kụ ịdi kemitenaan ẹmha dị ephoophe loor esi ịikpo dị bịdi ọmoogh kụ ạatughian mọ ịyaar bụno kẹ́ḅogh. Awe ọdi rogbi ghan mọ ẹmha ạbuno kụ ịkar ẹbugh oomo aḅirini phọ. Pọ eeghe esi dị meguul, esi dị ilhom ịnam kụ kẹtol ghan! Tọrobo oye lọ raten kaḍuraan aḅulolom ọman rꞌoghiilaan.