Read abua Malakai 3 Bible Online

Malakai 3 - abua bible

Malakai 3

¹Ọmoogh-we Oomo Ịikpo phọ ạpagharanaan, “Mị katom ni ọokpaany ạmi mọ aselemi eten useenaan ịmi. Kụ Ọmoogh-we phọ ọpo nyina rẹwa ghan bọ katu ni ekperenom sịphe Otu phọ ọdi. Ọokpaany phọ ọpo nyina rẹwa ghan bọ ọmiin phọ katu ni agbeelom ịyo phọ ạmi.”

²Kụ ọlo ạnhian kụ katue bọ ạkparam ḍio phọ ạḍiphe ọdi katu bọ? Ạnhian kụ katue bọ ạkar ạmeera mem mọ ọpo ọdi kamite bọ? Ọdi kạkigh ịdipho ọkuakua ạsaḅa, ạkigh ịdipho ạnian dị ogu ọphoghi arukuron.

³Ọdi katu oogbo ịiruen ịdipho oye lọ ragbuur ghan kaselemi silva. Ịdipho ọlemom ọlem ragbuur ghan bọ silva rꞌagol kụ ịdi ọokpaany Ọmoogh-we phọ kagbuur bụpinyon rịkia phọ, pịdi bịdi ọsighe ghan inmo dị ẹkpe kụ otuomonaan Ọmoogh-we phọ.

⁴Pọ kụ amem dị inmo phọ ịpe awe phọ aJuda rꞌaJeruselem kọsighe bọ otuomonaan Ọmoogh-we phọ kegbi nụun ọḅeeraan ọdi ịdipho ẹrol ghan bọ mem dị meten.

⁵Ọmoogh-we Oomo Ịikpo phọ rạḅem ghan mọ, “Mị kamite ni sịphe ogbo phọ anyina oogbo ịiruen; ḅịle kẹn mị kạgba ni amitiom mem mem mọ bụphe ọta bọ rọogho phọ, rꞌabulhiom ẹmha phọ, rꞌạbuphe rọgba ghan bọ ịlo bịdi ụ́miin, rꞌạbuphe roogbegheḍiom ghan bọ weye lọ bịdi ophir oḍighinom oḍighi mem lọ mẹteeny ọkpe ịpe omerenyan bọ, rꞌạbuphe rọgbiphoghom ghan bọ rukpukele ạnmariir rꞌạbunyigo ạnmuny rꞌaruuruen loor esi dị oye ọ́moogh bịdi, ḅịle rꞌoomo ạbuphe ịmi ụ́logh bọ eegu.

⁶“Mị kụ Ọmoogh-we phọ kụ mị ránmia ghan. Kụ iḍighi kụ nyina, ẹemara ẹemara phọ ạJekob, kőpe ọmadan.

⁷Nyina ẹkigh bụrude ạburude phọ anyina bụphe moten bọ, nyina mẹḅitonaan iilogh phọ ạmi ẹḅile kẹn rẹ́daph mun. Ikiton eru esi ạmi, bịn mị kakiton ni atu esi anyina. Kụ ọlo nyina repuru ghan mọ, ‘Yoor koḍighi bọ ika kụ oḅula esi ạna?’

⁸Mị ripuru inyina, ẹkpe ni ḍụghum dị oye kaagbegheḍiom Ẹnaan? Ị́nighe dị ị́nighe, kụ ẹri nyina riigbegheḍiom ni ịmi. Nyina epuru mọ, ‘Ika kụ ẹdi yoor roogbegheḍiom bọ nyịna?’ Nyina ịmi ị́ngo ịikpia oghueniom ạmi: ịḅel esi aḍioph iimuma rꞌikpoki anyina.

⁹Itonyonaan edianaan oomo phọ anyina loor esi dị oomo phọ eelhe phọ ruugbegheḍiom ni ịmi.

¹⁰Ẹkpe ni dị nyina kẹsighe iruom ịmi ịḅel esi aḍioph ikpoki anyina eru ẹlogh sịphe Otu Ịiḅereghi phọ pịdi eḍien emuza sịphe phọ. Kụ ẹrol nụun ẹmiin mụghumo mị kakunyon rughuugh kꞌạke phọ kụ iikuanaan inyina amuzeḍi oomo igey ạraraar phọ.

¹¹Mị kámeera mọ asuogh-aben ephiemi ịizupha phọ anyina, ḅịle kẹn ịizupha ireeny avain phọ anyina kemuum ni emuzeḍi.

¹²Pọ kụ amem dị awe oomo areelhe kịmagh inyina mọ awe ọḅaal ologhi loor esi dị ade phọ anyina keḍighi ni egey esi orugh.

¹³“Nyina mẹghaaph ịikia ạraraar ịlo ạmi,” Ọmoogh-we phọ ạḅem. “Kụ ọlo nyina repuru ghan, ‘Eeghe kụ ẹdi yoor mọghaaph bọ ịlo ạna?’

¹⁴Nyina mẹḅem mọ, ‘Ạsuo ólho okumu Ẹnaan. Eeghe kụ ạsuo dị odi oḍighi ghan ịlo ọdi ạḅem, mụghumo kẹn ọkparagha oḍeenaan Ọmoogh-we Oomo Ịikpo phọ mọ yoor ọpioman esi ịpe yoor moḍighi bọ?

¹⁵Sịen yira rọmiin bọ, awe dị ophoophe loor kụ ạbudi ụmoogh ọḅaal ologhi. Ạbukaraph awe roḍum ghan kụ, esi ọḅaram, ọsighe ịkaraph iiḍighi phọ ạbidi rọdeghom ghan ọkparam mọ Ẹnaan bịn kụ ịyaar réḍighi ghan bịdi.’”

¹⁶Kụ awe phọ ạbuphe rooseeny bọ Ọmoogh-we phọ, oniin agbi ọḅaanaan oniin, kụ Ọmoogh-we phọ alher rụru kụ ạnaghan ịpe bịdi ọghaaph ghan bọ. Sịphe arisigh phọ ọdi, ụge ni ọlogh ḍịnya siḍien oomo phọ ạbuphe ooseeny ghan bọ Ọmoogh-we phọ, ọḅile bọ kẹn ọlogh nyọdi eegu.

¹⁷“Bịdi koḍighi ni weye ạmi,” Ọmoogh-we Oomo Ịikpo phọ kụ ạḅem. “Ḍio phọ ạḍiphe mị kạnya bọ, bịdi kọkaraghi ni oḍighi bụo ạmi. Mị kạnma ni bịdi ighirigiir, ịdipho ọde rạnma ghan bọ ighirigiir mọony lọ rakumu ghan nyọdi.

¹⁸Awe phọ ạmi kọḅile kẹn ni kụ ọmiin ọgbaranaan dị kạtol esi ạraraar dị kemitenaan weye aruukuan phọ rꞌạbukaraph awe phọ, oye phọ ọpo rukumu bọ ịmi ḅịle kẹn rꞌọpo rákumu bọ.”