Read abua Matiu 12 Bible Online

Matiu 12 - abua bible

Matiu 12

¹Íbia bịn ạJizos atelhe raten ozo ịbiakpa ḍiniin aḍio ophooghian, kụ ọkoony rasiph bụmatuan phọ ọdi, kụ bịdi omiigh ọkuughi ịbiakpa phọ olhe.

²Kụ aFarisi phọ rọmiin bọ ịphen phọ, kụ ọḅeni Jịzos mọ, “Pogh aani ịphen ạbumatuan phọ ạna roḍighi bọ ḍio ophooghian phọ. Ugbini, ugbini.”

³Kụ ọdi mọ, “Nyina kạ̋al ghan ịpe aDevid aḍighi bọ, mem mọ ọkoony phọ asiph bọ nyọdi rꞌạbuphe ọdaph bọ nyọdi?

⁴Ịdi ọdi aḍigh otu Ẹnaan phọ, kụ bịdi olhe eḍien phọ oseere bọ sịphe ạdol iigbia phọ nyẹpe ị́kpe bọ lọ awe kolhe, emuton riil ạrikia phọ bịn.

⁵Ḅịle kẹn, nyina kạ̋al ghan sịphe iilogh phọ aMozis ịpe, tọrobo aḍio ophooghian, ariil ạrikia phọ sịphe Otu Ịiḅereghi phọ ọka bọ ologh aḍio ophooghian phọ, kụ ụ́ḅaam bọ bịdi?

⁶Kụ mị rịḅeni ghan inyina mọ ịyaar dị ẹman ịyaar epu Otu Ịiḅereghi phọ edi ni sịen.

⁷Ḍiodiidi Ẹnaan ịḅem ni mọ, ‘Ọphinyon ạrikia ịmi ụ́ḅeeraan. Ọnma ghan ighirigiir kụ ẹdi mị rạwa.’ Eḍighi ịyaar dị nyina ẹnaghan ni ẹmhu ịduon phọ, nyina mísophonaan apum ịḅam rụmhu awe dị mạar ụ́piom.

⁸Ọony phọ Oye kụ ạmooghom ni ḍio ophooghian phọ.”

⁹ẠJizos ạḍua sịphe ạghi aḍigh obughotu phọ ạbidi.

¹⁰Kụ oye ạrol li sịphe dị ạḍighaagh ẹḅoonian. Buniin awe ụrol aani ni pạ dị rọwa ghan osoorom ọdi erugh kụ opuru mọ, “Ẹkpe ni dị yira kookonom rookonoma ḍio ophooghian phọ ḍụghum?”

¹¹Kụ ọdi ạḅeni bịdi mọ, “Eru mạar dị oniin ọnyo anyina ạmoogh oyool-ọga kụ ameel asuma ooni ḍio ophooghian phọ, ọdi kaḍighi ika? Ọdi kạki ni ạpam apune.

¹²Kụ ạri oye kụ ạman mạar apu oyool-ọga. Esi ịduon phọ ologh phọ ameeraam ni mọ yira oḍighi ghan ni iiḅi oye ḍio ophooghian phọ.”

¹³Kụ ọdi ạḅeni oye phọ mọ asele ḍịghaagh phọ ọdi. Kụ oye phọ rosele ḍịghaagh phọ, bịn kụ emoon, ịdipho ạḍieri phọ.

¹⁴Pọ kụ amem dị aFarisi phọ ọghi oḍighan egir kụ oosophoghian ịlo oghiigh ạJizos.

¹⁵ẠJizos rọnaghan bọ, kụ ạḍua sịphe phọ kụ aḍita awe ọtuan nyọdi, kụ ọdi aakonom oomo phọ ạbuphe úmoonogh bọ,

¹⁶kụ ạphur bịdi rụru mọ kúgananami nyịno.

¹⁷Ịphen imite omuneniom ikpo ọnhu phọ Ẹnaan Azaya, oyil phọ ọdi, ạḅem bọ mọ,

¹⁸“Ọphon Ọony-otu phọ ạmi, ọpo mị ạsaḅar bọ ạphomoghian. Eḍighinom ịyaar phọ ọdi kụ ịḅeeraan ịmi iboom. Mị kạngo nyọdi uwaloor phọ ạmi, kụ ọdi agbeelom asiph rꞌakeel ạḅeni we areelhe kịrokiro phọ.

