Read abua Matiu 16 Bible Online

Matiu 16 - abua bible

Matiu 16

¹Buniin aFarisi rꞌaSadusi uru ni ọteeny Jịzos ịlo ọdegh ọdi ophogh kụ ọḅeni mọ, “Ḍighi ịiḍaany kꞌạke uḍeenaan iyoor.”

²ẠJizos ạḅeni bịdi mọ, “Nyina elegheri mọ sịen eelhe phọ ayira dulhe lọ erumuḍio remeel ighool kụ okuaḍio phọ ạtoghom, pọ rẹḅaal ọmu kạmu ni.

³Ḍịroor lọ erumuḍio remite kụ aḍio phọ eghire ẹtoghom pọ ọlophia kạnuun ni ạloph. Nyina etue ghan ni repogh okuaḍio phọ bịn kelegheri ịlo aḍio phọ kẹtol, kụ nyina kétue epogh ịiḍaany ariiḍio phọ ịphen bịn elegheri ịlo kemite.

⁴Ọkaraph oghiil phọ ọphon Ẹnaan úlegheri bọ ropuru aani ghan ịiḍaany, kụ ịiḍaany dị kọngo bịdi ílho, emuton ịiḍaany phọ ẹpe aJona oyil phọ Ẹnaan.” Kụ ọdi ạwile bịdi ạḍua.

⁵Mem dị ạbumatuan phọ osi bọ ḍịeri phọ ạḍighaagh ọphiiny phọ, bịdi ologhoma ni mọ bụno eḍien ụ́pam.

⁶Kụ ạJizos ạḅeni bịdi mọ, “Igona loor anyina esi ayist aFarisi phọ rꞌọpo aSadusi phọ.”

⁷Kụ bịdi omiigh ọghaaphan sịphe ogbo phọ ạbidi mọ, “Ọdi ạḅem ịduon, ịdi eḍighi bọ yira eḍien ụ́pam.”

⁸Mem dị ạJizos alegheri bọ, ọdi apuru ni bịdi mọ, “Iḍighi ika nụun kụ nyina ẹḅile bọ rẹkaaph ghan ịdi nyina ạbred ị́moogh? Nyina awe dị omeeraam ụ́manam.

⁹Nyina ke̋lhegheri kꞌạnyiidipho. Nyina mewula mem mọ mị ạparion bọ oogh iiḅoghoḍi ạbred phọ ạngo oogh ọonir awe phọ, ipoḍi phọ nyina ẹson bọ emuza bọ ika ạrigiel?

¹⁰Ḅịle kẹn, mem mọ mị ạparion bọ oḍual iiḅoghoḍi ạbred phọ ạngo inya ọonir awe phọ, ipoḍi phọ nyina ẹson bọ emuza bọ ika arugunum?

¹¹Iḍighi ika nụun kụ nyina ị́naghan bọ mọ mị ụ́kaaph ịlo eḍien kụ ịḅeni bọ inyina? Mị rịḅeni ghan inyina mọ igona loor anyina esi ayist aFarisi phọ rꞌọpo aSadusi phọ!”

¹²Pọ kụ amem dị bịdi ọnaghan mọ ọdi ọ́ghaaph ịlo eḍien kụ ạḅeni bọ bụno, pọ ịlo ịtughemi aFarisi rꞌaSadusi phọ kụ ẹdi ọdi ạghaaph bọ.

¹³ẠJizos aru bọ asi eelhe phọ etuman bọ ẹmha aSizaria Filipai, apuru ni bụmatuan phọ ọdi mọ, “Awe rọḅem ghan mọ Ọony phọ Oye ạnhian?”

¹⁴Kụ bịdi mọ, “Buniin rọḅem ghan mọ ạna ạJon oburogh mụum mọ, buniin mọ Ilaija, buniin mọ aJerimaya, mụghumo oniin oyil phọ Ẹnaan.”

