Read abua Matiu 20 Bible Online

Matiu 20 - abua bible

Matiu 20

¹“Kọsighe ọmar phọ kꞌẸnaan ọmaaniom ọghaaph oye dị ạmoogh ozo ireeny amiim. Eḅon ạḍiroor kụ ọdi amite ophir awe ọghianaan ọdi ozo.

²Kụ ạmerenyan mọ ọno kạkpe ghan bịdi naira ḍio kụ ạḅeni bịdi mọ ọghi ozo phọ.

³Kụ ọdi ạḅile amite mem dị aḍio mẹza, kụ ạmiin bụnon dị ọmeregha ẹpe aḍighi phọ, dị ịyaar oḍighi ụ́moogh,

⁴kụ ạḅeni bịdi mọ, ‘Ịki aani ẹpe ozo phọ, kụ ịlo ẹkpianaan ọkpe anyina, mị kịkpe ni inyina.’ Kụ bịdi ọghi.

⁵Kụ ọdi amite ogbo ootaany ạmiin buniin, kụ ạḅile kẹn amite mem dị erumuḍio mẹgbol kụ ạmiin bụnon, kụ ạtuugh kẹn igina phọ ạḅeni.

⁶Kụ mem dị mẹteeny dulhe, kụ ọdi ạḅile amite ạmiin bụnon dị ọmeregha yogh, dị mạar oḍighi ụ́moogh, kụ apuru bịdi mọ, ‘Uḍighi ika kụ nyina ẹmeregha bọ sịen oomo phọ arodon bịn ịyaar réḍighi?’

⁷Kụ bịdi ọḅeni nyọdi mọ, ‘Oye iyoor úphir.’ Ọdi ạḅeni bịdi mọ, ‘Ịki aani ẹpe ozo phọ, kụ ịlo ẹkpianaan ọkpe anyina, mị kịkpe ni inyina.’

⁸“Rekpereghian, kụ uwozo phọ ạghi ẹpe ozo phọ ạḅeni nyọpo rapogh bọ ozo phọ mọ, ‘Mạgh we oḍighi phọ aakpomoghi ạkpe ịpe omerenyan bọ. Miigh bụen osugha bọ ọman phọ kụ ạkpe ạteenye bụḅel phọ.’

⁹Kụ bụphe oru bọ dulhe phọ ụkpe ni oye ye ạbidi oniin anaira.

¹⁰Kụ ạbuḅel ạbuphe oru bọ ugbiom ghan mọ kọkpe ni bụno opuemi bụphe osugha bọ ọman phọ. Kụ ọḅile bịn ọkpe aani bịdi oniin anaira.

¹¹Kụ bịdi rạar ikpoki phọ kụ ọgumom uwozo phọ

¹²mọ, ‘Bụen oḍighi bọ oniin ạwa phọ bịn nạ ạkpe ni aalenyan rꞌayoor phọ ọsela bọ ogogo ẹmhu aḍio phọ.’

¹³“Kụ ọdi ạphagharanaan oniin ọnyo ạbidi kụ ạḅem mọ, ‘Ọyaghiri, mị nyịna ịkaraph úḍighi. Mịna rꞌạna úmerenyan oniin anaira ẹmhu aḍio ḍụghum?

¹⁴Sịghe ịpe eru bọ ịpe ạna agheelom. Ịdipho mị ạngo bọ bụen osugha bọ ọman phọ kụ ịdi mị kạtuugh ni ạngo aani nyịna.

¹⁵Nạ kámeera mọ mị ulhiom ikpoki phọ ạmi ịlo ịḅeeraan ịmi ḍụghum? Rẹkagh ni ologhi ạna, mọ mị ogey oye ḍụghum?’

¹⁶“Ịduon phọ, pọ bụdi osugha ọman koḍighi bụḅel, kụ ạbuḅel phọ osugha ọman.”

¹⁷ẠJizos aten rạki Jeruselem, kụ ạgbatan ḍioph rꞌịyal ạbumatuan phọ atenom ọgbal ẹpe eten phọ, kụ ạḅeni bịdi mọ,

¹⁸“Ịnaghan, ịduon yira rọki bọ Jeruselem, kọḅogh ni Mọony phọ Oye ọngo bụo ạrumhu ariil ạrikia phọ rꞌạbutughemia iilogh phọ, kụ bịdi osoph erugh aḍuugh opume,

¹⁹kụ ọsighe nyọdi ọlogh ḍịghaagh aruuruen, ọnmoghoghoom yogh, ọgurogh kụ ọkan nyọdi okiigh, kụ ḍughul otu dị kemuneniom ịraar kụ ọdi aḅetenu esi aḍuugh phọ.”

