Read abua Zẹkaraya 12 Bible Online

Zẹkaraya 12 - abua bible

Zẹkaraya 12

¹Ḍịen kụ adom dị egbolomaam Ịzirel dị ẹḍua esi Ọmoogh-we phọ, Ọmoogh-we phọ ọpo ạatarion bọ okuaḍio phọ ạḅile ạlhem de phọ kụ ạngo oye ghuḍum. Ọdi ạḅem ịduon:

²“Mị kạsighe Jeruselem ạmaaniom ịdipho ạtobili amiim; areelhe phọ ekoom bọ nyọdi kọpughol kụ ọbelebele ịdipho ạbupughol miim. Kụ mem dị bịdi oghoonyom Jeruselem, kọḅile ni okoonyom aani igbogh ạramha phọ aJuda.

³Kụ ọlo mem dị amem mọ kẹteeny bọ, mị kạsighe Jeruselem aḍighi ịdipho aḍighiigh dị ẹemor — tọrotoro eelhe lọ ọghi ophoophe koḍighima ni ịyaar. Oomo areelhe aḅirini phọ kọḅophoghan ni kụ ozuom nyọdi ẹgham.

⁴Mem mọ ạmuphe phọ mị kạngo ni ruugu ịnam-ạsu phọ ạbidi, kụ ạbuphe oḍigh bọ oḍiku ẹlaal. Mị kakori ni weye phọ aJuda, kụ ọlo mị kaḅomoghi ni riḍien ịnam-ạsu phọ ạbidi.

⁵Kụ aropolo phọ aJuda ogbi ghan ọḅeni asiloor ạbidi, ‘Ọmoogh-we Ẹnaan Oomo Ịikpo phọ rạngo ịikpo weye phọ ọdi orugh bọ Jeruselem.’

⁶“Mem mọ ạmuphe phọ, mị kạsighe ropolo phọ aJuda ạmaaniom ịdipho ạnian ẹpe ẹekpua mꞌozo ịbiakpa lọ mẹkpo — bịdi kopiemi ni oomo areelhe phọ ekoom bọ bịdi. Awe phọ aJeruselem kọtol li rꞌẹepho sịphe ẹmha phọ.

⁷“Mị Ọmoogh-we phọ kạpur ri ạngo ọkpar opu weye ẹgham mọ aJuda, pịdi eghuan phọ ẹpe ẹemara ẹemara phọ aDevid ḅịle rꞌawe phọ aJeruselem ọmoogh bọ kẹ́bugh épu ẹpe ạbueri phọ awe phọ aJuda.

⁸Mem mọ ạmuphe phọ Ọmoogh-we phọ kaako ni bụphe orugh bọ ẹpe Jeruselem, kụ ghạlamo oye dị ạkar adugh sịphe igbo phọ ạbidi kạmoogh ni ịikpo ịdipho aDevid. Ẹemara ẹemara phọ aDevid kụ koḍiemiom bịdi ịdipho ọokpaany Ọmoogh-we phọ, ịdipho Ẹnaan rꞌaloor.

⁹Mem mọ ạmuphe phọ mị kapiemi ni tọrotoro eelhe dị ọnya ozuom ẹgham Jeruselem.

¹⁰ “Mị kamuzeḍi ni uwaloor ọnma ighirigiir rꞌuwaloor ịiḅereghi siloor ẹemara ẹemara phọ aDevid ḅịle rꞌạbueri phọ awe phọ aJeruselem. Bịdi kopogh ni nyọpo bịdi ọsighe bọ ọsoph phọ oroph oghiigh, kụ bịdi omoghinaan nyọdi ịdipho awe lọ romoghi ogina ọony. Bịdi komoghi ni iboom, ịdipho awe lọ ọkpana ọony ạbidi amugh.

¹¹Mem mọ ạmuphe phọ emoghi phọ kẹtol bọ Jeruselem kẹbugh ni kụ ẹkighimaam ịpe omoghinaan bọ Hadad Rimon ẹpe ạḍiyaghaghaany ade phọ aMegido.

¹²Tọrotoro eghunotu ade phọ komoghinaan ni siloor ạbidi: eghunotu phọ ẹpe eḍighi bọ ẹemara ẹemara aDevid, eghunotu phọ ẹpe eḍighi bọ ẹemara ẹemara aNetan, eghunotu phọ ẹpe eḍighi bọ ẹemara ẹemara aLivai, eghunotu phọ ẹpe eḍighi bọ ẹemara ẹemara aSimei, ḅịle rꞌoomo phọ ịpheri phọ arughunotu phọ. Tọrotoro eghunotu komoghinaan ni siloor ạbidi, kụ alephiri ạnmuny arughunotu phọ kọgbatanaan ni nmạriir phọ kụ omoghi.”