Read abua Zẹkaraya 1 Bible Online

Zẹkaraya 1 - abua bible

Zẹkaraya 1

¹Ụnwanyu dị amuneniom ọphaanya, lhạ dị emuneniom ịyal sịphe ọda ạDarios ọdaam mọ aPasia, Ọmoogh-we phọ ạngo ni dom mọ ạḍien oyil phọ Zẹkaraya ọony aBerekaya rꞌọony oko Ido.

²Ọmoogh-we Oomo Ịikpo phọ ạḅeni ni Zẹkaraya mọ ạḅeni weye phọ mọ, “Mị Ọmoogh-we phọ ụghagham ni ologhi iboom bụrude ạburude phọ anyina,

³kụ ọlo nyịidipho mị rịḅeni inyina mọ iḅula esi ạmi kụ mị kaḅula ni esi anyina.

⁴Kẹ́kigh bụrude ạburude phọ anyina. Mem dị mẹkel iboom, ariil phọ ụngo ghan ni bịdi dom ạmi, ọḅeni ghan bịdi mọ kụ́tolom mun sịdol ịkaraph rꞌạsipioghom. Kụ ọlo bịdi úler rụru, ịmi ụ́naghanan.

⁵Ạburude ạburude phọ anyina ạbuen phọ ḅịle rꞌariil phọ ạbuen phọ úlho mun eye.

⁶Mị urom ghan butelhedom mọ ạmi riil phọ kụ ọḅeni ịto phọ ạmi ọḅile ọphur rụru bụrude ạburude phọ anyina, kụ ọlo bịdi úpogh riil phọ ụ́logh elegh kụ bịdi ụmiin ni ịikpia phọ. Pọ kụ amem dị bịdi ogbi okiton kụ ogbi ọlogh elegh mọ mị Ọmoogh-we Oomo Ịikpo phọ kụ mạlhiom bịdi ịpe ẹkpianaan bọ bịdi ḅịle kẹn rꞌịpe mị magbiighi bọ oḍighi phọ.”

⁷Lhạ phọ ạḍiphe emuneniom bọ ịyal sịphe ọda ạDarios ọdaam mọ, ḍio dị emuneniom ịyaldi rꞌinya aḍughul-otu ụnwanyu phọ ọpo amuneniom bọ ḍioph rꞌoniin (ụnwanyu aSebat), Ọmoogh-we phọ ụngo ni ịmi dom esi ịmiin mem aḍughul.

⁸Mị ụmiin ni ọokpaany Ọmoogh-we phọ dị rakiilom ọtogh-tọgh ạsu. Ọdi mạghi ạmeera igbo ọpereeny oreeny ẹpe eḍiiny, kụ ọman ọdi ịnon ọdo ạrusu ịmeregha ni — ịtogh-tọgh, ịdi ẹpoghogha, rꞌịphalaḅaal.

⁹Kụ mị apuru nyọdi mọ, “Oye phọ, eeghe kụ ẹmhu ịnam mọ ịphen phọ?” Kụ ọdi ạphagharanaan mọ, “Mị kaḍeenaan ni nyịna ẹmhu phọ ịphen phọ.

¹⁰Ọmoogh-we phọ kụ arom bịdi mọ ọghi ọwaaghi ịlo ade phọ edi.”

¹¹Bịdi ọghaaph ọḅeni ọokpaany phọ mọ, “Yoor morelhe yogh oomo phọ aḅirini phọ kụ yoor mọwa ọmiin mọ oomo phọ aḅirini phọ ạmina ni bịn oḍuom ologhi ólho mun ọḅile oḅetenu.”

¹²Pọ kụ amem dị ọokpaany phọ ạḅem mọ, “Ọmoogh-we Oomo Ịikpo, nạ mạghagham ni ologhi Jeruselem rꞌạramha phọ aJuda sịen oḍualdi ạsia. Kẹḅile ẹteeny ḍighen kụ nạ agbi oḍeenaan ạbidi ọnma ighirigiir?”

¹³Ọmoogh-we phọ ạphagharanaan ni ọokpaany phọ rꞌikpo ọnhu ọodereghiom,

¹⁴kụ ọokpaany phọ ụḅeni ịmi mọ gbeelom ịpe Ọmoogh-we Oomo Ịikpo phọ mạḅem bọ: “Mị ạmoogh ni eboom ẹphomoghian rꞌigbiririph aJeruselem, ẹmha iigbia phọ ạmi,

¹⁵kụ mị rạkagham ni ologhi iboom reelhe phọ rẹkelom bọ ịma ạdol rꞌẹepho. Ịyaar phọ eḍighi bọ, mem dị mị odi raḅologhan ghan ọghagh ologhi phọ ạmi esi awe phọ ạmi, areelhe phọ ịphen ịḅile ghan ghụn bịn ẹbughe ịminimiin awe phọ ạmi.

¹⁶Kụ iḍighi kụ mị maḅula Jeruselem oḍeenaan ẹmha phọ ọnma ighirigiir. Kọḅile oḅulemi Otu Ịiḅereghi phọ ạmi, ọḅile ọlogh ẹmha phọ.”

¹⁷Ọokpaany phọ ụḅeni kẹn ịmi mọ gbeelom: “Ọmoogh-we Oomo Ịikpo phọ ạḅem mọ edughom kụ kẹḅile ẹtol rạmha phọ ọno, ḅịle kẹn mọ ọno kạḅile ạloghonaan ḍịghaagh Jeruselem, ạḅile ạsighe ẹmha phọ aḍighi ẹmha ọno.”

¹⁸Esi ịnon ịmiin mị ụmiin ni inya ạraphaal ạnam.

¹⁹Mị apuru ọokpaany phọ ọpo rạkaaphan ghan bọ rꞌạmi mọ, “Ẹmhu ạraphaal phọ ịphen phọ eeghe?” Kụ ọdi ạphagharanaan mọ, “Bịdi ẹmeera esi ịikpo aḅirini phọ ịpe mẹewalalami bọ weye phọ aJuda rꞌỊzirel ḅịle rꞌaJeruselem.”

²⁰Kụ Ọmoogh-we phọ agbi oḍeenaan ạmi inya ạbuo iiḍighi dị ọphamagh sịmana dị oḍighinom okuron.

²¹Kụ mị apuru, “Awe phọ ạbuen phọ uru oḍighi eeghe?” Kụ ọdi ạphagharanaan, “Bịdi moru ookperemi ḅịle rꞌolereghi areelhe phọ ịpe oogulemi bọ de phọ aJuda ọḅile ọowalalami weye phọ ọdi.”