²⁰Kụ onhiin ạnmuny phọ aZebidi ạpham ni nmụny phọ ọdi arumom ạteeny Jịzos akpuḍian, kụ ạlom nyọdi mọ aḍighinaan nyịno iiḅi.

²¹Kụ ọdi apuru ạnir phọ mọ, “Eeghe ịyaar kụ ẹdi nạ rạwa bọ?” Kụ ạnir phọ mọ, “Meera ni mọ ịyal ạnmuny phọ ạmi ạbuen ọrol oniin ḍịghaagh elhiom, ọphori phọ ḍịghaagh ekeeny ạna ẹpe ọmar phọ ạna.”

²²Kụ ạJizos mọ, “Nyina ílegheri ịyaar phọ nyina rẹlom bọ. Nyina ketue ni ẹpugholom ẹgo ịminimiin phọ ẹphen mị kạpugholom bọ ḍụghum?” Kụ bịdi mọ, “Yoor kotue ni.”

²³Kụ ọdi ạḅeni bịdi mọ, “Agey ni nyina kẹpugholom ni ẹgo phọ ạmi; kụ ịikpo ọngo awe sịdol oniin elhiom, ọphori phọ ekeeny, mị kụ ụ́moogh. Ọde phọ ạmi bịn kụ kạngo sịdol phọ ịpe we phọ ạbuphe dị maseenaan bọ.”

²⁴Kụ bụeri phọ aḍioph ạbumatuan phọ ọnaghan bọ ịphen phọ, ụghagham ni iloghi ịyal phọ ạnmuny-onhiin phọ.

²⁵Kụ ạJizos ạmagh bịdi mọ oru, kụ ạḅeni bịdi mọ, “Nyina elegheri ni mọ awe phọ ạbuphe oseere bọ mọ ọda ruuruen ọmoogh ni ịikpo esi awe phọ bịdi ọda bọ, ḅịle kẹn abugbogh phọ rọtooghi ghan ni ịtooghi kọngo bịdi.

²⁶Kụ kẹ́tol ịdipho sịen ogbo phọ anyina. Ogbo phọ anyina, ọlo rạwa oḍighi ogbogh, pọ kaḍighi oye dị kakumu ghan ạngo bụeri phọ.

²⁷Kụ ọlo rạwa oḍighi oḍiemiom, pọ ọdi kaḍighi eekuna ẹbene

²⁸ạkighemi Mọony phọ Oye, dị útu mọ okumu ọngo nyịno, aru okumu ọngo awe rꞌọsighe aghuḍum mọ ọdi ọtanyanam aḍita.”

²⁹Kụ ịdipho bịdi ọḍua bọ Jeriko, aḍita awe ụdaph ni nyọdi.

³⁰Kụ ịyal awe ikpom ariḍien ụrol li ude ọgbal oḅodo phọ. Kụ ọnaghan mọ ạJizos kụ ratu oten, kụ ọlooghi mọ, “Oye phọ, nạ ọony phọ aDevid, ụnma iyoor ighirigiir.”

³¹Kụ aḍita awe phọ uubophoghi ni bịdi mọ, “Ikpomori rụnhu anyina,” kụ bịdi ọkparami ghụn ịlooghi phọ mọ, “Oye phọ, nạ ọony phọ aDevid, ụnma iyoor ighirigiir.”

³²ẠJizos ạmeera kụ ạmagh bịdi kụ ạḅeni mọ, “Nyina rẹwa mọ ạmi iḍighinaan inyina eeghe?”

³³Bịdi mọ, “Oye phọ, yoor rọwa mọ nạ ḅạrion riḍien phọ ayoor.”

³⁴Kụ ạJizos ạmoogh igbiririph esi ạbidi, kụ ạḅogh riḍien phọ ạbidi, kụ egina amem bịn bịdi ọmiin eten kụ ọghi ọdaph aani nyọdi.