Read abua Matiu 10 Bible Online

Matiu 10 - abua bible

Matiu 10

¹ẠJizos ạmagh ḍioph rꞌịyal ạbumatuan phọ ọdi aakpomoghi, kụ ạngo bịdi ịikpo ophoroghom ịkaraph aruwaloor, rꞌookonom ọdo kịrokiro ariiphina rꞌạreezegh.

²Ịphen kụ asiḍien aḍioph rꞌịyal abutelhedom mọ: ọḅel phọ, aSaimon ọpo oghol bọ mọ aPita, rꞌẠndru umor phọ ọdi; aJems rꞌạJon umor phọ ọdi, ạnmuny aZebidi;

³aFilip rꞌaBatolomiu; ạTomos rꞌaMatiu ọbonyiom iisogh phọ; aJems ọony phọ Ạlfios, rꞌạTadios;

⁴aSaimon ọpo aKenan phọ, rꞌaJudas Ịskariot ọpo aal bọ Jịzos.

⁵Ḍioph rꞌịyal phọ ạbuen kụ ẹdi ạJizos arom bọ, kụ ạto ạḅeni bịdi mọ, “Kẹ́ki eelhe aruuruen, ḅịle kẹn kéḍigh rꞌeniin ẹmha aSameria.

⁶Ịki ghụn ẹteeny weye Ịzirel, bụphe ọghigh bọ iyool-ịga dị ephe eten.

⁷Ịki ẹghaaph ghan mọ ọmar phọ kꞌẸnaan mạteeny sịen ẹda ạḍighaagh,

⁸eekonom bụo ariiphina, eḅerion bụphe momuughu bọ, eḍume bụo ẹzegh ọku ufe, ephorogh ruru. Ẹnaan mịlhoghonaan inyina ḍịghaagh oopho, ịtuugh ịdipho kụ ẹloghonaan bụnon ḍịghaagh.

⁹Kẹ́pam gol rꞌasilva pạ iḍigh ikpoki phọ anyina kụ erelhiom.

¹⁰Ḅịle kẹn kẹ́pam rukuru ịlom, rꞌọnon ạsuoma, rꞌarokoro, rꞌịkpara. Oye lọ raḍighi oḍighi kọngo ghan ni ịyaar ole.

¹¹“Kụ tọrobo ẹmha lọ nyina ẹghi esi, ipuru nyọpo ạkpe bọ ọpham anyina kụ ẹrol sịphe, ẹteeny mem lọ nyina kẹḍua ẹmha phọ ẹpe.

¹²Kụ otu lọ nyina eḍigh, ịmagh we phọ kụ ẹḅeni mọ, ‘Ẹepho ịrolonaan inyina!’

¹³Eḍighi ịyaar dị awe phọ ịsighe ni inyina, pọ ạḍiseph phọ nyina ẹngo bọ bịdi kẹtolonaan ni bịdi. Mụghumo inyina ị́sighe, ạḍiseph phọ nyina ẹngo bọ bịdi keḅula ni.

¹⁴Kụ tọrobo otu rꞌẹmha dị inyina ị́sighe, ụ́naghanan kẹn ikpo ọnhu phọ anyina, pọ rẹḍua ịikpa ịisaar aruwol phọ anyina eseere.

¹⁵Mị ạkar rịḅeni ghan inyina mọ ḍio ịiruen phọ kebephenaan ni we ẹmha phọ ẹpe phọ epu we phọ ạSodom rꞌaGomora.”

¹⁶“Ịnaghan, nyina ạbuphe mị arom bọ mọ iḍighi oḍighi phọ ạmi kẹkigh ịdipho iyool-ịga dị edi ogbo ilhom ịnam. Ịsu ologhi ịdipho ẹkaraph-ịyaar, ẹmoogh ẹepho ịdipho ọkurughozo.

¹⁷Igona loor. Awe kirorori ni inyina osoorom erugh kꞌikumoor awe kụ ịgurogh inyina rubughotu phọ ạbidi.

¹⁸Kịsighe ni inyina ọki esi ạbudaam eelhe rꞌaruwo ẹmha ịlo ạsiagba loor ẹmhu phọ ạmi, ịlo ọghaaph ooḅi ọghaaph phọ ọḅeni ạbidi rꞌaruuruen phọ.

¹⁹Mem lọ bịdi isoorom inyina erugh, kékaphian ghan oomiigh ịlo nyina kẹgba. Amem mọ ẹteeny, kịḅeni ni inyina ịpe nyina kẹkaaph bọ,

²⁰ịdi eḍighi bọ ikpo ọnhu phọ ịpe nyina kẹgba bọ kị́lo anyina, kẹḍua esi Uwaloor Ọde phọ anyina kụ etu.

²¹“Umor katorori ni umor ạlogh esi aḍuugh; ọde kạtuugh ni ịdipho aḍighi aani mọony ọdi; ạnmuny phọ kọmoogh ni oḅom ẹmhu ọḅogh bụphe ọmar bọ bịdi ọlogh esi aḍuugh.