¹⁵Kụ ọdi apuru bịdi mọ, “Nyina rẹḅem aani ghan mọ ạmi ạnhian?”

¹⁶Kụ aSaimon Pita mọ, “Nạ kụ aMesaya phọ, Ọony Ẹnaan phọ edi ghan bọ kꞌagee-pọ.”

¹⁷Kụ ạJizos ạḅeni nyọdi mọ, “Iboh kꞌẸnaan edianaan ni nyịna Saimon ọony aJona, ịdi eḍighi bọ awe kụ nyịna ịphen úḍeenaan, omuton Ọde phọ ạmi odi bọ kꞌạke phọ.

¹⁸Mị ạḅile kẹn rạḅeni nyịna mọ nạ kụ aPita, ẹmhu ịduon phọ pọ aḍighiigh. Omeeraam mọ ạna kụ kaḍighi ḍighiigh dị mị kạmeremiom bụo ạsiosi phọ ạmi. Ghạlamo rꞌaḍuugh bịn kétue ẹka bịdi.

¹⁹Mị kạngo nyịna ịsabi ọmar phọ kꞌẸnaan, kụ tọrobo ịyaar lọ nạ kamutonaan sịen aḅirini phọ, momutonaan ni ẹpe kꞌạke; kụ tọrobo ịyaar lọ nạ ạloghoma sịen aḅirini phọ, mọlhoghoma ni ẹpe kꞌạke.”

²⁰Kụ ọdi ạphur bụmatuan phọ rụru, mọ kụ́ḅeni oye mọ ọno kụ aMesaya phọ ni.

²¹Emiigh kꞌamem mọ ọpo phọ, ạJizos amiigh ni oḍeenaan ạbumatuan phọ ọdi, mọ ọno kạki Jeruselem kụ ạmiinom iboom ịminimiin. Mọ ikumoor awe phọ rꞌạbuo ạrumhu ariil ạrikia phọ rꞌạbutughemia iilogh phọ kokiigh ni nyịno, kụ ḍughul otu dị kemuneniom ịraar kụ ọno aḅetenu esi aḍuugh phọ.

²²Kụ aPita ạsighe nyọdi atenom ọgbal kụ ạḅaam kụ ạḅem mọ, “Ọmoogh-we. Ẹnaan kímeera! Ịphen phọ nyịna kímitenaan!”

²³ẠJizos akiton aphogh kụ ạḅeni Pita mọ, “Setan, ḍụa sịen ghisigh ạmi. Nạ atu ogbororian aghisigh ạmi, loor esi dị ịitughian phọ ạna, ịitughian awe, kị́itughian Ẹnaan.”

²⁴Kụ ạJizos ạḅeni bụmatuan phọ ọdi mọ, “Oye lọ rạwa ọdaph ạmi asooromi loor ameeraam ḍuugh kụ aḅeton osuom arusu phọ ọdi arool kụ ụdapham ịmi!

²⁵Oye lọ ạmaghami ghuḍum mọ ọdi ịyaar kapiemi ni; kụ oye lọ ghuḍum mọ ọdi ụ́maghami ịyaar loor ẹmhu ạmi kạmoogh ni.

²⁶Eeghe ạsuo kụ ẹdi oye kạsighe, dị ạmoogh ẹelha aḅirini phọ kụ aphiemi ghuḍum mọ Ẹnaan ẹngo bọ nyọdi? Kạsighe bọ eeghe kụ aanmeneniom kẹn ghuḍum mọ Ẹnaan ẹngo bọ nyọdi?

²⁷Ọony phọ Oye kạpam ni rụukpaany phọ ọdi kụ atu rꞌigbogh Ọde phọ ọdi, kụ ạkpe tọrobo oye ịdipho oḍighi phọ ọdi ạman bọ.

²⁸Mị ạkar rịḅeni ghan inyina mọ buniin ạbuen ọmeregha bọ sịen kọmiin ni dị Ọony phọ Oye ratu ọda ọmar phọ ọdi, kụ ogbi omugh.”