Read abua Matiu 18 Bible Online

Matiu 18 - abua bible

Matiu 18

¹Egina phọ amem mọ, ạbumatuan phọ uru ni ọteeny Jịzos kụ opuru mọ, “Ạnhian kụ aḍighi ọkaraghi ogbogh ẹpe ọmar phọ kꞌẸnaan?”

²Kụ ạJizos ạmagh ọbumoony ạmeremi sịphe ogbo phọ ạbidi,

³kụ ạḅem mọ, “Mị ạkar rịḅeni ghan inyina mọ nyina kéḍigh ọmar phọ kꞌẸnaan, emuton dị nyina ekiton esi ịkaraph phọ anyina kụ ẹḅile esooromi loor ịdipho ịbam ạnmuny.

⁴Oye lọ asooromi loor ọdi ịduon ọbumoony phọ ọphon kụ ọkaraghi ogbogh ẹpe ọmar phọ kꞌẸnaan.

⁵Kụ oye lọ ạloghoma ọdo ọbumoony phọ ọphon loor ẹmhu phọ ạmi, pọ mụlhoghoma aani ni ịmi.”

⁶“Ịlo ịbam ạnmuny phọ ạbuen umeeraam bọ ịmi oye lọ aakeleghi oniin ọnyo ạbuen phọ mọ akiton ạḍua esi ạmi, mịkpianaan ghụn nyọdi dị mụsighe ịluma kụ ọghoroghiom orum ọdi osumeeny ḍigher ọphiiny oḍinyighi oghiigh.

⁷Ịminimiin kẹtolonaan ni aḅirini phọ ịdi eḍighi bọ ạraraar emuza ni dị reḍighi ghan dị awe rọpioman ghan, kụ ạraraar phọ ịpe kẹ́bile ghan omiteghu, kụ pọ eeghe ọdo ịminimiin dị kẹtolonaan oye phọ ọpo ịphen phọ kẹtuan bọ esoor.

⁸“Mọ ạḍighaagh ạna, mọ owol ạna, kụ rẹphue nyịna, pọ soph amutonaan bịdi loor ạna aroph, kẹnighe epu ọpham aḍiniin ạḍighaagh rꞌoniin owol kụ oḍighom esi aghuḍum, kpạripe rꞌomunughan ạraghaagh rꞌaruwol kụ osumeeny nyịna esi ooni ạnian.

⁹Kụ mọ ekpeḍien ạna kụ rẹphue nyịna, pọ pọghoronaan aroph; kẹnighe epu ọpham eniin ekpeḍien kụ oḍighom esi aghuḍum, kpạripe rꞌomunughan ariḍien kụ osumeeny nyịna ooni ạnian.”

¹⁰“Igona loor ị́ḅitonaan ghan rꞌoniin ẹphurukpu ọnyo ạbuen phọ. Mị rịḅeni ghan inyina mọ ạruukpaany phọ Ẹnaan ẹngo bọ bịdi odi ghan ni ghisigh Ọde phọ ạmi ẹpe kꞌạke oomo amem. [

¹¹Ịdi eḍighi bọ Ọony phọ Oye aru ọphel ạbuphe ophe bọ.]

¹²“Eru mạar dị oye ạmoogh oniin okuron iyool-ịga kụ oniin aphe, nyina regbi mọ ọdi kaḍighi ika? Ọdi kạbile esughadi rꞌesugha phọ ẹpe aroogbolom mọ, ạki ạwa nyọpo aphe bọ.

¹³Ọdi ạmiin, mị ạkar rịḅeni ghan inyina mọ ọdi kabo ni iboh ọga phọ ọpo apuemi 99 phọ ẹpe ípe aani bọ.

¹⁴Ịduon kẹn kụ ịdi ị́ḅeeraan Ọde phọ anyina odi bọ kꞌạke phọ lọ oniin ẹphurukpu ọnyo ạbuen phọ kaphe.”

¹⁵“Mọ ọnyo asiya ạna aḍighi nyịna ịkaraph, kịa ạḅeni nyọdi ọpioman phọ ọdi, esi dị ịyal anyina bịn edi. Kụ ọdi ạnaghanan nyịna, pọ nạ makiton ọnyo asiya phọ ạna.

¹⁶Mọ nyịna ọ́naghanan, pọ mạgh oniin mụghumo ịyal awe ọdaph nyịna, ịdi eḍighi bọ ọge ni pạ ạḍinya iigbia phọ mọ, ‘Mụghumo ọnon oye rꞌạna kụ ịmoogh sighiton, pọ ịyal awe mụghumo ịraar awe ọrol aani ni pạ ọnaghan aani!’