²²Oomo awe kịlogh ni inyina ḍien loor ẹmhu phọ ạmi, kụ oye lọ ạkparam asi eekuna phọ, kạmoogh ni pẹleeny.

²³Bịdi ịgbiphoghom inyina eniin ẹmha, pọ ikiil ẹghi ẹnon. Mị ạkar rịḅeni ghan inyina mọ nyina kétue ẹkiighi oomo ạramha phọ Ịzirel eḍighi oḍighi phọ anyina ẹman, tụtu Ọony phọ Oye aru.

²⁴“Ạmatuan rápu ghan ọtughemia phọ ọdi. Ọony-otu rápu ghan ọde-otu phọ ọdi.

²⁵Ẹkasian ni dị ạmatuan phọ kameera ọmiinom ịdipho ọtughemia phọ ọdi, ḅịle ọony-otu phọ ịdipho ọde-otu phọ ọdi. Eḍighi ịyaar dị oghol ọde-otu phọ mọ aBielzebul, pọ asiḍien ịlo ạnmuny-otu phọ kebeeph epu sịphe.”

²⁶“Loor ịduon phọ, kékiilaan we. Ịyaar dị eekpereghian dị kékpegherenu ílho ghan. Ịyaar dị ạaghian dị kéganana ílho ghan.

²⁷Ịlo mị ịḅeni inyina esi ufiri, ịḅile ni ẹghaaph esi ẹphalaḅaal. Ịlo nyina ẹnaghan esi ịbooghian, ịtuugh ni ẹghaaph esi ogbo.

²⁸Kékiilaan bụphe kokiigh bọ ḍizu ạnyu phọ bịn kụ kótue bọ okiighom uwaloor phọ. Ikiilaan ghụn ni Ẹnaan phọ ketue bọ ekiigh ḍizu phọ rꞌuwaloor phọ sịphe ooni ạnian phọ.

²⁹Ịkiom ologhi ịdipho robool ghan bọ ịyal ạsimighor egbem ạkobo phọ. Kụ oniin ọnyo ạbidi kámeel ude, dị Ọde phọ anyina úmeeraam.

³⁰Ẹnaan ẹkar ri elegheri ọnhu ạsilaal dị edi rụmhu anyina.

³¹Esi ịphen phọ, kẹ́moogh mun oghiilaan. Nyina ẹman mạar epu ịbadi ạsimighor!”

³²“Oye lọ ughol ịmi aganana esi ogbo awe, mị kạtuugh ni ịdipho aḍighi aani nyọdi ghisigh Ọde phọ ạmi odi bọ kꞌạke phọ.

³³Tọrobo ọlo ụpharanaan ịmi esi ogbo awe, mị kạtuugh ni ịdipho aḍighi aani nyọdi ghisigh Ọde phọ ạmi odi bọ kꞌạke phọ.”

³⁴“Kégbiom ghan mọ mị ụpham ẹepho kụ arumom bọ sịen aḅirini phọ. Kị́dipho. Mị uru ghụn olher ẹgham.

³⁵Mị uru ọgbarion ạburude rꞌạnmuny, burunhiin rꞌạnmanyaan, nmạnyaan ilhom rꞌaburunhiin ilhom.

³⁶Kụ asiya oye phọ kụ kọlogh oye phọ ḍien.

³⁷“Oye lọ ạphomoghian ọde rꞌonhiin ọdi upuemiom ịmi, ọ́kpianaan oḍighi ọlo kꞌạmi, oye lọ ạphomoghian nmụny ọdi upuemiom ịmi, ọ́kpianaan oḍighi ọlo kꞌạmi.

³⁸Oye lọ útool osuom arusu phọ ọdi kụ ụdapham ịmi, ọ́kpianaan oḍighi ọlo kꞌạmi.

³⁹Oye lọ ạwa ọmoogh aghuḍum ọdi, kapiemi ni, kụ oye lọ aphiemi ghuḍum ọdi loor ẹmhu ạmi, kạmoogh ni.”

⁴⁰“Oye lọ ịlhoghoma inyina, mụlhoghoma aani ịmi, kụ oye lọ ụlhoghoma ịmi, mạlhoghoma aani nyọpo urom bọ ịmi.

⁴¹Oye lọ alegheri mọ ọphon oyil kꞌẸnaan kụ ạloghoma, ọdi kapin aani ni bin oyil; kụ oye lọ alegheri mọ ọphon ogey oye kụ ạloghoma, kapin aani ni bin ogey oye.

⁴²Kụ oye lọ alegheri mọ bụen rụdaph ghan ịmi kụ ạngo mụum oniin ọnyo ạbidi, Ẹnaan kẹ́bile dị oye phọ ọpo kẹ́kpiom iiḅi.”