Read abua Matiu 11 Bible Online

Matiu 11 - abua bible

Matiu 11

¹ẠJizos roroma ḍioph rꞌịyal ạbumatuan phọ ọdi rọmadan, bịn ạḍua sịphe ạghi rạmha dị etuman pạ ạtughemi ạḅile ạghaaph ọghaaph Ẹnaan ạḅeni we.

²Mem dị ạJon ạrol bọ otu ikoli phọ kụ ạnaghan ịlo iiḍighi phọ aKraist, ọdi arom ni bụmatuan phọ ọdi,

³mọ ọghi opuru mọ, “Nạ kụ ọdi ạJon ạḅem bọ ni mọ katu phọ ḍụghum, kụ ọḅile ni okori ọnon oye?”

⁴ẠJizos mọ, “Ikeel ẹghaaph ịphen nyina rẹnaghan bọ ẹḅile bọ rẹmiin, ẹḅeni Jọn.

⁵Awe ikpom ariḍien mọmiin aani eten, ạrukugha moḅerenu aani rotelhe yogh, awe ẹzegh ọku ufe moḍumogh aani, ạbuḅaaghaph ḅạaghaph rọnaghan aani ḍụghum, moḅerion bụphe momuughu bọ ọngo ghuḍum, mọghaaph ooḅi ọghaaph Ẹnaan ọḅeni aani rukulom.

⁶Iboh kꞌẸnaan kẹtolonaan ni oye lọ ịmi úghel!”

⁷Ạbumatuan phọ ạJon rokeel, kụ ạJizos amiigh ọghaaph ịlo ạJon ọḅeni aḍita awe phọ, mọ, “Mem mọ nyina ẹghi bọ ẹpe ẹdala phọ ọmiin ạJon, nyina ịkaraghi ghan egbiom mọ nyina kẹmiin eeghe ịyaar? Ikpu dị ookuugh radeghemi ḍụghum?

⁸Nyina ịkaraghi ghan egbiom mọ nyina kẹmiin eeghe ịyaar? Oye dị aanmenan iiloghoḍian loologhoḍian iinmenan ḍụghum? Bụo ịma ibura phọ odi ruutu ạbudaam-ẹmha kẹ́pe ẹdala phọ.

⁹Nyina ịkaraghi ghan egbiom mọ nyina kẹmiin eeghe ịyaar, oyil Ẹnaan ḍụghum? Ii, mị rịḅeni ghan inyina mọ ọphon nyina ẹmiin bọ apu oyil.

¹⁰Ọphon kụ ọdi ọge bọ ịlo ọdi mọ, ‘Pogh aani, mị ratom ni ọokpaany ạmi dị kaḍiemi ghan aselemi eten aseenaan nyịna.’

¹¹Mị ạkar rịḅeni ghan inyina mọ sịphe oomo phọ ạbuphe ạnmariir kụ ọmaraghi bọ, oye dị apu Jọn oburogh mụum mọ ólho; kụ ọlo aḍighi ọbam ẹpe ọmar phọ kꞌẸnaan kụ apu ni nyọdi.

¹²Kụ emiigh kꞌamem mọ ạJon oburogh mụum mọ aru bọ eru ẹteeny kꞌarodon, awe otuphiom ni ọmar phọ kꞌẸnaan ẹgham, kụ rọwa ghan oziton ạar.

¹³Oomo phọ ariil ịmiin phọ ḅịle rꞌiilogh phọ aMozis, eru ẹteeny kꞌamem mọ ạJon, ụghaaph ghan ịlo ọmar phọ kꞌẸnaan.

¹⁴Ịḅeeraan inyina omeeraam, pọ ạJon phọ kụ Ilaija phọ ni, ọpo ọghaaph bọ ni mọ katu phọ.

¹⁵Ọlo ạmoogh rụru ọnaghanam ạḍughum ạnaghan!