¹⁹Ọdi kạ́agbaghanaan, kạ́wa sighiton, ḅịle kẹn kạ́looghi ẹpe aroḅodo phọ.

²⁰Ikpu dị rebunaan ọdi kábun amuton. Nịan dị reḍim ọdi káḍime. Ọdi kaḍighi ni oḍighi phọ ọdi tụtu ọdi ạmiin mọ asiph rꞌakeel meekpereghiom ịkaraph.

²¹Kụ awe areelhe kịrokiro phọ kọmoogh ni oḍuom ologhi esi ọdi.”

²²Kụ awe ụsighe ni oye dị eru eghola, ekpom ọka ikpom ariḍien, oruomonaan Jịzos, kụ ọdi aakonom nyọdi, kụ oye phọ amiigh ọḅa rꞌọmiin eten.

²³Kụ iḍighi ni iikia esi oomo awe, kụ opuru ghan mọ, “Ọphon ọony phọ aDevid phọ ni ḍụghum?”

²⁴Kụ mem dị aFarisi phọ ọnaghan bọ, kụ ọphagharanaan mọ, “Ọdi ạsighe ịikpo aBielzebul, ọkpana aruru phọ, kụ raporoghom ghan bọ ruru phọ.”

²⁵ẠJizos malhegheri ni ịitughian phọ ạbidi, kụ ạḅeni bịdi mọ, “Ọmar lọ ạaya kape ni; kụ ẹmha rꞌeghunotu lọ ạaya kẹ́meera.

²⁶Eḍighi ịyaar dị aSetan ạwaanaan sighiton loor phọ ọdi, pọ ịikpo phọ ọdi mạaya kụ ọmar phọ ọdi kạ́meera.

²⁷Ịduon nyina rẹḅem ghan bọ mọ ạmi ụsighe ịikpo aBielzebul kụ raporoghom bọ ruru phọ, mụdi ịikpo phọ ạbumatuan phọ anyina ọsighe ghan bọ roporoghom ghan ruru phọ ịḍua ẹghen kụ emite? Ạbumatuan phọ anyina kụ ugananami bọ ọkpe phọ anyina.

²⁸Uwaloor Ẹnaan kụ ụngo bọ ịmi ịikpo ophoroghom aruru phọ. Ịduon phọ reḍeenaan ghan mọ ọmar phọ kꞌẸnaan maru ni sịen ogbo phọ anyina, kụ nyina ílegheri.

²⁹“Oye ólho dị katue ạka otu oye dị rạkpar ghan ịikpo abum rạraar ạḍuanam, emuton dị ọdi mạphur ạphaḍi oye phọ, pụruku ọdi katue abum rạraar otu phọ.

³⁰“Oye lọ ịmi úḍighan, pọ rueenom ịmi elephiri, kụ oye lọ ịmi úḍighan ookpomoghi awe phọ, pọ rạwalalami ghan bịdi.

³¹Esi ịduon phọ mị rịḅeni ghan inyina mọ oomo ịkaraph rꞌọopu kọsar ri ọbilenaan we, kụ ọopu Uwaloor Iigbia phọ kọ́sar ọbilenaan.

³²Oye lọ ạghaaph ịkaraph ịlo Ọony phọ Oye kọsar ri ọbilenaan nyọdi, kụ oye lọ ạghaaph ịkaraph ịlo Uwaloor Iigbia phọ kọ́sar ọbilenaan sịen aḅirini phọ ọphon rꞌọpo katu bọ.”

³³“Nyina ẹḅem mọ oreeny phọ ọphon ạnighe ni, pọ iimuma phọ ọdi ẹnighe aani ni. Nyina ẹḅem mọ ọphon ọḅoria oreeny, pọ iimuma phọ ọdi ịḅoria aani ni. Esi iimuma phọ kụ ẹdi nyina kelegheri ọdo phọ oreeny phọ.

³⁴Sey, nyina ọmar ạsiḅom, ika nụun kụ ẹdi nyina ạbukaraph awe phọ kẹkaaph igey ạraraar? Ịpe edi bọ ologhi phọ oye kụ ẹdi ọdi rạkaaph ghan kamitiom.

