Read abua Matiu 23 Bible Online

Matiu 23 - abua bible

Matiu 23

¹ẠJizos ạḅeni ḍita awe phọ rꞌạbumatuan phọ ọdi mọ,

²“Ạbutughemia iilogh phọ rꞌaFarisi phọ mọsighe dọl phọ aMozis rọtughemi ghan we iilogh phọ ọdi.

³Tọrobo ịlo bịdi ịḅeni inyina mọ iiko, iiko ghan ni, kụ kẹ́daph ghan rạaghara phọ ạbidi, ịdi eḍighi bọ bịdi ọkaaph ịnon, kụ ọḅile roḍighi ịnon.

⁴Bịdi rọkoroghi ghan sidool dị kótue otool kolereghi bụnon aweye, kụ ạri rꞌạghunugh ạbidi rạ́ḅogh aani ni rꞌaḍiniin adool phọ.

⁵Kụ tọrobo ịyaar lọ bịdi oḍighi, rọwa ghan mọ awe ọmiin bịdi ọseph. Ịmiin ịdi bịdi ọsighe ịkololoony aruzu-ịnam dị ọgeeghi sịkpigh ạḍinya iigbia phọ kụ ọphiinya yogh rolhor rꞌạraghaagh ạbidi, ẹḅile ẹmiin ịdi ạrusuoma phọ ạbidi ẹgorogoro yogh.

⁶Ẹḅeeraan bịdi ọrologhu ghan ariisi eghuan mem amalhe rꞌigbogh ạsidol ẹpe arubughotu phọ.

⁷Ẹḅeeraan kẹn ni bịdi lọ awe kọmagh ghan bịdi ẹpe asiḍighi phọ okueni mọ ‘Bụtughemia’.

⁸Kémeera ghan mọ ịmagh inyina mọ ‘Bụtughemia’, ịdi eḍighi bọ aḍita anyina abumor ri dị nyina ẹmoogh oniin ọtughemia bịn.

⁹Kẹ́magh ghan oye sịen aḅirini phọ mọ ‘Ọde’, ịdi eḍighi bọ nyina ẹmoogh bọ oniin Ọde bịn, ọpo odi bọ kꞌạke.

¹⁰Kémeera ghan kẹn mọ ịmagh inyina mọ ‘Buḍiemiom’, ịdi eḍighi bọ aMesaya bịn kụ oḍiemiom anyina.

¹¹Kụ ọlo aḍighi ogbogh sịphe ogbo phọ anyina kaḍighi otelhedom.

¹²Kụ oye lọ aphophe loor ọdi kosooromi ni, kụ oye lọ asooromi loor ọdi kopophe ni.

¹³“Pọ eeghe ịminimiin dị kịrolonaan inyina, ạbutughemia iilogh phọ rꞌaFarisi phọ, nyina abulegheri ịlo ạbunon, ịlo-anyina-ílegheri. Nyina mekikima weye ịlo koḍigh ọmar phọ kꞌẸnaan. Nyina ímeera mọ awe lọ rọwa oḍigh oḍigh, kụ ạri nyina rꞌaloor anyina réḍigh ni.

¹⁴“Pọ eeghe ịminimiin dị kịrolonaan ni inyina, ạbutughemia iilogh phọ rꞌaFarisi phọ, nyina abulegheri ịlo ạbunon, ịlo-anyina-ílegheri. Nyina mạarom ruutu ạnmariir dị aburulhom umuughu, kụ okue rọoḅereghi ghan ịidoony ịiḅereghi. Esi ịduon phọ, ịdi kịliom inyina kẹloghori ni iboom!

¹⁵“Pọ eeghe ịminimiin dị kịrolonaan inyina, ạbutughemia iilogh phọ rꞌaFarisi phọ, nyina abulegheri ịlo ạbunon, ịlo-anyina-ílegheri. Nyina ẹḅeeny oḍual ighool rꞌoḍual ạriphiiny okiton oniin oye ịlo ọdaph anyina, kụ rekiton nyọdi, nyina meḍighi mạar dị ọdi kabeeph ịyal amem ipu inyina ạkpe oroph osumeeny ooni ạnian.

