Read abua Hagai 1 Bible Online

Hagai 1 - abua bible

Hagai 1

¹Esi ạlha dị emuneniom ịyal dị ạDarios ọdaam mọ mạda bọ Pasia, ḍịḅel aḍio omuneniom odiiny ụnwanyu, Ọmoogh-we phọ arom ni Hagai oyil phọ ọdi ạḅeni weye phọ ọdi. Adom mọ ạḍio ạZerubabel ọony ạSialtiel ọdaam mọ ọpo rapogh bọ eelhe phọ aJuda ḅịle rꞌaJosua ọony ạJehozadak ogbogh oyil ạrikia phọ.

²Ọmoogh-we Oomo Ịikpo phọ ạḅeni ni oyil Hagai mọ, “Awe phọ ạbuen rọḅem ghan mọ kẹ̋teeny mem dị kọḅile ọlogh Otu Ịiḅereghi phọ.”

³Kụ Ọmoogh-we phọ agbi orom aHagai mọ ạḅeni weye phọ dom mọ ạḍien:

⁴“Weye ạmi, eeghe kụ iḍighi kụ nyina etughogh bọ ni igey aruutu dị ọmaar ọlogh mem dị Otu Ịiḅereghi phọ ạmi aagulaan bịn odi ghan?

⁵Nyina rẹ́miin ghan ịphen rimitenaan bọ inyina ḍụghum?

⁶Nyina mẹzuph iboom ịbiakpa, kụ rẹku ọony ẹnum bịn. Nyina ẹmoogh ni eḍien olhe, kụ ọlo ị́manam ọpher oye. Nyina ẹmoogh ni miim ọphughol, kụ ọlo ógeni dị kakiigh oye! Nyina ẹmoogh ni rukpe, kụ ọlo ígeni ọngo anyina ẹghologhol. Ḅịle kẹn bụphe odiighi bọ sidom mọ róle ghan ikpoki dị egeni ọrolom.

⁷Nyina rẹ́miin ghan ịpe eḍighi bọ kụ ịphen remite bọ ḍụghum?

⁸Nyịidipho, ịki ẹpe ạraaḅaraph phọ, ẹsighe sụpo, ẹḅile ẹloghom Otu Ịiḅereghi phọ, kụ egbi ọḅaal ologhi ạmi kụ ogbi nụun ọoḅereghi ạmi ịpe ẹkpianaan bọ.

⁹“Nyina iḍuom ghan ologhi ọmoogh igbogh ibugha, kụ ẹḅile ghụn eḍighi ịbam. Ḅịle kẹn mem lọ nyina ẹsighe ibugha phọ erighelom otu, mị rapula ghan bịn kạsighiogh. Eeghe kụ iḍighi kụ mị aḍighi bọ ịdipho phọ? Ụtuan dị Otu Ịiḅereghi phọ ạmi aagulaan bịn odi ghan mem dị tọrotoro ọnyo anyina ạkururu bịn rạlogh ghan otu ọlo ọdi.

¹⁰Ẹpe kụ ịyaar phọ ọlophia ụ́loph bọ ḅịle kẹn ịyaar kísi bọ.

¹¹Mị mạngo ọkoony ạmuum de phọ — ạnyu ạraaḅaraph phọ ọdi, rꞌiizo ịbiakpa phọ, rꞌiizo ireeny avain phọ, ḅịle kẹn rꞌiizo ọliv phọ — tọro esi lọ ịizupha resi ghan sịen ade phọ, esi awe rꞌịnam rꞌoomo ạraraar lọ nyina ẹwa ọzuph.”

¹²Pọ kụ amem dị ạZerubabel rꞌaJosua rꞌoomo awe phọ ạbuphe ọḍua bọ iiruen ạramha ẹpe Bạbilonia kụ origheel, oḍighi ịpe Ọmoogh-we Ẹnaan phọ ạbidi ạḅeni bọ bịdi oḍighi phọ. Bịdi ụmoogh ni oghiilaan kụ ọnaghanan oyil aHagai, otelhedom Ọmoogh-we phọ.

¹³Pọ kụ amem dị aHagai ạḅeni weye phọ dom Ọmoogh-we phọ: “Mị kạtolan ni rꞌanyina — ọpo kụ oguanaan ạmi.”

¹⁴Ọmoogh-we phọ ạngo ni tọrobo oye ẹephua oḍighi aani oḍighi Otu Ịiḅereghi phọ: ạZerubabel ọdaam eelhe phọ aJuda, aJosua ogbogh oyil ạrikia phọ, ḅịle rꞌoomo awe phọ ạbuphe ọḍua bọ iiruen rạmha kụ origheel. Bịdi umiigh ni ọḅile ọlogh Otu Ịiḅereghi Ọmoogh-we Egbogh Ẹnaan phọ ạbidi,

¹⁵esi ịyaldi rꞌinya Aḍughul-otu odiiny ụnwanyu ạlha phọ ạḍiphe emuneniom bọ ịyal ạDarios aḍighi bọ ọdaam mọ.