Read abua Matiu 13 Bible Online

Matiu 13 - abua bible

Matiu 13

¹Ḍio phọ ạḍiphe ạJizos ạḍua pạ otu phọ amite, kụ ạghi ạrol ẹpe oogbom ọphiiny phọ.

²Kụ aḍita dị ookpomoghan esi ọdi ụphughan ni dị tụtu eḍighi dị ọdi aḍigh ologhi oghuugh kụ ạrol ude, kụ aḍita awe phọ ọmeregha ẹpe oogbom ọphiiny phọ.

³Kụ ọdi ạsighe sidogh kụ ạtughemiom bịdi ịminighan ạraraar, kụ ạḅem mọ: “Ịnaghan! Oḅephom iizo ạghi ooduḍi ịizupha.

⁴Kụ sịphe dị raaduḍi bọ, iniin emeleghu ọḅuzo, bịn ịnun eru eekpophi ẹminogh.

⁵Iniin imeleghu de asighiigh dị ịisaar ị́bugh, kụ íbia bịn ẹraarogh, loor esi dị ọninom ụ́tol.

⁶Kụ ogogo rolhom, kụ ạsel ịizupha phọ, kụ loor esi dị sịni ị́moogh bọ bịn ẹnuughi.

⁷Iniin imeleghu ogbo iitoor, kụ iitoor phọ esiighi egimi kụ ịizupha phọ eghurughan yogh, bịn iimuma ímuum.

⁸Kụ ịpheri phọ imeleghu ḍiiḅi ade kụ emuumogh iimuma, iniin oniin okuron, iniin odiinydi, iniin ịraardi.”

⁹Kụ ạJizos ạḅile ạlho ạḅaram mọ, “Ọlo ạmoogh rụru ọnaghanam ạḍughum ạnaghan!”

¹⁰Kụ ạbumatuan phọ oru opuru nyọdi mọ, “Nạ ụtuan ika kụ ạsighe bọ sidogh kụ ạghaaphom ạḅeni bịdi?”

¹¹Ọdi mọ, “Mịngo ni inyina olegheri ạraraar ịbooghian ọmar phọ kꞌẸnaan, kụ ụ́ngaani bụeri phọ.

¹²Nyọpo ạmoogh bọ, Ẹnaan kẹngo ni ẹbughe; kụ ọpo ụ́moogh bọ ghạlamo ịyal-ikpo ịlo ạmoogh aani, Ẹnaan kẹbonyi ni.

¹³Mị ụsighe sidogh kụ ạghaaphom bọ ạḅeni bịdi ịdi eḍighi bọ bịdi ophogh rọ́miin ghan, ọḅile ozuumaam rólegheri ghan ẹmhu phọ.

¹⁴Esi ạbidi kụ ẹdi ịmiin Azaya oyil phọ Ẹnaan emunughan bọ mọ, “‘Ophogh nyina kepogh ni kụ nyina kẹ́miin; ọnaghan nyina kẹnaghan ni kụ nyina kẹ́kpaph ẹpam,

¹⁵ịdi eḍighi bọ abula kụ maḅogh iloghi awe phọ ạbuen ọbo bịdi kolegheri ghan bọ ịyaar kụ areḅeri phọ ạbidi meḍuughian, ọbo bịdi kọnaghan ghan bọ, kụ ariḍien ạbidi mokpereghian yogh ọbo bịdi kọmiin ghan bọ eten, ọḅile okiton usoman ịmi mị aakonom bịdi.’

¹⁶“Ịmoogh iboh ịdi eḍighi bọ nyina rẹmiin ni eten, ẹḅile rẹnaghan ḍụghum.

¹⁷Mị ạkar rịḅeni ghan inyina mọ ịbadi ariil phọ Ẹnaan rꞌabugey awe ụwa ni ọmiin ạraraar phọ ịphen nyina rẹmiin bọ kụ ụ́miin, ụwa kẹn ni ọnaghan ạraraar phọ ịphen nyina rẹnaghan bọ, kụ ụ́naghan.”

¹⁸“Iler rụru ẹnaghan ẹmhu aḍidogh oḅephom iizo phọ.

¹⁹Ọpo ạnaghan bọ ọghaaph ọmar phọ kꞌẸnaan kụ úlegheri bọ ẹmhu phọ ạkigh ịizupha phọ emeleghu bọ pạ ọḅuzo phọ. Eru etu ghan reziton ọghaaph phọ ọzuph bọ sịphe ologhi phọ ạbidi kẹḍuanam.

²⁰Ọpo ạghigh bọ ịizupha ịpa ade asighiigh phọ, pọ ọdi ạnaghanan ọghaaph phọ rꞌọḅaal ologhi,

²¹kụ ọ́moogh sịni pạ ologhi phọ ọdi, kụ ameeraam mọony amem bịn. Mem lọ ịminimiin, mụghumo ịgbiphoghom, ẹtuan ọghaaph phọ eru, bịn ọdi ạkaaru.

