Read abua Zẹkaraya 11 Bible Online

Zẹkaraya 11 - abua bible

Zẹkaraya 11

¹Lẹbanon, ikunyon rughuugh anyina, pịdi ạnian ele rạsaga phọ anyina!

²Imoghi eḅeleghu, nyina ịma ireeny — ọsaga phọ memeleghu; mophiemi ịikia ireeny phọ. Imoghi eḅeleghu, nyina ạsiogh ạBasan — molher eboom ẹekpua phọ!

³Ạbuo ịtooghi phọ romoghi ni iboom; eghuan phọ ạbidi mephe. Iler rụru ịpe ạnam-dịka regbophoghu bọ; mophiemi ẹekpua phọ edi bọ ọgbal ạJodan phọ eḍighi ghan bọ marugh phọ ạbidi!

⁴Ọmoogh-we Ẹnaan phọ ạmi ụḅeni ni ịmi mọ, “Ḍighi ịdipho okoriom aḍita iyool-ịga lọ rọki ọkanyan.

⁵Ạbuphe ọmoogh bọ kụ ụze bịdi bịn ọḍuaghu oopho ụ́liom. Bịdi aal ịnam mọ kụ ọḅem mọ, ‘Iboom Ọmoogh-we phọ. Yoor moḍighi rạalha!’ Ghạlamo abukoriom iyool-ịga phọ ạbidi bịn ụ́moogh igbiririph esi ạbidi.”

⁶(Ọmoogh-we phọ ạḅem ịduon: “Mị kạ́nma mun oye ighirigiir sịen ade phọ. Mị rꞌaloor ạmi kạḅogh ni oomo phọ awe phọ ạlogh ḍịghaagh ạbudaam mọ ạbidi. Ạbudaam mọ ạbuphe phọ koogulemi ni de phọ kụ mị rạ́pel de phọ ḍịghaagh ạbidi.”)

⁷Bụphe ogho bọ ọḅile aal iyool-ịga phọ uphir ịmi bịn kụ mị aḍighi okoriom iyool-ịga phọ ịpe rọki bọ ọkanyan phọ. Mị ụsighe ni ịyal ịkala ireeny: nyoniin mị ughol mọ “Ạghusan”, nyọori phọ oghol mọ “Ạmuḅoph”. Kụ mị ạmaar aphogh ghan ḍita iyool-ịga phọ.

⁸Mị útue mun ụ́kparam ịdi ịraar abukoriom iyool-ịga dị ụlogh ịmi ḍien oḍighi kụ mị aphorogh oomo phọ ạbidi esi oniin ụnwanyu.

⁹Pọ kụ amem dị mị ạḅeni ḍita ịga phọ mọ, “Mị káḍighi mun okoriom anyina. Ạbulo komuughu, omuughu. Bụlo koogulaan, oogulaan. Ịpe esugha bọ oniin kapiemi ni nyoniin.”

¹⁰Kụ mị ạsighe ọkala phọ ọpo oghol bọ mọ “Ạghusan” phọ awun, esi oogbonyon ịyo phọ ịpe Ọmoogh-we phọ aghiran bọ rꞌareelhe phọ.

¹¹Kụ iḍighi kụ oogbonyon ịyo phọ ḍio phọ ạḍiphe phọ. Bụphe ogho bọ ọḅile aal iyool-ịga phọ uphogh ghan ni ịmi kụ bịdi ulegheri ni mọ Ọmoogh-we phọ kụ rạkaaph esi ịphen mị raḍighi bọ.

¹²Mị ụḅeni ni bịdi ịduon: “Eḍighi ịyaar lọ ịḅeeraan inyina, pọ ịkpe ịmi ikpoki phọ yira omerenyan bọ kụ ọlo eḍighi ịyaar lọ inyina ị́ḅeeraan, pọ ịpam ni.” Kụ iḍighi kụ bịdi ụkpe ịmi ịraardi ipoḍi asilva ịdipho ịikpia ạmi.

¹³Ọmoogh-we phọ ụḅeni ni ịmi, “Sịghe ikpoki phọ ạlogh sịphe igbe ikpoki Otu Ịiḅereghi phọ.” Kụ iḍighi kụ mị ạsighe ịraardi ipoḍi asilva phọ — iboom mọ ikpoki phọ bịdi ogbiighi bọ mọ mị ạman phọ — ạlogh sịphe igbe ikpoki Otu Ịiḅereghi phọ.

¹⁴Pọ kụ amem dị mị awun ọkala phọ ọpo amuneniom bọ ịyal phọ, nyọpo oghol bọ mọ “Ạmuḅoph” phọ, bịn ạmuḅoph phọ aJuda rꞌỊzirel amuneen.

¹⁵Kụ Ọmoogh-we phọ ụḅeni ịmi mọ, “Ḅịle aḍighi ịdipho okoriom iyool-ịga, egi phọ ẹphen phọ ọwalawala okoriom.

¹⁶Mị maseere ni okoriom mọ ạmaar aphogh iyool-ịga phọ ạmi, kụ ọlo ọdi órue ọloghonaan ḍịghaagh iyool-ịga phọ ịpe rẹwa bọ ophe phọ; ḅịle kẹn rápogh ghan ịpe mephe bọ, mụghumo ookonom ịlo eḍighima ịyaar, mụghumo ọngo eḍien ịpe emoon bọ. Kpạripe ghụn ọdi rapogh ghan ọga lọ ạmoogh ẹnuum bịn kaghiigh ạanyi, ạḅile ạpham rạda aruwol phọ kạkpagharan.

¹⁷Ọwalawala okoriom iyool-ịga phọ ọphon phọ maguul! Ọdi maghel ḍita iyool-ịga phọ. Ẹgham kụ kepiemi ịikpo phọ ọdi. Ạḍighaagh ọdi kẹnyoon ni, ḅịle kẹn ekpeḍien elhiom mọ ọdi keḅomaan.”