¹⁷Kụ mọ ọdi inyina ị́naghanan, pọ kạaph ạḅeni bụo ạsiosi phọ. Kụ mọ ọdi bụo ạsiosi phọ ọ́naghanan, pọ kạ́loghoma mun nyọdi. Sịghenom nyọdi ịdipho ooruen rꞌọbonyiom iisogh.”

¹⁸“Mị ạkar rịḅeni ghan inyina mọ ẹlo nyina emutonaan sịen aḅirini phọ, pọ momutonaan ni ẹpe kꞌạke; kụ ẹlo nyina ẹloghoma sịen ade phọ, pọ mọlhoghoma ni ẹpe kꞌạke.

¹⁹“Mị ạḅile kẹn rịḅeni ghan inyina mọ mem lọ ịyal anyina ẹḅoph ọnhu sịen aḅirini phọ kụ ẹlom ịyaar Ọde phọ ạmi odi bọ kꞌạke phọ pọ ọdi kịngo ni inyina.

²⁰Mọ ịyal mọ ịraar kụ oghol ḍien phọ ạmi kụ ookpomoghan, pọ mị odi aani ni pạ ogbo phọ ạbidi.”

²¹Kụ aPita ạghi kụ apuru Jịzos mọ, “Ọmoogh-we, ika amem kụ ẹdi mị kạsar ghan ạbilenaan umor ạmi dị ruḍighi yogh ghan ịmi ịkaraph? Oḍual amem ḍụghum?”

²²ẠJizos mọ, “Kóḍual amem bịn. Oḍualdi amem oḍual.

²³Esi ịduon phọ, mị kạsighe ọmar phọ kꞌẸnaan ạmaaniom ọghaaph oniin ọdaam ẹmha dị eḍigh ologhi ọdi ogunogh abutelhedom ọdi ịimugh.

²⁴Ọdi romiigh ogbiighi phọ, kụ ọsighe oniin otelhedom dị ale ọmugh ọdi sịmuunir anaira oruomonaan nyọdi.

²⁵Ịdipho ọdi útue bọ ụkpe ọmugh phọ kụ ọde-otu phọ ạḅem mọ ọḅar nyọdi rꞌạnir phọ rꞌạnmuny phọ, rꞌoomo ịlo ọdi ạmoogh aal, ịlo ọkpiom.

²⁶Otelhedom mọ akpuḍian ạaḅereghian nyọdi mọ, ‘Oye phọ, mọogh ọkparam mị kạkpe ni nyịna ạmadan!’

²⁷Pọ kụ amem dị ọde-otu phọ ạmoogh igbiririph esi otelhedom mọ, kụ ạwilenaan nyọdi ọmugh phọ kụ ạḅeni mọ keel.

²⁸“Ogina phọ otelhedom mọ ọphon amite aten rạki, kụ ạmiin ọnon otelhedom dị ale ọmugh ọdi dị ụ́bugh, kụ ạghi ạpogh ooko ọdi, kụ ạḅem mọ, ‘Ụkpe ọmugh ạmi!’

²⁹Kụ otelhedom mọ ọphon phọ akpuḍian ạaḅereghi nyọdi mọ. ‘Mọogh ọkparam mị kạkpe ni nyịna ạmadan!’

³⁰Kụ ọdi ómeera, kụ ạsighe nyọdi ạlogh ikoli, mọ tụtu ọdi ạkpe ọmugh phọ ạmadan.

³¹Kụ mem dị bụeri phọ abutelhedom mọ ọmiin bọ ịpe ọdi aḍighi bọ, ịiḅaghami ni bịdi iboom, kụ ọghi ọghaaph oomo phọ ịpe emite bọ ọḅeni ọde-otu phọ.

³²Kụ ọde-otu phọ ạmagh nyọdi ạḅeni mọ, ‘Sey, nạ ọkaraph otelhedom, mị ụwilenaan ni nyịna oomo phọ ịimugh phọ ịpe, ịdipho nạ ụuḅereghian bọ ịmi.

³³Ịkpe dị nạ mụnma aani ighirigiir onyoogbo phọ ạna, ịdipho mị ạnma bọ nyịna.’

³⁴Rꞌọghagh ologhi kụ ọde-otu phọ ạḅogh nyọdi ạngo bụphe rọmiine ghan bọ bụo ikoli phọ, mọ tụtu ọdi ạkpe oomo phọ ịimugh phọ ọdi.

³⁵“Ịdipho kẹn kụ ẹdi Ọde phọ ạmi odi bọ kꞌạke phọ kiḍighi inyina, eḍighi ịyaar dị nyina ị́sar ghan ịkaraph ịbilenaan bụnon sịphe iloghi phọ anyina.”