²²Ọpo ạghigh bọ ịizupha ịpa ogbo iitoor phọ, pọ ọdi ạnaghan ọghaaph phọ, kụ ogbiriḅa ịlo aḅirini phọ, rꞌạḍidugh ẹelha eḍighi dị ọghaaph phọ aghurughan bịn iimuma úmuum.

²³Ọphori phọ ạghigh bọ ịizupha ịpa aḍiiḅi ade phọ, pọ ọdi ạnaghan ọghaaph phọ, kụ ạsighe ạmagh ịyaar kụ amuum iimuma, iniin oniin okuron, iniin odiinydi, iniin ịraardi.”

²⁴Kụ ạJizos adogh ḍịnon aḍidogh ạḅeni bịdi mọ, “Kọmaaniom ọmar phọ kꞌẸnaan ịdipho ọghaaph oye dị ạzuph ịizupha ozo ọdi.

²⁵Kụ mem aḍughul dị oomo awe rọnaani yogh, ẹpomoghian ọdi aru ạzuph ịbiakpa ạkeledeeny ạḅophoghiom igey ịbiakpa phọ, kụ aten ạḍua.

²⁶Kụ mem dị ịizupha phọ mephoph kụ repoola yogh, bịn ọḅile ọmiin ịbiakpa ạkeledeeny edimom ni.

²⁷Kụ ạrebene oye phọ oru kụ opuru nyọdi mọ, ‘Oye phọ, tọ igey ịbiakpa kụ ẹdi nạ ạzuph bọ ni. Ịḅile eḍighi ika kụ ịbiakpa ạkeledeeny eḍighom bọ?’

²⁸Ọdi mọ, ‘Ẹpomoghian kụ aḍighi ịduon.’ Ạrebene phọ opuru nyọdi mọ, ‘Nạ rạwa ni mọ yoor ọghi oruph ịbiakpa ạkeledeeny phọ ḍụghum?’

²⁹Kụ ọdi ạḅem mọ, ‘Eeye, ịdipho nyina kẹki bọ oruph ịbiakpa ạkeledeeny phọ, iini nyina kẹḅaram iniin igey ịbiakpa phọ etuphom.

³⁰Ịbile ịyal phọ ịdi ẹḅophoghan ephoph ẹteeny mem ibugha phọ, kụ mị ạḅeni bụo ibugha phọ mọ ipụr eruph ịbiakpa ạkeledeeny phọ eekpomoghi ẹghoroghi rọkol esumughi ologhi ạnian, kụ egbi ọku igey ịbiakpa phọ ookpomoghi okpol ịsiphe ekpolom mọ.’”

³¹ẠJizos ạḅile adoghonaan bịdi ḍịnon aḍidogh mọ, “Kọsighe ekpo ạmustad kụ ọmaaniom ọmar phọ kꞌẸnaan. Mem lọ oye ạsighe ạzuph de ọdi, ekom epu ịpheri phọ ịizupha phọ.

³²Kụ resi rephoph, bịn mẹbugh epu oomo phọ ịbam ireeny phọ, kụ ịnun phọ ẹki ẹloghoḍi ruutu pạ ịla phọ ọdi.”

³³ẠJizos ạḅile adoghonaan bịdi ḍịnon aḍidogh mọ, “Kọsighe ọmar phọ kꞌẸnaan ọmaaniom yist dị ạnir ạsighe aḅunyonom inyadi aruuku aflaur kụ aseere, tụtu oomo phọ ạbred phọ aru.”

³⁴ẠJizos ạsighe sidogh kụ ạghaaphom ạḅeni ḍita awe phọ. Ọdi ọ́ghaaph ghan ịyaar ọḅeni bịdi, dị ḍidogh ụ́ḅaram.

³⁵Ịphen imite ịlo omuneniom ịpe oyil phọ Ẹnaan ạghaaph bọ mọ, “Mị kạsighe sidogh kụ ạkaaphom, ạḅeni bịdi rạraar dị ạaghian kꞌẹḅel egbiom aḅirini phọ.”

³⁶ẠJizos ạwile ḍita awe phọ ạghi aḍigh ologhi otu, kụ ạbumatuan phọ ọdi ọghi ọḅeni nyọdi mọ, “Gbạ ẹmhu aḍidogh ịbiakpa ạkeledeeny phọ esiighi bọ ozo phọ ụḅeni iyoor.”

³⁷Ọdi mọ, “Ọony phọ Oye kụ ạzuph bọ igey ịizupha phọ.

³⁸Ozo phọ, pọ aḅirini phọ; igey ịbiakpa phọ, pọ awe phọ oru bọ bụphe kꞌọmar phọ; kụ ịbiakpa ạkeledeeny phọ, pọ awe aruru.