¹⁶“Mị kạsighe eeghe ọdo ịyaar kụ ạmaaniom we phọ ạnyiidipho? Kọmaaniom bịdi ịbam ạnmuny dị ọrologhu ude ḍighi. Buniin rọmagh ghan buniin kọḅeni mọ,

¹⁷‘Yoor ọmoor sụor apineen, nyina ịḅa phọ ị́ker. Yoor ọmoor sụor ẹkaraph ẹmugh, nyina ímoghi.’

¹⁸ẠJon aru bọ, ạtuan ni ịiḅereghi ạrol dọl ọkoony, ḅịle kẹn miim ọ́phughol ghan, kụ bịdi ụḅem ghan mọ, ‘Eru ekola ni nyọdi.’

¹⁹Ọony phọ Oye atu alhe rạpughol kụ bịdi rọḅem ghan mọ, ‘Ịmiin aani oye ekpooko, rꞌọoko amiim, ọyaghiri ạbubonyiom iisogh rꞌạbukaraph awe!’ Ịpe rọmiin bọ kụ keḍeenaan mọ olegheri ịyaar phọ Ẹnaan igey ni.”

²⁰Kụ ạJizos amiigh ọḅaam ạramha phọ ịpe ọdi aḍighi yogh bọ ịminighan ịiḍaany phọ, ịdi eḍighi bọ bịdi úmeera ukiton ụbile ịkaraph phọ ạbidi, mọ,

²¹“Pọ eeghe ịminimiin dị kịrolonaan inyina, weye aKorazin. Pọ eeghe ịminimiin dị kịrolonaan aani inyina, weye aBetsaida. Iboom ịiḍaany phọ ịphen mị aḍighi bọ ogbo phọ anyina kụ oḍighi ẹpe Taya rꞌaSaidon, ọbo awe phọ ạbuphe mokiton esi ịkaraph phọ ạbidi kꞌagediidi, omunughian rukpe-ọto.

²²Mị rịḅeni inyina mọ ḍio ịiruen phọ keephenaan ni inyina epu we aTaya rꞌaSaidon.

²³Kụ nyina ạbuo ạKapaniom, nyina rẹwa ghan ophoophe aloor phọ anyina osiemi kꞌạke ḍụghum? Ẹnaan kisooromi ni inyina esumeeny ooni ạnian. Iboom ịiḍaany phọ ịphen mị aḍighi bọ ogbo phọ anyina kụ oḍighi ẹpe Sọdom, ọbo ạSodom odi ni kꞌarodon.

²⁴Mị rịḅeni inyina mọ ḍio ịiruen phọ keephenaan ni inyina epu we phọ ạSodom.”

²⁵Mem mọ ọpo phọ, ạJizos ạḅem mọ, “Ọde ạmi dị ạmoogh kẹ rꞌade, mị rạseph ni nyịna, ịdipho nạ maḍeenaan bọ bụphe mạar úlegheri bọ rạraar phọ ịphen nạ ạaghinaan bọ we olegheri-ịyaar phọ.

²⁶Ii, Ọde, ịphen ẹḅeeraan bọ nyịna oḍighi phọ ịḍua ni ologhi ạna kụ emite.

²⁷“Oomo phọ ạraraar phọ ịphen Ọde phọ ạmi kụ ạḅogh ni ụngo ịmi, kụ oye dị alegheri Mọony phọ ólho, emuton Ọde phọ; ḅịle kẹn oye dị alegheri Ọde phọ ólho, emuton Mọony phọ rꞌoye lọ Ọony phọ kụ aḍeenaan.

²⁸“Oomo phọ anyina rekumuan bọ ịikpara arukumuan phọ kụ erool bọ dool dị ẹemor, itu mị kịngo inyina ophooghian.

²⁹Ịsighe ọfeguma phọ ạmi ẹgban rụpha anyina, eru mị ịtughemi inyina, emeera mị ụpamaghan ghuḍum mọ anyina. Mị oye ọopho ologhi rꞌosooromi aloor kụ nyina kẹmoogh ni ophooghian.

³⁰Ọfeguma phọ mị kịkaanaan bọ inyina ạnighe ni, kụ adool phọ mị kịngo bọ inyina ọgban phọ keephoogh ni.”