¹⁶“Pọ eeghe ịminimiin dị kịrolonaan inyina phọ ẹghigh bọ we ikpom ariḍien dị ọḅem mọ bụno koḍiemiom bụnon. Nyina rẹtughemi ghan mọ oye lọ aghunya Otu Ịiḅereghi phọ kụ ạka iikunya phọ, pọ ịikpia ílho, kụ mọ oye lọ aghunya gol phọ odi bọ pạ Otu Ịiḅereghi phọ kụ ạka iikunya phọ, pọ kạkpe ni ịikpia.

¹⁷Nyina awe ikpom ariḍien dị mạar úlegheri. Iḍighi ika kụ nyina egbi bọ mọ agol kụ ạman mạar apu Otu Ịiḅereghi phọ? Kụ ạri Otu Ịiḅereghi phọ múlho bọ, agol phọ múkuan.

¹⁸Nyina rẹtughemi ghan kẹn mọ oye lọ aghunya enmeny ạrikia phọ kụ ạka iikunya phọ, pọ ịikpia ílho, kụ tọrobo oye lọ aghunya inmo phọ edi bọ pạ ạnyu phọ, pọ kạkpe ni ịikpia.

¹⁹Nyina awe ikpom ariḍien. Iḍighi ika kụ nyina egbi bọ mọ inmo phọ kụ ẹman mạar epu enmeny phọ; kụ ạri enmeny phọ mílo bọ, inmo phọ míkuan.

²⁰Ịduon kụ iḍighi kụ oye lọ aghunya enmeny ịyaar aghuḍum mọ, pọ maghunya aani ni rạraar phọ edi bọ pạ ạnyu enmeny phọ.

²¹Kụ oye lọ aghunya Otu Ịiḅereghi phọ, pọ maghunya aani ni Ẹnaan phọ erugh bọ sịphe phọ.

²²Kụ oye lọ aghunya kẹ, pọ maghunya aani ni ạgada ọdaam mọ rꞌẸnaan phọ ẹrolom bọ.

²³“Pọ eeghe ịminimiin dị kịrolonaan inyina, ạbutughemia iilogh phọ rꞌaFarisi phọ, nyina abulegheri ịlo ạbunon, ịlo-anyina-ílegheri. Nyina redi ghan ghạlamo rꞌịikiripha amooboph rꞌikpo aghuuḍia ḍioph abin kẹsighe muniin ẹngo Ẹnaan, kụ mẹwile ịpe eḍighi bọ ephigh sịphe iilogh phọ — asiph rꞌakeel rꞌọnma ighirigiir rꞌebi ghan oguan. Iḍighi ghan ịphen phọ kụ egbi ghan ọḅaram ịpheri phọ.

²⁴Nyina awe ikpom ariḍien dị ẹḅem mọ nyina keḍiemiom bụnon. Nyina ẹmiin ni ẹphi ẹsighe sịphe ạmuum mọ nyina kẹpughol bọ, kụ rẹminom ni okpom ạkamel.

²⁵“Pọ eeghe ịminimiin dị kịrolonaan inyina, ạbutughemia iilogh phọ rꞌaFarisi phọ, nyina abulegheri ịlo ạbunon, ịlo-anyina-ílegheri. Nyina reetologh ghan sịgbagba rꞌạrukpa phọ anyina kẹḅaalami ẹphen ạnyu phọ, kụ sịphe iloghi phọ anyina ekpooko rꞌolomoghian kụ imuza.

²⁶Nạ ọnyo aFarisi dị ariḍien meḅomoghian, pụr aatol ologhi ạgbagba phọ ạḅaalami, pịdi ologhi phọ rꞌạnyu phọ ẹḅaal egina phọ ẹḅaalom mọ.