³⁹Ẹpomoghian phọ ọpo ạzuph bọ ịbiakpa ạkeledeeny phọ, pọ Eru phọ; ibugha phọ, pọ eekuna aḅirini phọ; bụo ibugha phọ, pọ ạruukpaany phọ Ẹnaan.

⁴⁰Ịdipho ookpomoghi bọ ịbiakpa ạkeledeeny phọ kụ oguom bọ nịan phọ, kụ ịdi kẹtol mem eekuna aḅirini phọ.

⁴¹Ọony phọ Oye katom ni rụukpaany phọ ọdi, kụ bịdi ọki ẹpe ọmar phọ ookpomoghi oomo ạbulo ọkom ịkaraph rꞌabuḍighinom ịkaraph ọsighe

⁴²osumughi ologhi egu ạnian phọ kụ bịdi ọtol sịphe omoghi yogh ọkirigha.

⁴³Pọ kụ amem dị abugey awe phọ kọmu ịdipho erumuḍio, pạ ọmar Ọde phọ ạbidi. Ọlo ạmoogh rụru ọnaghanam ạḍughum, ọdi ạnaghan!”

⁴⁴“Ḅịle kẹn, kọsighe ni ọmar phọ kꞌẸnaan ọmaaniom ịdipho ẹelha dị oḍi ude. Kụ oye ạghi ạmiin kụ ạḅile ạaghi, kụ agheel rꞌọḅaal ologhi kụ aalhaghi oomo ạraraar dị ọdi ạmoogh, kụ ạghi aghoom de phọ ạḍiphe phọ.”

⁴⁵“Ḅịle kẹn, kọsighe ni ọmar phọ kꞌẸnaan ọmaaniom ịdipho ọghaaph oye dị ạghi ḍighi ọwa ikpo ẹbe ogho.

⁴⁶Kụ ạmiin eniin egbogh ekpo ẹbe, kụ agheel kụ aalhaghi oomo ạraraar dị ọdi ạmoogh kụ ạghi aghoom.”

⁴⁷“Ḅịle kẹn, kọsighe ni ọmar phọ kꞌẸnaan ọmaaniom ạkoni ọzuguru dị ozu ọphiiny, kụ ozuom ọdo kịrokiro ina.

⁴⁸Kụ rokpo ọzuguru phọ rọsaany oghuugh ạnyu kụ ọtol ude, kụ ọotoghion igey ina phọ ọloghoḍi rugunum, kụ ọsighe ịḅoria phọ otoḅologhi.

⁴⁹Ịduon kụ ịdi kẹtol mem eekuna aḅirini phọ: ạruukpaany phọ Ẹnaan kotu ni kụ ọson bụkaraph awe phọ sịphe ogbo abugey phọ,

⁵⁰kụ ọsighe osumughi ologhi egu ạnian phọ kụ bịdi ọtol sịphe omoghi yogh ọkirigha.”

⁵¹Kụ ạJizos apuru bịdi mọ, “Nyina ẹkpaph ni oomo ịphen phọ ẹpam?” Bịdi omeera mọ ii.

⁵²Kụ ọdi mọ, “Ịduon phọ, pọ tọrobo ọtughemia iilogh dị aḍighi ọlo ọmar phọ kꞌẸnaan pọ kọmaaniom nyọdi uwotu dị ạaḅeghion igbaany rꞌimoom ạraraar phọ dị aseerian bọ, kụ ạtuugh ịpe ẹnighe bọ kụ ạsighe agananami.”

⁵³Kụ ạJizos rodoghogh sidogh phọ ịphen rọman, kụ ạḍua

⁵⁴arigheel ẹmha ọdi, kụ aḍigh obughotu phọ ạtughemi we. Kụ ạbuphe ọnaghan bọ usinighian ni kụ ọḅem mọ, “Oye phọ ọphon ạghi ẹghen kụ alegheri bọ ịphen phọ, ạḅile bọ aḍighi ịiḍaany phọ ịphen?

⁵⁵Ọphon phọ ḍịen kọ́ony ọkaam ạmaka phọ? AMeri ḍịen kụ kónhiin phọ ọdi? AJems rꞌạJosef, rꞌaSaimon rꞌaJudas ḍịen kábumor phọ ọdi?

⁵⁶Bụen rꞌayira odi bọ sịen ḍịen kábumarani phọ ọdi? Oye phọ ọphon ạghi ẹghen kụ alegheri bọ oomo phọ ịphen phọ?”

⁵⁷Kụ bịdi ughel li Jịzos. Kụ ọdi ạḅeni bịdi mọ, “Oyil ólho ghan dị eghuan ụ́moogh, omuton ẹmha phọ ọdi rꞌọto ọdi.”

⁵⁸Kụ ẹpe phọ, ọdi óḍighi ịbadi ịiḍaany loor ẹmoogh omeeraam mọ ạbidi.