Read abua Zẹkaraya 8 Bible Online

Zẹkaraya 8 - abua bible

Zẹkaraya 8

¹Ọmoogh-we Oomo Ịikpo ạngo ni Zẹkaraya dom mọ ạḍien mọ:

²“Mị mạwa ghan ni ọloghonaan ạḍighaagh Jeruselem loor esi eboom ẹphomoghian phọ mị ạphomoghian bọ weye phọ ọdi, ẹphomoghian dị meḍighi ịdi mị rạkagham ologhi ẹpomoghian phọ ạbidi.

³Mị katigheel atugh sịphe Jeruselem, ẹmha iigbia phọ ạmi. Kọḅile ghan okol mọ ẹmha omeeraam, ḅịle kẹn kọḅile ghan okol ẹeḅaraph Ọmoogh-we Oomo Ịikpo phọ mọ ẹeḅaraph iigbia.

⁴Ikumoor awe rꞌikumoor ạnmariir dị mọkpo osi esi dị ọpham eḅu rotelhiom kọḅile ghan ni ọtologhu sịphe egbogh erugh phọ.

⁵Ḅịle kẹn, ịbam ạnmuny rꞌạnmanyaan komuza ni roḅodo phọ kụ opeghogh ghan reephegh.

⁶“Esi awe phọ ạbuphe osugha bọ sịphe eelhe phọ ẹkigh mụdi ịphen phọ kétue emite, kụ ọlo ịphen phọ ịmi ị́kparanaan oḍighi.

⁷Mị kạtagharan weye phọ ạmi ẹpe arikpisi phọ mọsighe bọ bịdi ọghiighi,

⁸kụ mị ạsighe bịdi ẹpe erumuḍio phọ remite ghan bọ rꞌẹpe erumuḍio phọ remeel ghan bọ kụ mị aḅulemi mọ orugh sịen Jeruselem. Bịdi koḍighi weye ạmi, kụ mị aḍighi Ẹnaan ạbidi dị kạda bịdi asophonaan ghan iiḅi ịiruen.

⁹“Ịmoogh ọkparam! Nyina rẹnaghan iniin phọ ikpo ọnhu phọ ariil phọ ọghaaph bọ mem mọ ọḅile bọ ropighi Otu Ịiḅereghi phọ ạmi.

¹⁰Tụtu kẹteeny bọ sịen phọ oye órue ghan ophir oye mꞌẹnam, ḅịle kẹn oye ọ́rol dị úkiilaan ghan ẹpomoghian phọ ọdi. Mị kụ ụsighe ghan weye ạkpaaghiom weye.

¹¹Kụ ọlo nyịidipho mị rapogh ni kịro ọdo ephoghom weye eelhe phọ ẹphen osugha bọ.

¹²Bịdi koḅeph ghan ni riiḍien phọ ạbidi rꞌẹepho. Ireeny avain phọ ạbidi kemuum ghan ni rughuuny, ade phọ kesoor ghan ni riiḍien, ḅịle kẹn ọlophia kạbugh ni. Mị kạngo ni oomo phọ ạḍiseph phọ ạḍien phọ weye eelhe phọ ạmi osugha bọ.

¹³Nyina awe phọ aJuda rꞌỊzirel! Mem dị eten aruuruen uronyonaan ghan kụ oniin ạḅeni ghan nyoniin mọ, ‘Guugulaan ịdipho oogulemi bọ Juda rꞌỊzirel!’ Kụ ọlo mị kịphel inyina, kụ aruuruen phọ oniin agbi ghan ọḅeni oniin mọ, ‘Aḍiniin phọ ạḍiseph phọ ẹteeny bọ Juda rꞌỊzirel kụ ẹteeny aani nyịna!’ Kụ iḍighi kụ ịmoogh ọkparam, kékiilaan.”

¹⁴Ọmoogh-we Oomo Ịikpo phọ ạḅem mọ, “Mem mọ ọpo ạburude ạburude phọ anyina oḍighi bọ ịpe ẹghagh bọ ologhi phọ ạmi, mị ugbiighi ni oogulemi ạbidi kụ mị únme ologhi ạmi, mị uḍighi ni ịpe mị agbiighi bọ.

¹⁵Kụ ọlo nyịidipho mị ragbiighi ghan ọseph awe phọ aJeruselem rꞌaJuda. Kụ iḍighi kụ kékiilaan.

¹⁶Ịphen kụ ạraraar dị nyina ẹkpe oḍighi: Oniin ạgba ghan igey kụ ạḅeni nyoniin. Ẹpe aruutu iilogh phọ, isoph ghan iiḅi ịiruen — ịdo phọ ịpe rẹsighe ghan bọ ẹepho keru.

¹⁷Oniin kúgbiighiom ghan nyoniin ịkaraph. Kẹ́gba ghan ọkpe mem dị nyina meghunyan ni. Mị akel li ọkpe, ịkaraph ịiruen ḅịle rꞌigbagbaar iḍighinom ạraraar.”

¹⁸Ọmoogh-we Oomo Ịikpo phọ ạngo ni Zẹkaraya dom mọ ạḍien mọ:

¹⁹“Ọkaagh ẹḍogh phọ ạrol ghan bọ rụnwanyu phọ ịpe emuneniom bọ inya, oogh, oḍual rꞌaḍioph phọ keḍighi mem olhe ghan ẹyaal iboh rꞌọḅaal ologhi awe phọ aJuda. Nyina ẹkpe ọphomoghian igey phọ ḅịle rꞌẹepho.”

²⁰Ọmoogh-we Oomo Ịikpo ạḅem mọ, “Amem mọ retu ni mem dị awe kọḍua ịbadi ạramha kụ otu Jeruselem.

²¹Awe eniin ẹmha kọḅeni ghan ni weye ẹnon ẹmha mọ, ‘Yoor rọki ọoḅereghi Ọmoogh-we Oomo Ịikpo phọ ḅịle rꞌọlom ạḍiseph phọ ọdi. Ịdaph iyoor’

²²Ịbadi aweye ḅịle rꞌareelhe dị ẹmoogh ni ịikpo kotu ni Jeruselem ọoḅereghi Ọmoogh-we Oomo Ịikpo phọ ḅịle rꞌọlom ạḍiseph phọ ọdi.

²³Riiḍio phọ ịpe phọ, ḍioph aruuruen kotu ghan ni ọteeny oniin ọnyo aJu kụ ọḅeni mọ, ‘Yoor rọwa ophinomaam aani eseeriom mọ anyina, loor esi dị yoor mọnaghan ni mọ Ẹnaan edi ni rꞌanyina.’”