²⁷“Pọ eeghe ịminimiin dị kịrolonaan inyina, ạbutughemia iilogh phọ rꞌaFarisi phọ, abulegheri ịlo ạbunon, ịlo-anyina-ílegheri. Nyina ẹkigh iiḍi dị ogbul ọphalaḅaal ạgba, dị ẹphen ạnyu phọ ẹdugh ọmiin, kụ ẹpe ologhi phọ ịḅarara awe dị omuughu rꞌịḅoria ạraraar kụ edi.

²⁸Ịdipho kẹn kụ ẹdi nyina ẹrol ẹphen ạnyu phọ, esi ariḍien ạbunon awe mụdi nyina abugey ni, kụ ạri, ẹpe ologhi phọ anyina ọkpe rꞌịkaraph kụ imuza.

²⁹“Pọ eeghe ịminimiin dị kịrolonaan inyina, ạbutughemia iilogh phọ rꞌaFarisi phọ, abulegheri ịlo ạbunon, ịlo-anyina-ílegheri. Nyina ẹsimenti yogh ạnyu iiḍi ariil phọ Ẹnaan agediidi phọ, kụ ẹḅile eselemi iiḍi abugey awe agediidi phọ,

³⁰kụ ẹḅem mọ, ‘Yira ụrol aani gediidi phọ mem ạburude ạburude phọ ayira, ọbo yira mụ́zeeghi riil phọ.’

³¹Esi ikpo ọnhu phọ ịphen phọ, nyina mẹgba emitiom rꞌaloor anyina, mọ anyina ạnmuny awe phọ ọzeeghi bọ riil phọ.

³²Iḍighi nụun ẹmadan ịpe ạburude ạburude phọ anyina omiigh bọ.

³³Nyina ạbukaraph awe, nyina ọmar ạsiḅom, ika kụ ịdi nyina kekpetenaan bọ ghẹlhe ooni ạnian phọ?

³⁴Esi ịduon phọ, mị katom riil rꞌawe olegheri-ịyaar rꞌạbutughemia iruomaan inyina, kụ nyina kẹzeeghi ni buniin, ẹkanagh buniin loor oreeny, ẹgurogh buniin rubughotu phọ anyina, ẹḍua ẹmha ẹgba ẹmha eporogh buniin.

³⁵Ịduon kụ iḍighi kụ kọsighe ghẹlhe ọzeeghi awe dị mạar ụ́piom, ọḅam rụmhu anyina, emiigh kꞌEbel ogey oye phọ, kụ ẹteeny Zẹkaraya ọony phọ aBarakaya, ọpo nyina eghiigh bọ sịphe ogbo Ạdol Iigbia Otu Ịiḅereghi phọ rꞌenmeny ịyaar aghuḍum mọ.

³⁶Mị ạkar rịḅeni ghan inyina mọ ạghelhe oomo phọ ạraraar phọ ịphen kạtolonaan ni weye oghiil phọ ọphon.

³⁷“Weye aJeruselem, weye aJeruselem, nyina mẹze riil phọ Ẹnaan, kụ etoḅol ikpo bụphe orom bọ kụ oru bọ ịteeny inyina. Ika ọdo amem kụ ẹdi mị mạwa bọ oghuraam anyina, ịdipho ạkenegh ramuphonom ghan bọ nmụny ọdi pạ araphaaph phọ ọdi, kụ nyina ímeera bọ.

³⁸Ade ẹmha phọ anyina keḍighi ọkpagha.

³⁹Mị rịḅeni ghan inyina mọ emiigh kꞌạnyiidipho ẹghiom ghisigh nyina ịmi kị́miin mun, tụtu nyina ẹḅem mọ, ‘Ẹnaan ẹseph ni nyọpo aghol bọ ḍien Ọmoogh-we phọ kụ aru!’”