Read abua Zẹkaraya 6 Bible Online

Zẹkaraya 6 - abua bible

Zẹkaraya 6

¹Mị ụḅile ni aphogh. Egi phọ ẹphen mị ụmiin inya arughuugh-ude dị ẹḍua remite ịbaay ịyal aroogbolom dị oḍighinom enaba.

²Ọḅel oghuugh-ude phọ ịtogh-tọgh ạrusu kụ iḍur ghan, omuneniom ịyal phọ iḍiil kụ iḍur ghan,

³ịphalaḅaal ạrusu eḍur ghan omuneniom ịraar phọ, kụ ịdi ẹpoghogha kụ iḍur ghan omuneniom inya phọ.

⁴Kụ mị apuru ọokpaany phọ mọ, “Oye phọ, ẹmhu arughuugh-ude phọ ịphen eeghe?”

⁵Kụ ọdi ạphagharanaan mọ, “Ịphen phọ, pọ inya ọdo ookuugh; pụruku bịdi ọḍua ni egbodo Ọmoogh-we oomo ade phọ kụ oru.”

⁶Oghuugh-ude phọ ọpo iḍiil ạrusu phọ kụ eḍur ghan bọ anyeene ẹpe ephunom mọ rạki Bạbilonia; ịphalaḅaal ạrusu phọ inyeene ẹpe erumuḍio phọ remeel ghan bọ, kụ ịpe epoghogho bọ inyeene eelhe ẹpe esoorom mọ.

⁷Ịdipho ịpe ẹpoghogha bọ eru bọ emite, bịdi ịkururu bịn ọghi ophogh oḅiligha ade phọ. Kụ ọokpaany phọ ạḅem mọ, “Ịki ephogh ịlo ade phọ edi”, kụ bịdi ọghi.

⁸Kụ ọokpaany phọ ạlho ụḅeni ịmi mọ, “Ạrusu phọ ịpe ẹdaph bọ ẹpe ephunom mọ ẹghi ẹpe Bạbilonia mẹphoomi ọghagh ologhi Ọmoogh-we phọ.”

⁹Ọmoogh-we phọ ụngo ni ịmi dom mọ aḍien.

¹⁰Ọdi ạḅem mọ, “Sịghe ruunmo phọ aHeldai, Tobaya rꞌaJedaya bụphe ọrol bọ dọl iiruen ọngooghi bọ kụ ạghi mem mem mọ ẹpe otu phọ aJosaya ọony ạZefanaya. Oomo awe phọ ạbuen phọ ụrol ẹpe Bạbilonia dọl iiruen phọ kụ morigheel.

¹¹Sịghe silva rꞌagol phọ bịdi ọpham bọ origheel ạlemom eghoony, kụ ạsighe eghoony phọ azu ẹmhu ogbogh oyil ạrikia phọ Josua ọony phọ ạJehozadak.

¹²Ḅẹni nyọdi mọ Ọmoogh-we Oomo Ịikpo ạḅem mọ, ‘Oye phọ ọpo oghol bọ mọ Ọla Phọ kamite ni ạbugh sịphe ọdi odi bọ kụ ạḅile ạlogh Otu Ịiḅereghi Ọmoogh-we phọ.

¹³Ọdi kụ oye phọ kạlogh bọ otu phọ kụ ọdi ạmoogh rughuenian phọ ịpe rọngo ghan bọ ọdaam eelhe phọ, kụ ọdi kạda ni weye phọ ọdi. Oyil ạrikia kạmeera ni ọogaany ạgada ọdaam eelhe phọ ọdi, kụ bịdi ọḅophoghan oḍighi ghan oḍighi rꞌẹepho rꞌẹereegh.’

¹⁴Eghoony ọdaam eelhe phọ kẹtol ghan sịphe Otu Ịiḅereghi Ọmoogh-we phọ kụ ọsighe ọotughianam ghan Heldai, Tobaya, Jedaya ḅịle rꞌaJosaya.”

¹⁵Awe dị orugh rikpisi dị ẹkel kotu ni kụ ọloghonaan ḍịghaagh ọḅile ọlogh Otu Ịiḅereghi Ọmoogh-we phọ. Kụ mem dị mọlhogh ọmadan, nyina kelegheri ni mọ Ọmoogh-we Oomo Ịikpo kụ urom ịmi oru ọteeny anyina. Oomo phọ ịphen phọ kemite ni eḍighi ịyaar lọ nyina ẹkaraghi ẹnaghanan ịtooghi Ọmoogh-we Ẹnaan phọ anyina.