Read abua Zẹkaraya 14 Bible Online

Zẹkaraya 14 - abua bible

Zẹkaraya 14

¹Aḍio phọ Ọmoogh-we phọ kạtolom bọ ạgada aagbo ịiruen phọ mẹebeeph. Kụ ogbi nụun owum ạraraar phọ aJeruselem, kụ odian rạraar phọ ịpe owum bọ risigh anyina.

²Ọmoogh-we phọ kaakpomoghi oomo areelhe phọ kụ otuphiom ẹgham Jeruselem. Ẹmha phọ kemeel li, obum rạraar aruutu phọ, ọḅile obiighi nmạriir phọ. Oolemi weye ẹmha phọ odi, buniin kokeel eeruen ẹmha ọtol dọl iiruen kụ ọlo bụphe osugha bọ kọtol li sịphe ẹmha phọ.

³Kụ Ọmoogh-we phọ agbi omite ọghi eenan rꞌareelhe phọ ịpe phọ, ịdipho ọdi meeghi ghan bọ mem dị eten.

⁴Mem mọ ạmuphe phọ, ọdi kạmeera sịphe Eegum Ọlivs ḍịghaagh phọ ạḍiphe erumuḍio phọ remite ghan bọ Jeruselem. Kụ ogbi nụun odi Eegum Ọlivs ịyal abin; eboom eḍiiny kụ kedi bọ, emiigh ẹpe erumuḍio phọ remite ghan bọ kụ esi ẹpe erumuḍio phọ remeel ghan bọ. Egbem ẹeḅaraph phọ keḍuraan ẹki ẹpe ephunom mọ, ḅịle kẹn ẹpheri phọ egbem mọ eḍuraan ẹki ẹpe esoorom mọ.

⁵Nyina kẹdaph ghan eḍiiny phọ ẹpe edi bọ ẹeḅaraph phọ kụ esumughu. Nyina kesumughu ni ịdipho ạburude ạburude phọ anyina osumughu bọ mem mọ ọpo ade phọ ephiigha bọ mem mọ ọpo Uzaya kụ ạda bọ Juda. Ọmoogh-we Ẹnaan phọ ạmi katu ni; kạpam ni oomo ạruukpaany phọ kụ atumom.

⁶Mem dị amem mọ kẹteeny bọ, ooroogh osipheeny kạ́tol mun,

⁷ghạlamo kẹn ufiri. Ootaany bịn kụ kạtol ghan, ghạlamo aḍughul li. Ọmoogh-we phọ bịn kụ alegheri mem mọ ọpo ịphen phọ kemite bọ.

⁸Mem dị aḍio phọ ạḍien phọ ketu bọ, amumoom ạmuum kakil li Jeruselem amite; egbem ạmuum kakil asoor ẹpe Ọphiiny-Ạla kụ ạmueri phọ egbem mọ akil asoor ẹpe aMeditarenian phọ. Ạmuum mọ kakil li tụtu ạlha phọ eeghiraan, mem aghozogh rꞌamem unu.

⁹Kụ Ọmoogh-we phọ agbi ọda oomo phọ ade phọ; tọrotoro oye kạaḅereghi ni nyọdi ịdipho Ẹnaan ạḅile alegheri ḍien phọ ọdi eniin phọ elegheriom mọ.

¹⁰Oomo eelhe phọ, emiigh ẹpe Geba ẹpe ephunom mọ kụ ẹghi esi Rimon ẹpe esoorom mọ kọophulemi ni. AJeruselem kụ kapoph ạki ạnyu apeleghiom de phọ ạḍiphe eeghironom bọ ẹmha phọ. Ẹmha phọ kẹḍua ni kꞌẹpe Ọnhu-aḍibuo ạBenjamin kụ ẹki esi Ọnhu-aḍibuo Ẹkul phọ, ẹpe ogbaany ọnhu-aḍibuo phọ ạrol ghan bọ, ḅịle kẹn kemiigh sịphe Ẹsogolo Esi Otu ạHananel kụ ẹki esi phọ omiim ghan bọ iimuma avain ịlo ọdaam-ẹmha phọ.

¹¹Awe phọ kotugh sịphe phọ rꞌẹepho, oghiilaan amuphe kạ́tol mun.

¹²Ọmoogh-we phọ kạsighe ni ẹkaraph ẹzegh ạngo oomo areelhe phọ ạbuphe robe ghan bọ rạagham rꞌaJeruselem. Aḍizu phọ ạbidi kẹḅor ghan ni mem dị bịdi odi ni ropooghu; ariḍien phọ rꞌasinem mọ ạbidi kẹḅoroghu ni.

¹³Mem mọ ạmuphe phọ Ọmoogh-we phọ kaḍighi ni ịdi aruugu kasiph bịdi kụ kólegheri mun ịlo oḍighi kụ oniin asiph ghan ạḅile azuom ẹgham oye lọ atuman nyọdi.

¹⁴Awe phọ aJuda kobianaan ni ọphel aJeruselem. Bịdi kobum ni ẹelha areelhe phọ — ẹeḍiom agol rꞌasilva ḅịle rꞌarukpe.

¹⁵Ẹkaraph ẹzegh keḍighi kẹn ni ịnam-ạsu phọ rꞌịnam adool phọ rꞌạsikamel phọ — oomo phọ ịnam mọ ẹpomoghian phọ ọmoogh bọ sịphe arugbogo phọ ạbidi.

¹⁶Kụ oomo phọ awe phọ ạbuphe kosugha bọ esi areelhe phọ ịpe eeghi ghan bọ rạagham mọ rꞌaJeruselem ogbi ghan ọghi lhạ etum lhạ ẹpe Jeruselem ọoḅereghi Ọmoogh-we Oomo Ịikpo phọ ịdipho ọdaam, ḅịle rꞌolhe Ẹyaal Arophoghoghoony phọ.

¹⁷Eḍighi ịyaar dị eelhe úmeera ụki ụuḅereghi Ọmoogh-we Oomo Ịikpo phọ ịdipho ọdaam, pọ ọlophia kạ́loph mun eelhe phọ ạbidi.

¹⁸Eḍighi ịyaar dị awe phọ Ijipt úmeera ulhe Ẹyaal Arugbogo phọ, pọ eniin phọ ẹzegh kꞌỌmoogh-we phọ keḍighi aani ni bịdi ịdipho eḍighi bọ tọrotoro eelhe lọ úmeera ụki.

¹⁹Ịphen kụ ịdi kọliom Ijipt ḅịle rꞌạtorotoro eelhe lọ úmeera ulhe Ẹyaal Arugbogo phọ.

²⁰Mem mọ ạmuphe phọ kọge ni ghạlamo ịsiphe ạsigba ịdeneneen ạrusu phọ mọ “Mọḅogh ọngo Ọmoogh-we phọ.” Asuugh phọ ịpe rọsaam ghan bọ eḍien sịphe Otu Ịiḅereghi phọ keḍighi ni rạraar iigbia ịdipho ạrukpa phọ edi bọ sịphe enmeny phọ.

²¹Tọrotoro aguugh sịphe Jeruselem rꞌoomo aJuda kọgbatan ni aḍighi ịyaar ịiḅereghi Ọmoogh-we Oomo Ịikpo phọ. Awe phọ ạbuphe kọpinyon ghan bọ rịkia phọ kọsighe suugh phọ ịpe phọ kụ ọsaam ghan ịnam ạrikia phọ. Mem dị amem mọ ạmuphe phọ kẹteeny bọ, abumuul ḍighi kọ́tol mun sịphe Otu Ịiḅereghi Ọmoogh-we Oomo Ịikpo phọ.