Read abua Zẹkaraya 9 Bible Online

Zẹkaraya 9 - abua bible

Zẹkaraya 9

¹ Ḍịen kụ adom Ọmoogh-we phọ: Ọdi mạto mọ kọliom ni de phọ aHadrak rꞌẹmha phọ ạDamaskos. Arughunughun phọ Ịzirel ḅịle rꞌẹkpana ẹmha phọ ạSiria eḍighi ni ịlo Ọmoogh-we phọ.

²ẠHamat phọ odi bọ ọku aHadrak, ọlo ọdi phọ kẹn ni; ịduon phọ kẹn kụ ịdi igbogh ạramha phọ aTaya rꞌaSaidon rꞌoomo ẹmaar phọ ạbidi eḍighi ni ịlo ọdi.

³ATaya maghoony akitonom loor ọdi, ạḅile atool silva rꞌagol akpol dị ẹkigh ịikpelem!

⁴Kụ ọlo Ọmoogh-we phọ kạsighiogh ni tọrotoro ịyaar lọ bịdi ọmoogh. Ọdi kạsighe ni ẹelha phọ ạbidi atoph asumughi ọphiiny, kụ ọlogh nịan ẹmha phọ.

⁵Ẹmha phọ Askelon kẹmiin ni ịphen phọ kụ aruugu asiph. Ẹmha phọ aGaza kẹmiin ni ịphen phọ kụ epin loor ạbidi iboom. Ịduon phọ kẹn ni kụ kẹtolonaan Ẹkron, ḅịle kẹn oḍuom ologhi phọ ạbidi kape ni. Ọdaam mọ aGaza kạ́tol mun, ḅịle kẹn oye kạ́tol mun Askelon.

⁶Ọdo kịrokiro awe kụ kọtol Ạsdod. Ọmoogh-we phọ ạḅem mọ, “Mị kasooromi we aFilistia phọ ạbuen phọ ophoophe bọ siloor phọ ạbidi.

⁷Bịdi kọ́ba ghan mun ẹnam lọ emughom ịḅaal mụghumo ole ẹnon eḍien lọ eḍighi ugbini ugbini. Oomo awe phọ ạbuphe kosugha bọ koḍighi pạkiri awe phọ ạmi, kụ ọkigh ọto eghun phọ aJuda. Ẹkron kaḍighi pạkiri awe phọ ạmi ịdipho aJebusait oḍighi bọ.

⁸Mị kaako ni de phọ ạmi, ḅịle kẹn mị kámeera awe ẹgham ạay ghan oten. Mị kámeera mun ịkaraph awe ọda ọgbiphoghom weye phọ ạmi. Mị mạmiin ni ịpe awe phọ ạmi mọmiinom bọ.”

⁹Weye ạZayon, ịmoogh iboh, ịmoogh iboh! Nyina awe aJeruselem, ịlo ḍịolho iboh! Ịmiin, ọdaam ẹmha phọ anyina ratu ọteeny anyina! Ọdi ratumom ịikpo rꞌọkpar opu, kụ ọlo asooromi ni loor kụ aḍigh ẹnam adool — ẹnam mọ eḍighi elephiri ẹnam adool.

¹⁰Ọmoogh-we phọ ạḅem mọ, “Mị kạsighiogh rughuugh ẹgham ude sịen Ịzirel ạḅile ạsighiogh rụsu phọ sịen Jeruselem; Ạsikumugh phọ rọkimom ghan bọ ẹgham mọ kebunughian ni. Ọdaam-ẹmha phọ anyina rꞌịpheri phọ areelhe phọ kọtol li rꞌẹepho; Ọdi kạda ni emiigh otu-ḅualhe kụ ẹghi ẹteeny otu-ḅualhe, emiigh ẹpe Ọphiiny aYufratis kụ ẹghi esi ruukuna ade phọ.”

¹¹Ọmoogh-we phọ ạḅem mọ, “Loor esi ịyo phọ ạmi rꞌanyina, ịpe ọmeremiom bọ rꞌịḅaal ạrikia phọ, Mị kạtagharan ni weye phọ anyina — bịdi opun ooni ạdol iiruen phọ.

¹²Itigheleghu, nyina phọ edi bọ dọl iiruen phọ kụ ẹmoogh bọ ni oḍuom ologhi; Itigheel esi ạdol ẹereegh phọ anyina. Mị rịḅeni inyina nyịidipho. Mị kạsighe ni ḍịseph kụ ịkpiom inyina apeelhe ịyal amem esi oomo ịpe nyina mẹmiinom bọ.

¹³Mị kạsighe Juda kụ aḍighinom ịdipho ạkumugh oye ẹgham kụ Ịzirel ịdipho ịkpina phọ. Mị kaḍighinom weye phọ ạZayon ịdipho elhool ẹgham, kụ atuphiom ẹgham weye aGris.”

¹⁴Ọmoogh-we phọ kamite ni ạnyu awe phọ ọdi; Ọdi kạtaph ni ịkpina phọ ọdi ịdipho aḍio lọ rẹmepheghian. Ọkar Ogbogh Ọmoogh-we phọ kapula ni ọkuodu phọ; Ọdi katelhe esi oghim mọ ạḍua bọ ẹpe esoorom mọ.

¹⁵Ọmoogh-we Oomo Ịikpo phọ kaako ni weye phọ ọdi, kụ bịdi oogulemi ẹpomoghian phọ ạbidi. Bịdi kọlooghi ghan ẹpe erugh ẹgham mọ ịdipho awe lọ amiim rakiigh kụ bịdi ozu ịḅaal ẹpomoghian phọ ạbidi; ịḅaal phọ kekil ịdipho ịḅaal ẹkia lọ ọsighe loor ẹkpa kụ ooku sịphe enmeny phọ.

¹⁶Mem dị aḍio phọ ạḍiphe phọ ketu bọ, Ọmoogh-we phọ kạpel li weye phọ ọdi ịdipho okoriom iyool-ịga phọ rạpel ghan bọ ḍita iyool-ịga phọ ọdi esi ịiḅaghami. Bịdi kọmu ni sịphe ade phọ ọdi ịdipho ịbekulari lọ ọdamaghi eghoony ọdaam-ẹmha.

¹⁷Ẹpe eeghia ẹnighe dị ade phọ kẹnighe! Ugheel ạnmuny phọ kọmoogh ni ịikpo esi olhe ghan ịbiakpa ade phọ rꞌọphughol amiim ade phọ.