³⁵Ogey oye rạkaaph ghan igey ạraraar phọ dị aakpomoghi bọ sịphe ologhi phọ ọdi kụ kamitiom; kụ ọkaraph oye rạkaaph ghan ịkaraph ạraraar phọ dị aakpomoghi bọ sịphe ologhi phọ ọdi kụ kamitiom.

³⁶“Kụ mị rịḅeni ghan inyina mọ ḍio ịiruen phọ kọmagh ni tọrobo oye osophonaan oomo eepua ikpo ọnhu lọ ọdi ạḅa ọngo.

³⁷Kọsighe ni ikpo ọnhu phọ ạna kụ osophom ịiruen asiph rꞌakeel ọngo nyịna.”

³⁸Ịphen reten, kụ buniin ạbutughemia iilogh phọ rꞌaFarisi phọ ọghaaph omitiom mọ, “Ọtughemia, yoor rọwa mọ nạ ḍighi eḍeenaan yoor ọmiin aani.”

³⁹Kụ ọdi mọ, “Uḍighi ika kụ awe ạnyiidipho eeph bọ ịduon rꞌelegheri Ẹnaan? Bịdi rọwa ghan ịiḍaany kụ ịiḍaany dị kọngo bịdi ílho, emuton ịiḍaany phọ ẹpe aJona oyil phọ Ẹnaan.

⁴⁰Ịdipho aJona ạrol bọ ọkuruḅaka egbogh ena phọ ịraar aḍughul rꞌịraar ootaany kụ ẹdi Ọony phọ Oye kạtuugh ạtol aani sịphe ologhi ade phọ ịraar aḍughul rꞌịraar ootaany.

⁴¹Ḍio ịiruen phọ, aweye aNineve koḅetenu ni kụ ọgba opume oghiil phọ ọphon, ịdi eḍighi bọ bịdi ụnaghanan ni ọghaaph phọ aJona, kụ okiton esi ịkaraph phọ ạbidi. Ịyaar dị ẹman mạar epu Jona edi ni sịen.

⁴²Ḍio ịiruen phọ, ukueni-ạnir phọ ọpo ạda bọ Siba kaḅetenu ni kụ ạgba iphume inyina, ịdi eḍighi bọ ọdi ạḍua ẹnon eelhe kụ aru ọnaghan ọghaaph olegheri ịyaar phọ ạSolomon, kụ ịnaghan, ịyaar dị ẹman mạar epu Sọlomon edi ni sịen.”

⁴³“Mem lọ ọkaraph uwaloor amite loor oye ạḍua, ọdi ratelhe yogh ghan rikpisi lọ ạmuum úlho ọwa amarugh. Kụ eru mạar dị ụ́miin,

⁴⁴kụ ạḅem mọ, ‘Mị kaḅula pạ otu phọ ạmi mị ạḍua bọ kụ amite.’ Kụ ọdi atu ạmiin oopho esi phọ bịn dị oḅeer oselemi.

⁴⁵Kụ ọdi ạki ạsighe oḍual ịnon ịkaraph aruwaloor dị eeph epu nyọdi, kụ etu etugh sịphe phọ, kụ ạdol oye phọ ọpo kebeeph epu ḍịḅel phọ. Ịduon kẹn kụ ẹdi kẹtolonaan ni ọkaraph oghiil phọ ọphon.”

⁴⁶ẠJizos odi rạkaaph kạḅeni we phọ, kụ onhiin ọdi rꞌabumor ọdi oru ọmeregha ẹpe erugh ịlo bịdi kọkaaphan rꞌọdi.

⁴⁷Kụ oniin oye ạḅeni nyọdi mọ, “Pogh, onhiin ạna rꞌabumor ạna ọmeregha ẹpe erugh, lọ nyina kẹghaaph ọghaaph.”

⁴⁸Kụ ạJizos ạphagharanaan mọ, “Ạnhian kụ onhiin ạmina, ḅịle bụanhian kụ abumor ạmina?”

⁴⁹Kụ ọdi ạma bụmatuan phọ ọdi kụ ạḅem mọ, “Bụen phọ kụ onhiin ạmi rꞌabumor ạmi.

⁵⁰Tọrobo ọlo raḍighi ghan ịpe Ọde phọ ạmi odi bọ kꞌạke phọ rạwa bọ kụ umor ạmi rꞌumarani ạmi rꞌonhiin ạmi.”