Read abua Zẹkaraya 2 Bible Online

Zẹkaraya 2 - abua bible

Zẹkaraya 2

¹Esi ịnon ịmiin mị ụmiin oye dị ạpham oḍigh dị rọtooghiom ḍịdoony

²kụ mị apuru mọ, “Nạ rạki ẹghen?” Kụ ọdi ạphagharanaan mọ, “Mị rạki ọtooghi aJeruselem ọmiin ạḍidoony phọ rꞌẹreghe phọ ọdi.”

³Pọ kụ amem dị mị ạmiin ọokpaany phọ ọpo rạkaaphan ghan bọ rꞌạmi dị aru amite, kụ ọnon ọokpaany aru ạteeny nyọdi.

⁴Kụ ọḅel phọ ạḅeni ọphori phọ mọ, “Kiil ạghi ạteeny onyugheel ọony phọ ọpo ạpham bọ oḍigh phọ ọpo rạtooghiom ghan bọ ạḅeni mọ aḍita awe rꞌịnam dị kẹtol Jeruselem kẹbugh ni ẹpughan ọḅiir iikpe oghoonyom.

⁵Ọmoogh-we phọ maguanaan mọ ọno rꞌaloor kụ kaḍighi iikpe ạnian dị kekitonom ẹḅile ekori ẹmha phọ ḅịle kẹn mọ ọno katugh sịphe rꞌoomo eegu phọ ọno.”

⁶Ọmoogh-we phọ ạḅeni ni weye phọ ọdi mọ, “Mị kụ ụuwalalami bọ ni inyina. Kụ ọlo nyịidipho nyina edi bọ dọl iiruen phọ ẹpe Bạbilonia, isumughu erigheel Jeruselem.

⁸Oye lọ ịgur inyina pọ mạgur ịyaar ạmi dị ẹman mạar iboom.” Kụ iḍighi kụ Ọmoogh-we Oomo Ịikpo phọ urom ịmi ọghi ọteeny areelhe phọ ịpe mewum bọ ẹsighiogh rạraar awe phọ ọdi ọḅeni dom mọ aḍien:

⁹“Ọmoogh-we phọ rꞌaloor kụ kiruphiom inyina ẹgham, kụ awe dị oḍighi ghan rẹbene anyina kụ kobum ọsighiogh rạraar anyina.” Mem dị ịphen memite, tọrotoro oye kalegheri ni mọ Ọmoogh-we Oomo Ịikpo phọ kụ urom ni ịmi.

¹⁰Ọmoogh-we phọ ạḅem mọ, “Weye aJeruselem, ịmoor sụor iboh! Mị ratu orughan rꞌanyina.”

¹¹Mem mọ ạmuphe phọ awe ịbadi areelhe kotu ni esi Ọmoogh-we phọ kụ oḍighi weye ọdi. Ọdi katugh ni sịphe igbo phọ anyina, ḅịle kẹn nyina kelegheri ni mọ ọdi kụ urom ni ịmi oru ọteeny anyina.

¹²AJuda kạḅile kẹn ni aḍighi ẹmha phọ Ọmoogh-we phọ ạsaḅar bọ sịen ade iigbia phọ ọdi, kụ aJeruselem kaḍighi ni ẹmha phọ ọdi ạkar bọ ạphomoghian.

¹³Tọrotoro oye aḅoorian ghisigh Ọmoogh-we phọ, loor esi dị ọdi katu sịphe ạdol iigbia phọ ọdi atugh.